الموضوع: تعديلات داخلية لمحرك فيات 128 1300

المشاركة الأصلية كتبت بواسطة kaza

عينيا ياسيدي وحارد علي سؤالك ..طبعا موضوع التبريد بيتحط في الاعتبار بس مش بادخل علي تصميم شبكة التبريد في البلوك او وش السلندر انما بيكون رفع كفائة التبريد منصب بشكل اكبر علي دورة التزيت ودة بيتم باني باركب ياما مبادل حراري بفلانشة مكان فلتر الزيت مباشرة او عن طريق سربنتينة (ردرياتير) وترموستات وقاعدة للفاتر تسمح بخروج الزيت خارج المحرك للتبريد والعودة وبرضة دورة التبريد بالسائل مهمة في الحفاظ علي حرارة تشغيل مناسبة للمحرك ودي بتتم عن طريق التجهيز بمبرد اضافي او اكبر من القياسي او تغيير مكان المبرد وزاوية مقابلتة للهواء وكمان فيه ناس بتتطرف في التعديل لغاية البتجهيز بطلمبة مياة كهربائية متغيرة السرعات طبقا للحمل الواقع علي المحرك
وبالنسبة لحتة ان الردرياتير الاكبر مش هيعوض السخونة اطمنك باني وعن تجربة شخصية في اول مشوار التعديل واول مرة اركب تربو كان علي محرك اوبل مانتا ار اس 200 موديل 78 وحقيقي مؤشر الحرارة كان بيزيد زي مؤشر اللفات لما باقرص علي العربية ومع محاولات التبريد وصلت اني ركبت مبرد تفصيل مساو لعرض العربية من الامام لدرجة اني شيلت الفوانيس الامامية (معنى كدة أنك مكنتش بتعرف تمشي بيها بالليل؟!!) وركبت مروحتين كهرباء بالاضافة للميكانيكية ولم افلح في خفض الحرارة حتي باستخدام 8رشاشات مياة بخزان منفصل والشئ الوحيد اللي خفض الحرارة كان مبرد زيت لعربية ايواز كهنة من شارع الجسر كان وقتها ب20 جنية وشوية خراطيم مكبوسة عمولة وفلانشة مباشرة تحت الفلتر (أيه اللي حضرتك تقصده بالفلانشة اللي تحت الفلتر ؟!!) والحمد لله فضلت معايا 6سنين لغاية مراتي ما قالتلي يانا ياالعربية دى واكيد انت توصلت للنتيجة عندها حق والله وكويس أنك مطلعتش بخساير بعد التهديد ده وأثرت السلامة بنفسك ... ههههههههههه

أستأذن حضرتك في توضيح الحاجات اللي تحتها خط .. حيث أني لست مهندس ميكانيكا وخصوصاً موضوع الفلانشة ده شكلها عامل ازاي وبتركب ازاي ؟! .

دي حاجة .. الحاجة التانية بقى سؤال بره الموضوع بمناسبة ارتفاع الحرارة .. وهي أني كنت مسقط موتور 1300 بالفتيس (5 غيار) .. ومغيرتش الشكمان .. وكنت فاكر أنه السبب في ارتفاع الحرارة في المشاوير الطوالي (السفر على سرعات عاليه لمسافة طويلة) بالرغم من أنه من المفروض الهواء يبرد العربية كلما زادت السرعة .
ملحوظة : كهربة العربية على طول بظبطها زياده سنة بسيطة علشان سحب العربية (بس مش لدرجة أنها تسقف وتعمل مشاكل) + الردياتير سالك ودورة التبريد تمام وحاطط مية خضراء + بتاع الشكمانات قالي أن الشكمان سالك والقطر بتاعه مناسب للعربية ومش محتاج أغير الشكمان ولا علبة من العلب بتاعته على الرغم من أن العلبة الوسطانية بتاعة العربية الأصلية 1100 اللي هي أصغر شوية من علبة الشكمان الـ 1300 ومش حتفرق (من وجة نظره) .

