أعراض سدد الشكمان

**yk_5** · 01-06-2010 09:42 AM

بداية أريد أن أسجل اعجابى الشديد بهذا المنتدى الثرى وبتفاعل اعضاءه مع الموضوعات.
السيارة فولفو 940 2000 سى سى يوجد رعشه خفيفة فى السلانسية وسخونه شديدة لذيل الشكمان أحد السادة الفنيين قال ده سدد فى الشكمان ولازم يتغير لأنه ممكن يؤثر على الموتور خاصة ان العربية تربو (الصيانه تتم بشكل منتظم فى مواعيدها) أريد معرفة الآراء .
شكراً

**yk_5** · 03-06-2010 09:54 AM

يبدو انى استعملت الحبر السرى فى الكتابة

**بحري** · 03-06-2010 11:10 PM

لو الشكمان مسدود فعلا بيسخن ويعمل رعشة في العربية ولو نخروم برضه بيعمل رعشة
لكن هل المشكلة فعلا شكمان وللا لأ محتاجة واحد أمين يكشف عليها لأن ممكن يكون سببها كهرباء مش مضبوطة مثلا

**abodbaker** · 05-06-2010 12:43 AM

انا معايا كيا سيفيا 97 الشكمان كان مسدود فانفجر الشكمان ونصيحتي تغيره

**hobaz** · 05-06-2010 12:46 AM

متابع معاك..........

**yk_5** · 05-06-2010 02:10 PM

كشفت على الشكمان عند ابو اليزيد وقال لا يوجد بالشكمان اى مشكلة. وقال يمكن تكون التاكيهات محمله

**samirayad** · 05-06-2010 03:29 PM

وقال يمكن تكون التاكيهات محمله

كلام سليم

راجع على ظبط التاكيهات

**yk_5** · 13-06-2010 01:06 PM

شكراً للردود وللباشمهندس سمير عميد المنتدى
روحت امبارح ظبطت التاكيهات وفعلا كان فى 4 صبابات محملة. الصنايعى عمل اللازم وظبط الخلوص بالفيللر وقالى كده العربية مش هاتسخن وهتوفر بنزين جامد. مش عارف صحة الكلام دة أنا لسة بجرب.
بس عاوز اسأل هو ايه اللى يخلى الصبابات تحمل هو مش المفروض الخلوص يزيد نتيجة تآكل الأطباق اللى بتبقى تحت عمود الكامه؟
شكراً

**samirayad** · 13-06-2010 04:10 PM

بس عاوز اسأل هو ايه اللى يخلى الصبابات تحمل هو مش المفروض الخلوص يزيد نتيجة تآكل الأطباق اللى بتبقى تحت عمود الكامه؟

غالبا خلوص التاكيهات الميكانيكيه

يجب المراجعه عليه كل فتره زمنيه طويله

طيب ليه أنا بأقول الكلام ده

1- مسمار ضبط الخلوص من الوارد أن يحدث له تهويه قليله لصامولة الكنتره أو أستطاله للمسمار نفسه ( غير محسوسه )

وبالتالى تقفل التاكيهات ( نتيجة قلة الخلوص )

2- من الوارد أيضا مع تآكل لحمية أقراص الصبابات نتيجة تصادمها

المتكرر والسريع على قواعدها برأس السلندر ( أثناء أشواط الحريق وبحركه سريعه للغايه )

أن يحدث أرتفاع لجسم الصباباب لأعلى وبالتالى غلق أو تضيق خلوص

التاكيه قليلا

__________

المهم

دوام الحال من المحال

**yk_5** · 15-06-2010 11:14 AM

شكراً لرد سيادتك واحب اسجل انى اتعلمت كتير جدا من المنتدى ده اللى عرفته بالصدفه خاصة من موضوعات الباشمهندسين سمير عياد وخالد سبعاوى .
عاوز اسأل لما يكون فيه صباب محمل دة معناه انه مابيكونش محكم الغلق اثناء ضغط البستم لشحنة البنزين والهواء وحدوث الإحتراق ولو كان عدم احكام الغلق ده موجود من فتره طويلة ده بيعمل ترسيبات نتيجة الإحتراق على مكان غلق الصباب ؟
وهل بعد ضبط التاكيهات ونتيجة حركة الصباب (اللى كان محمل) بشكل طبيعى سيتم ازالة الشوائب المترسبه دى والصباب هيطبع تانى على الفتحة بتاعته ؟
ولو هناك ترسبات على فتحة الصباب هل دى بتتحرق طبيعى والا لازم روديه؟
ولو الصباب طبع على الفتحة بتاعته هيرتفع سنه بسيطة (مقدار الشوائب المترسبه بعد احتراقها ان شاء الله) ده هيستلزم اعادة ضبط التاكيهات مرة اخرى قريبا؟
شكراً وعذراً للإطاله