الموضوع: بعد اعلان قيام محافظتين جدد .... نتوقع ايه ؟؟؟

والله اللي أنا شايفه إن إنشاء المحافظتين الجدد يهدف إلى جعل القاهرة محافظة مغلقة تماماً وكذلك محافظة الجيزة ، بمعنى أن تقتصر هاتين المحافظتين على حدود غير قابلة للتوسع أو التمديد .. بينما يتم حصر المناطق القابلة للتوسع العمراني في نطاق محافظات جديدة ، وأنا أرى أن هذا سيكون بمثابة مقدمة تهدف إلى إعلان صريح لجعل القاهرة والجيزة محافظات مغلقة يتم فيها تشديد تراخيص البناء ، والهدم ، وقبول المهاجرين ضمنها ، وقصر ميزانية محافظة القاهرة على صيانة خدماتها في نطاقها الجغرافي المحدود الممتد من الظلات شمالاً حتى البساتين جنوباً ومن الزمالك غرباً حتى مدينة نصر شرقاً .
هذا وإن كان له بعد إيجابي يتمثل في تحسين خدمات محافظتي القاهرة والجيزة فإن له العديد من الآثار السلبية المتوقعة كالعادة :
أولها : إطلاق يد وزارة الإسكان والمجتمعات العمرانية في السيطرة على محافظتي حلوان وأكتوبر ، باعتبار أن أغلبها يقع تحت تصرف هيئة المجتمعات العمرانية الجديدة .
ثانيها : ارتفاع أسعار الشقق والأراضي ضمن نطاق القاهرة والجيزة بعد التشديد المتوقع في التراخيص خاصة أن القاهرة والجيزة سوف تصير محافظات مغلقة ليس لها رديف صحراوي للمشروعات المستقبلية .
ثالثها : من المتوقع ارتفاع أسعار الأراضي في المحافظتين الجديدتين نظراً لاشتمالهما على ميزانيتين تسرعان عملية التطوير والتنمية وهما ميزانية المحافظة الرسمية واعتمادات هيئة المجتمعات العمرانية الجديدة .

والتوابع لهذا القرار ستظهر تباعاً مما لا يمكن التنبؤ به حالياً .

محدثكم من على آخر الأطراف الشرقية لمحافظة القاهرة على بعد 500 متر من محافظة حلوان .
تقبلوا جميعاً خالص مودتي وتقديري

المشاركة الأصلية كتبت بواسطة casber

ياسلام على الرواقه ، محافظة جديدة
طب يقولو ايه سبب اتخاذ القرار ده
يعنى ايه الايجابيات او النفع اللى هيعود من الموضوع ده

كل اللى خايف منه انه يبقى فيه منطقه على الحدود بين المحافظتين مش معروف تبع مين وكل محافظة تنكر ان المنطقه ده تبعها ويهدر حق مواطنيها
يعنى تروح محافظة القاهرة يقلك لا انت تبع حلوان
او العكس

الامر لايتعدى ان يكون هناك زيادة فى عدد المسئولين علشان تزيد الكراسى وهملا جرة
تتصور ان اولادى منذ ان عرفوا انهم تبع محافظة حلوان قال انهم عايزين يرحوا اى سكن تبع القاهرة
طيب فيه سؤال مهم لية مصر الجديدة مع انها منطقة مش تابعة للقاهرة القديمة لم يتم نقلها الى محافظة الاسماعيلية احسن ولا السويس 00 تصرف غريب
وبعدين لو كان محافظة القاهرة كبيرة على المحافظ خلاص يعملوا للمحافظ كما هو موجود الان نائب فى كل منطقة تابعة للقاهرة وخلاص بس هية زيادة مصروفات وخلاص

نتوقع هيصة اكتر ما هي هيصة

بصراحة بصراحة مش قادرة اقتنع انهم ممكن يعملو حاجة عشان مصلحتنااا

المشاركة الأصلية كتبت بواسطة onna

بصراحة بصراحة مش قادرة اقتنع انهم ممكن يعملو حاجة عشان مصلحتنااا

لا طبعا كل شىء لمصلحتنا 000 تعتقدى كل القرارات وبيع الشركات بتراب الفلوس ولفئة معينة ونتيجة المحليات اللى تعدت 95% لمصلحتهم كل دة وبتقولى مش لمصلحتنا والله دا ظلم كبير !!!!!!!!!!!!!!
وبعدين همه اللى بيعرفوا مصلحتنا اكثر مننا

يا حلاوة ياولاد، تصدقوا ان انا اكتشفت ان انا كدة ساكن فى القاهرة وبفتح البلكونة اشوف محافظة حلون

الأنكت من كدة ان انا القهوة اللى بقعد عليها تعتبر حاليا تبع محافظة حلوان، يعنى انا علشان اروح اضرب حجر معسل اسافر من محافظة لمحافظة؟ دى مصيبة ايه دى ياخويا

طيب انا لما اكون رايح الشغل الصبح وماشى على الدايرى، على يمينى القاهرة وعلى شمالى حلوان، ابقى تبع مين، ولو رخصتى اتسحبت على الدايرى اروح اسأل عليها فى الدراسة وللا فى مرور حلوان، وللا هم هيخلو نص الطريق-بالطول- اللى بيمثل الإتجاه من مدينة نصر للمعادى تبع القاهرة والنص التانى تبع حلوان ، يعنى لو عربية عملت حادثة ودخلت فى الجزيرة اللى فى النص ياخدو المصابين اللى راكبين فى الشمال على مستشفى المعادى العسكرى واللى راكبين فى اليمين ياخدوهم على مستشفى الجلاء

والله دى حاجة تلخبط