أعراض تلف المساعدين

**M_selim** · 28-04-2011 05:47 PM

الاخوة الاحباء

كنت عند الميكانيكي الاسبوع اللي فات باشتكي من صرير و تزييق في العجل الخلفي و أنا بأمشي بالعربية صباحا و هي لسه في أول النهار رغم أن الصوت بيختفي بعدما تمشي شويتين و بالكشف أتضح أن الطنابير الخلفية و معاها التيل و مساتر الفرامل محتجين تغيير المهم و هو بيغير قعد يدوس على الشنطة و قاللي المساعدين الخلفيين كمان خفاف و محتاجين تغيير .

الميزانية لم تسمح بتغييرهم و لكن ممكن الشهر القادم و لكن أحب اعرف هل الراجل بيضحك علي و عايز يعمل شغل ؟؟؟؟ يعني أزاي بالضغط على الشنطة عرف ان المساعدين خفاف ؟؟؟؟؟؟؟؟؟ هل يوجد طريقة كشف اخرى أم الموضوع بالخبرة فقط ؟؟؟؟؟؟؟؟؟؟؟؟؟؟؟

أنا قعدت أضغط على الشنطة لقيتها بترجع لفوق بسهولة و لم أفهم شئ ؟؟؟؟؟؟ ايه الفارق بين المساعد السليم و الخفيف ؟؟؟؟؟

ميشيل سليم

**beshomilan** · 28-04-2011 08:09 PM

أنا قعدت أضغط على الشنطة لقيتها بترجع لفوق بسهولة و لم أفهم شئ ؟؟؟؟؟؟ ايه الفارق بين المساعد السليم و الخفيف ؟؟؟؟؟

اعتقد مدام بيرجع بسهولة يبقى كده محتاج تغيير..لو كويس هتلاقيه بيرجع بصعوبة وتقيل..والله اعلم

**fouaa** · 28-04-2011 08:23 PM

بص يا فندم اولا نبزه صغيره عن المساعد فالعربيه
هو المساعد فالعربيه ملوش غير وظيفه وحده بس انو بيمسك العربيه فالمطبات وميخليهاش تتمرجح طبعا وبيمتص الصدمات يعنى لو شوفت عربيه من غير مساعدين العجل ماسك فالعربيه حديد فحديد واخدت مطب وانت على سرعه 60 العربيه كتله وحده كده هتطير فالهوى انما عندنا المفروض السوسته بتتفتح وتاخد جسم العربيه معاها والى بيمسكها فالعجل هو المساعد فبيخلى حركتها مريحه وبطيئه فول المساعد باظ العربيه فالمطب هتفضل تتمرجح كزا مره ده لو باظ خالص انما لو خف شويه هيعمل زى مانت مبتقول لما تدوس على الشنطه تطلع بسهوله ومن غير متتعبك المفروض تاخد وتدى معاك كده وتحس بمقاومه المساعد للحركه الرائسيه دى انت عموما ممكن تجرب فعربيه تانيه عشان تحس الفرق انت فاقرب فرصه غيرهم ومش تجرى بقى لحد متغيرهم عشان العربيه بتبقى عيمه بس

**smsm_nabawy** · 01-05-2011 01:52 AM

أخ ميشيل ،، منور المنتدى ،، المساعد ،، لو حضرتم و أنت بتضغط عليه ،، لقيت العربية بتنزل معاك و تطلع زي المستيكة ،، يبقى خف

لو بتضغط عليه و مش بتنزل ،، و محجرة ،، يبقى "محجر" في كلتا الحالتين بيتغير !!

اما الطبيعي ان العربية تنزل معاك لكن بمقاومة منها !! مش بليونة زي المستيكة كده!! و كذلك و هي طالعه !! متطلعش بليونة ! :)

لاحظ ان الموضوع ده بيختلف من نوعية مساعد للتاني،، يعني الزيت ،، بيبقى ليونته غير الزيت على هوا !! علشان لو جربتها في عربية تانية و طلع في فرق ،، أتأكد أولاً أنه نفس نوع المساعد الي في عربيتك ،، على الأقل زيه سواء زيت فقط أو زيت و هوا

تحياتي :)

**smsm_nabawy** · 02-05-2011 04:18 PM

المشاركة الأصلية كتبت بواسطة m_selim

شكرا لكل الاخوة اللي ساهموا , الاخ بيشو و الاخ الباشمهندس احمد و اخونا سمسم

أنا فعلا جربت ادوس على شنطة عربية لانسر موديل 2010 عندنا في الجراج و لقيت الشنطة بتنزل بصعوبة اكثر من عندي في العربية بس ما المقصود بان المساعد خف ؟؟؟؟؟؟ هل لزوجة الزيت بداخل المساعد تقل مع الاستخدام ؟؟؟؟؟؟ و تقريبا المساعد الكويس بيعمل كام الف كيلو لو الاستخدام هادئ و بأدخل بشويش في المطبات ؟؟؟؟؟؟؟؟؟؟؟

ميشيل سليم

العفو يا أخ ميشيل !! :) انت تأمر !!

أما بالنسبة لأن المساعد يخف ،، ده ملهوش دعوة نهائياً بلزوجة المساعد !! لزوجته ثابته ولا تقل مع الزمن ،، و لكن له دعوة بطريقة الأستخدام !!

اولاً. أقولك ليه بيخف مع الوقت !!

ده بيكون ليه دعوة بتصميم المساعد نفسه من الداخل "بغض النظر عن دور طريقة الأستخدام الهاااااام في الحفاظ على المساعد "

عامةً معظم المساعدين من الداخل بيكون في حاجة زي مصفاه بداخله كده !! الغرض منها أنه عند حدوث انضغاط في السماعد ،، الزيت بيتحرك بسبب كبس ذراع المساعد على الزيت !! مع وجود المصفاة السابق ذكرها !! الي بتعمل ممانعة لمرور الزيت فيها !!

الي بدوره بيعمل مقاومة في حركة ذراع المساعد الي بيكبس الزيت و هو نازل او طالع في المطبات مع شاسيه العربية !!

مع الةقت و كتر اخد المطبات جاامد !! الفالفات "المصفاة" دي بتوسع حلقاتها و بتبوظ ،، و مبتعرفش تمنع الزيت من الأنتقال خلالها ،، و تقاومة ،، بالتالي الزيت بيتحرك بحرية اكتر !! و بالتالي مفيش مقاومة لكبس ذراع المساعد الي بيحصل نتيجة المطبات :)

يا رب اكون عرفت أوصل لحضرتك الفكرة !!

ثانياً. المساعد ممكن يقعد قد أيه ،، دي على حسب طريقتك في التعامل مش مع المطبات و بس !! و لكن مع الوزن الي معاك في العربية !! و كذلك ،، بتفرك كتير ،، طريقة دوسك على الفراكل ،، مفاجأة ولا ؟؟ و هكذا !! :)

عامةً الأستخدام الرحيم للعربية بيحافط على كل حاجة تتخيلها او لا ،، اما كم عدد الكيلوهات !! ملوهش عدد معين !! انت من وقت للتاني ،، بتأكد على المساعد بنفسك ،، بالحركة الي حضرتك عملتها دي ،، أنك تضغط عليه ،، و تقارنه لو عايز تقارنه بعربية تانية !! :)

تحياتي :)