السلام عليكم
عربيتي 128 الشكل القديم و كنت مسقط لها موتور 1300
كانت تحفة بصراحة اول ما ركبته بالفتيس
كنت بجيب 150 بكل سهولة
هو الموتور كان مكتوب عليه ريتمو بقلم دوكو
و تقريبا برضه 75 حصان
هو كربراتير اتنين باب و الشكمان بمسورتين و اسبراتير اتوماتيك

دلوقتي بقى جاب اخره و كنت ناوي اعمره
فقلت اعدل فيه شوية

ينفع اخليه 1500 او اكتر ؟
لاقيت ان المفروض ان قطر البستم كبير - 86مم مش 80 زي ال1100 - و المشوار بتاع البستم هو اللي قصير فمش عارف ينفع اكبر البستم في القطر اكتر من كده .. لكن ممكن اطول المشوار بتغير الكرنك بكرنك يكون بيشد البستم لتحت اكتر فبالتالي المشوار هيطول و لما يجي البستم يطلع المفروض هيطلع زيادة عن مستوى البستم القديم .. يبقى الحل بستم اقصر من القديم و بكده المشوار هيطول اكتر كمان .. مش عارف بقى في هنا في مصر كرنك و بستم ينفع لكده ولا لأ

فكرت كمان في تكبير الصبابات
لاقيت ان تكبير صبابات البنزين هو اللي بيأثر في سحب الموتور
بس الموضوع مش مجرد تكبير صباب و بس .. ده الاهم توسيع مجاري الهوا في وش السلندر و مش كده و بس ده لازم كمان نقلل العوائق و الانحانات في المجاري عشان سريان الهوا يكون سلس
فالموضوع كبير ... لكنه متاح انما المشكلة في اللي ممكن ينفذ .. خراط محترف

في تعديل تاني عايز اعمله و مش عارف هيفرق ولا لأ
الشكمان كنت ناوي اعمله هيدر .. بيفرق كتير؟؟
و بعدين فكرت اني بدل الهيدر آخد من آخر المشترك المفروض انهم ماسورتين و بيعدين بيضموا في ماسورة واحدة لآخر الشكمان
انا كنت عايز اخليه ماسورتين من عند المشترك لحد الآخر
عندي بتاع شكمانات معلم عايز اعمل عنده الموضوع ده انما لو الهيدر افضل اعمله و ممكن اعمل معاه كمان موضوع الماسورتين لحد الآخر برضه

لاقيت برضه تعديلات في ضبط التاكيهات و ده تقريبا اللي بتعمله الكامات الاسبور
لما صباب البنزين يقفل بدري بيزود الضغط الناتج في غرفة الاحتراق
و لما صباب العادم يفتح متأخر بيخليك تاخد كل القوة الضاغطة الناتجة عن الاحتراق

ايه رايكم في الكلام ده
عملي و يمكن تنفيذه ولا لأ
في انتظار ارائكم

انا كنت هبعت لوحد على موقع Turbo 124 اسمه fiatfactory
الراجل ده حاسس انه بيفهم في الفيات اكتر من شركة فيات نفسها
فظيع بجد .. يعني واحده مصري مره ساله عايز يخلي موتور 128 1300 او 1500 مش فاكر يطلع 100 حصان
قعد عمل حسابات كتير و توصل لاكتر من 100 حصان باستخدام قطع غيار لمواتير فيات مش قطع غيار معدلة
بس انا قلت اشوف ارائكم ايه الاول

و جزاكم الله خيراً
و السلام عليكم