المشاركة الأصلية كتبت بواسطة kaza

تحت امرك ..واشكرك علي كلماتك اما بالنسبة لموضوع الفلانشة فهي عبارة عن قرص معدن وفي الغالب بيكون من الالومينيوم وله قلاوظ داخلي من ناحية ذكر والاخري نتاية اوبمعني اخر قلاوظ للداخل ومجوف من الوسط وبيكون لناحية المحرك والجهة الاخري قلاوظ خارجي مجوف بيكون لناحية الفلتر وله من الجنب مخرجين واحد بيركب علية خرطوم او لاكور للخرطوم الذاهب للمبرد والاخر بيكون العائد منه علشان يرجع الزيت المبرد لدورة التزييت للموتور
والفلانشات دي بتلاقيها استعمال في الوكالة او في عزبة شلبي وهتلاقيها دائما في محركات الاستعمال الاونو التربو او الريتمو ال2000 او ال131 الريسنج وايضا بعض محركات الالفا روميو زي الالفا 155 او164 ومؤخرا 156 ال2000 توين سبارك
الخراطيم بتكون خراطيم زيت هيدروليكي تتحمل الضغوط العالية لدورة الزيت وبتوع كبس الخراطيم بيفصلوها حسب الطلب المهم تكون معاك النهايات بتاعة الخرطوم وفي الغالب بتكون في الفلانشة والمبرد
بالنسبة للمبرد اي مبرد سواء اونو او الفا او لانشيا او حتي روسي بتاع عربية لوري زيل او ايواز او كراز ..علي حسب طلبك والمكان المتوفر عندك
نيجي لموضوع السخونة في الموتور عندك ودة مع افتراض ان المحرك كبسة كويس وجوان وش السلندر سليم والوش مش منبعج (مقوس) و نسبة الخليط بتاعه الكربراتير مضبوطة والكهرباء تمام وحاله الاسبراتير كويسة و زوايا العجل تمام فبيبقي في الغالب الضغط الخلفي للعادم علي وش المكبس او الباك بريشر ودة بيكون عبارة عن تراكم غاز العادم في المسافة بين غرفة الاحتراق والفرن وذيل الشكمان ودي في الغالب الصنايعية عندنا بيهملوها وحاطلب منك انك تتكرم وتبص علي فرن الشكمان وتشوف هل هو نفسه بتاع ال1100 ذو الماسورة الواحدة ولا بتاع ال1300 ذو الماسورتين لان بتاع 1100 مصمم لتصريف كمية اقل من الفرن مشترك المواسير بتاع ال1300 وكذلك باقي الشكمان لا يجب ان يقل قطرة لل1300 عن ال5سم او ال2 بوصة ويكون خالي من عنق الزجاجة او المخانق والزوايا الحادة
ومنتظر ردك...

شكراً لأهتمامك في الرد .. بالنسبة للشكمان هو فعلاً ماسورة واحدة من عند المشترك على ما أعتقد (مش فاكر بالظبط بصراحة بس بنسبة 90% ماسورة واحدة مش اتنين) .. وبقول لحضرتك استبعد تماماً موضوع جوان وش السلندر وانبعاج وش السلندر وضبط الكربراتير والكهربا إلخ .. بس كنت عاوز أعرف أيه علاقة زوايا العجل بارتفاع درجة حرارة الموتور؟! .. أه نسيت أقول على حاجة هي أن بتاع الشكمان حط أيده على الشكمان من الخلف على بعد مسافة 5سم تقريباً وقالي العلبة مش مأثره والشكمان سالك بدليل أن العادم طالع بشكل منتظم وبسلاسة (الاختبار ده كان على السلانسية .. ومع الضغط على دواسة البنزين) .

بالنسبة لشرح حضرتك على الفلانشة ومبرد الزيت .. كان ليا استفسارات أرجو أن يكون عندك سعة صدر ليها وتستحملني .. بس حعملها في مشاركة تانية بكرة إن شاء الله علشان عاوز .
وفي النهاية أحب أقول لحضرتك :

المشاركة الأصلية كتبت بواسطة misoalex

استاز kaza كنت عاوز اسأل حضرتك عن موتور ال 128 الابارث وكنت بعت لحضرتك رساله على الخاص زمان بس يظهر حضرتك مش متابع المنتدى

انا عندى الموتور اللى هو 128A المفروض ان ده بتاع الابارث ولما دورت فى برنامج اوتو داتا لقيت ان الموتور ده 1290 cc

طيب لو عاوز اخد احسن اداء من الموتور ده اعمل فيه ايه عشان ازود التسارع والهورس باور
هو الفتيس اللى راكب فيه 4 غيار مش 5 والاسبراتير الفابريكه بتاعه شببه بتاع اللادا مش زى بتاع ال 128 وفيه واحد بتاع قطع غيار قاللى هو موتور الابارث اول اسبراتير الشكل ده نزل فيه قبل مينزل فى اللادا فتأكدت انه فعلا ابارث

انا التعديلات اللى عاملها انى حاطط فلتر اسبور وشايل كل علب الجكمان وحاطط ديفل علبه كبيره شويه بس ديفل اصلى استيراد مش صينى

مش موتور الأبارث بيبقى 1100 سي سي .. واللي يأكد كلامي أن مفيش 128 1300 سي سي الفتيس بتاعها 4 غيار .. إلا لو حضرتك مسقط موتور 1300 في العربية على الفتيس القديم الأربعة غيار .. يا ريت تصحيح لمعلوماتي لو كانت غلط .