الموضوع: عندي شوية اسئلة عن السوزوكي ماروتي

سلام عليكم ..
أنا معايا ماروتى 94 .. قطع غيارها متوفرة كلها .. وتقريبا مفيش فرق بينها وبين الموديلات اللى بعدها إلا فى شكل الفانوس اللى تم تعديله تقريبا من موديل 96 أو 97 (مش متأكد بالظبط من سنة الموديل) ..
عموما قطع غيار الماروتى متوفرة لكن مش كلها أصلية فى الحقيقة .. بس يمكن الأصلية موجودة فى التوكيل .. أنا بصراحة مسألتش فى التوكيل ولا رحته قبل كده .. أنا شاريها مستعملة من حوالى سنة .. وأكتر مكان موجودة فيه قطع غيارها فى شارع أحمد حلمى من أوله من ناحية شبرا بعد موقف أحمد حلمى بشوية .. فى هناك مجموعة محلات جنب بعض كلها متخصصة فى السوزوكى بس .. ويعتبروا أرخص أسعار ..

الف شكر يا اخي علي الرد ....... بس ممكن تقولي امثلة لاسعار قطع الغيار ؟ و بتكون صناعة ايه ؟

العفو يا أخى ..
دى بعض أمثلة على قطع الغيار:
- طقم دبرياج كامل يابانى: اسطوانة 130 + ديسك 90 + بلية 25 = 245 جنيه (يوجد هندى اقل حوالى 70 جنيه)
- تيل فرامل خلفى تايوانى 80 جنيه
- زوج كبالن خارجى صينى 200 جينه - اليابانى 550 جنيه
- زوج كبالن داخلى صينى 300 - لا يوجد يابانى حاليا
- ماستر فرامل خلفى هندى 40 جنيه
- زوج مقصات أظن هندى 180 جنيه
- سلك دبرياج يابانى 40 جنيه
- أكرة باب 20 جنيه
- مراية 20 جنيه
- قاعدة فتيس تايلاندى 45 جنيه

أرجو أن أكون أفدتك ...

معلش هو ايه الفرق بين ( الكبالن الداخلي ) و( الكبالن الخارجي ) ؟
اصل انا متعود علي الفيات ان فيها كبالن ....... بس اول مرة اسمع التقسيمة دي

الحقيقة معرفش بالظبط ..
لكن هما قالولى كده لما جيت أغير الكبالن ..
قالولى الكبالن الخارجى بتطقطق فى الملفات .. أما الداخلى بتطقطق فى الطوالى ..
يعنى الكوبلن بيكون مكون من جزئين .. كل جزء ممكن تغييره لوحده ..