السخنه

**abokoko** · 24-04-2011 11:14 AM

كان عندى دورة تدريبيه تبع الشغل وسافرت من الغردقه الى الاسماعيلية --مواصلات مش بعربيتى --سافرت الجمعه ورجعت السبت وسوف استكمل الدورة بعد شم النسيم
وطبعا لانى مواصلات مش سايق ..فكانت فرصه انى اتمتع بالرؤية والفرجه على الطريق

واتفاجئت بروعة الطريق فى الجزأ ما بين السويس والزعفرانه -تحديدا - طريق السخنه
حاجة فوق الوصف انك تشوف البحر من ناحية والجبل من الناحية الاخرى
والقرى السياحيه من اتجاه الجبل بتخلى المنظر احلى واحلى
طبعا وبكل تاكيد الدورانات اللى بتخلى الطريق يظهر ويختفى امامك بتخليك كانك فى فيلم تشويق علشان تتابع باقى الطريق

لكن
1= الطريق خطر جدا الملفات وضيق الطريق والسرعات العالية لكل العربيات تقريبا الملاكى والاجرة والنقل والاتوبيسات كله بيجرى كانه فى سباق او كانهم فى تحد داخلى لمواجهة صعوبة الطريق واخطر شيئ محاولة تخطى عربية نقل او تريلا بتجرى هى كمان ومش هاين عليه يوسع لك

2= وده الاهم =
شاطئ البحر الاحمر -منظر المياه الزرقاء - روعة النظر الى المياه ورؤية السفن من بعد والرؤية مفتوحه على سماء ومياه ---كل ده ممكن نتحرم منه علشان اصحاب القرى السياحية والمنتجعات والكومباوند اللى بينوا على الشاطئ مباشرة وهيمنعوا الرؤية -بالاضافة لامكانية النزول للمياه لانهم هيخلوها شواطئ خاصة

-- عجبنى بناء فندق بورتو السخنه على الجانب الجبلى من الجبل وياريت كل القري تتبنى فى الجزأ الجبلي وتبعد عن الشاطئ

-- سؤال لو اسرة عادية او مجموعه شباب حبوا يقضوا يوم حلو جميل ويتمتعوا هما كمان بشاطئ السخنه ..
يا ترى هيلاقوا مكان لو استمر الحال من اسيلاء القري على شط السخنه

بلاش نخلى كل حاجه حلوه للاغنياء ونحرم الغلابة منها

حاجه اخيره جت على بالى بعيده عن الموضوع لكنها كانها شرح ليه
عندنا مخبز عيش مدعوم ب 5 قروش للرغيف بس المخبز تابع للداخليه باختصار تعليق المشتريين اللى بسمعها لما بقف اشترى عيش - انى العيش ده (( سحله )) يعنى فضلة العيش النقاوة اللى بياخده اساده الضباط واتباعهم والباقى اللى مش بيعجبهم هوا اللى بيسبوه لينا
يا رب اصلح الحال

**tamatemo** · 25-04-2011 04:25 AM

المشاركة الأصلية كتبت بواسطة abokoko

حاجه اخيره جت على بالى بعيده عن الموضوع لكنها كانها شرح ليه
عندنا مخبز عيش مدعوم ب 5 قروش للرغيف بس المخبز تابع للداخليه باختصار تعليق المشتريين اللى بسمعها لما بقف اشترى عيش - انى العيش ده (( سحله )) يعنى فضلة العيش النقاوة اللى بياخده اساده الضباط واتباعهم والباقى اللى مش بيعجبهم هوا اللى بيسبوه لينا
يا رب اصلح الحال

انا هارد عليك في دي بس

مخابز العيش بتاعت الداخلية دا الطبيعي بتاع عيشها
علشان دا اللي بيتبعت للتموين اليومي للامن المركزي والقوات الامنية

**abokoko** · 25-04-2011 12:32 PM

المشاركة الأصلية كتبت بواسطة tamatemo

انا هارد عليك في دي بس

مخابز العيش بتاعت الداخلية دا الطبيعي بتاع عيشها
علشان دا اللي بيتبعت للتموين اليومي للامن المركزي والقوات الامنية

اولا شكرا للرد
ثانيا عيش الداخليةبيطلعمنه عيش فوق الممتاز واحنا احيانا احيانا فقط بيطلع لنا العيش الممتازده لكنغالبا اللى بيطلع لينا -- السحله -- ده التعبير اللى بيستخدموه للعيش المرفوض على السير

ثالثا موضوع العيش مثال توضيحى للسخنه
بمعنى العيش السحله فضلة الساده الظباط يتم بيعه للجمهور ..وبالمثل
شواطئ المحروسه المميزه للقري السياحية وللفيلات والنوادى الخاصة والباقى من الشواطئ المعابة (شواطئ راكده او قريبه من ابار بترول او قريبه من صرف صحى او اى عيب اخر ...) هى لعامة الشعب = العيش السحله

**love7amada** · 25-04-2011 08:32 PM

انا سافرت العين السخنه مرتين و اقدر افيدك ع قدي لاني لسه راجع انبارح بليل منها
فهرسيك ع الجو هناك عامل ايه
بس الاول اتكلم عن الطريق
طريق العين السخنه من اروع الطرق عشان فري واي و اللي عايز يقفل عداد بيطلع عليه بس المشكله بقي فعلا من بعد بوابات السخنه ف الحته اللي حضرتك زكرتها ديه كلها حوادث و الواحد بيتشاهد مجرد ما يعدي منها و سواقين اغبيه بيتخطوا ع الملفات و حاجه قرف فعلا بس ملهاش حل اليمين جبل و الشمال بحر يمكن حلها جزيره 20 سم تمنع التخطي و الكل يكون ملزم بسرعه اللي قدامه
نيجي بقي للقري
انا اول مره رحت دخلت واحه مينا و ديه لو رحله يوميه يعني من 9 الصبح ل 6 مساءا الفرد ب 95 جنيه شامله وجبه غدا بتختارها انت من بين سمك فيليه او شيش او بانيه مع المكرونه او الارز و السلطات و الحلو يا جيلي يا هلبيه يا كريم كراميل و الشاطي كويس و الناس زوق جدا ف التعامل تعاملهم كويس مع الكل مسلم او مسيحي بجد
رحت برده شاطئ الزهور و ده الفرد ب 50 جنيه دخول شاطئ بس لكن مكان نضيف فعلا عشان تبع الجيس
ف كمان شاظي السادات شعبي جدا جدا جد و مينفعش للعائلات ف نظري لكثره الشباب و الجو مش حلو و مفيش امن خااااااااااالص بس عموما برده دخول الفرد ب 10 جنيه و ممكن تدخل ب 8 كمان و جوا مع نفسك ع الشاطئ تأجر كراسي و شمسيه
في شاطئ كمان اسمه كينجو ده حضرتك عديت عليه هوا اول شاظئ بعد المنحنيات الخطر ديه و ف وشها ناحيه الجبل كافتريا و محلات و كده يعني ده الدخول الفرد ب 15 جنيه ف الايام العاديه و 20 لو اعياد و المكان كويس برده و حلو الصراحه
طبعا باقي القري فيلات و اتحاد ملاك عشان الواحد لف عليهم واحده واحده و مفيش فايده و ف قريه بعد الزهور عائلات فقط مش فاكر اسمها بس الفرد ب 40 جنيه
مسافر تاني يوم الاربع اجرب اماكن جديده

**l0new0lf** · 25-04-2011 08:54 PM

طب حد لاحظ ان اصحاب القرى و الناس الى بتبنى هناك راميين مخلفات بناء و مبوظين الشواطئ علشان الى يروح لازم يدخل البحر عن طريق قريه؟

**abokoko** · 25-04-2011 09:04 PM

شكرا لذوق حضرتك فى الرد ولمعوماتك المهمه والمفيده لو انا او غيري حب يروح السخنه
وانا بايد كلام حضرتك المكان رائع

بس بكرر
1= حرام المكان يتاخد للقري ومنسبشي مكان لشاطئ عام للغلابة
2= حرام الشاطئ من ناحية البحر يتبنى ونتحرم احنا الماسفريين من متعه رؤية البحر بجماله ورعته اللى بتكمله رؤية الجبال على الناحية الاخرى -- والله المكان يتصور فيه احلى الافلام --ويعمل احلى دعاية لمصر
3= خطورة التخطى فى الملفات على السرعات العاليه اللى الكل بيجرى بيها

**love7amada** · 25-04-2011 11:56 PM

اه سوري نسيت اهم معلومه عن تجربه عايز تقعد ع البحر اقعد من 9 الصبح ل 12 و حط بعدها صن بلوك و روح اتغدي او اقعد ف مكان ضل لحد الساعه 3 او 4 ع حسب انت هترجع امتي بعدها انزل الميا
اوعي اوعي اوعي تنزل الميا الصبح و تقول اهرب من الشمس بيكون الجزر شديد ف بتدخل جوا عشان الميا فمش بيكون تحت رجلك غير شعاب مرجانيه بتدمر رجليك انا و الله رجعت رجلي متشرحه لكن من بعد 3 المد بيعلي جدا و سبحان الله بتنزل براحتك و متعرفش توصل للشعاب اصلا بتكون جوا ف الغريق
فاهمني ؟؟
النزول ممتاز ع الساعه 4 لحد 6 او يمكن من الساعه 3 كمان