الموضوع: استفسار لملاك الشارك

بالنسبه لشارك متقلقش عاليه و مش بتحك و صالونها واسع انما شنطتها ضيقه شويه 330 لتر تقريبا تقدر تقول وسط عفشه و ثبات و اداء محترمه متقلقش مواصفاتها فيها باور كهرباء و مرايات تعتيم ذاتيه و صوت كاسيت بيعلى مع سرعه سيارة و مواضفات شارك توكيل 2009 ايه
- كاملة سبورت

o فتيس أوتوماتيك
o تكييف اوتوماتيك
o باور ستيرنج
o راديو سي دي تشنجر (6 سيديهات) واريال سقف و6 سماعات
o زجاج كهرباء ومرايات كهرباء
o سنتر لوك مع ريموت كنترول
o ايموبيليزر (مانع للسرقة)
o فرامل ABS و EBD
o اتنين ايرباج للسائق والراكب الأمامي
o لمبات شبورة
o غطاء محرك
o جنوط اسبور
o انذار سرقة
o نظام مانع للضوضاء
o اعتاب امامية وجانبية
o دركسيون مالتي فانكشن به مفاتيح الصوت
o دركسيون جلد
o نظام تشغيل المحرك بدون مفتاح (بصمة)
o فتحة سقف
o سبويلر خلفي
o زجاج فيميه خلفي وابواب خلفية مثبت على الرخصة
o حساس ضوء ومطر
o تبريد في صندوق القفازات
o السعر 128000 جنيه

و لو عايز عربيه منافسه

فكر فى رينو فلوينس و مازدا 3 شكل جديد و دول ممكن يبقى فئه تانيه اتوماتيك و فى نيو سيراتو كامله بس خلى جنط 16 علشان 17 ناشف و بيطلع فيه بالونه فى شوارعنا جميله
انا اخترتلك عربيات دى علشان من رأى شخصى و ذوقى انهم يتمتعوا بكماليات محترمه و اداء و ثبات و سعر معقول

و مش هتكلم على مميزات و عيوب كل عربيه لأنى رجع من شغل مرهق لكن باحتصار
لو اخذت شارك او فلوينس او مازدا او سيراتو كامله

دى عربيات محترمه و كمالياتها حلوة و اداء مرضى جدا

شارك يابانى 100% موتور 1500 اقتصادى فى بنزين و اداؤة فى باور هورس و عزم قريب من فلوينس و مازدا عيوبها قطع غيار عاليه خصوصا فى فلتر بنزين و صوت موتور رياضى عالى او مسموه و شنطه متوسطه حجم

فلوينس عربيه جميله و تصميم رائع و كامليات حلوة عيوب نتشه خفيفه فى نقل فتيس الى تانى و ليس محسوس و بردوا قطع غيار غاليه سنه و يجب عند تزود ببنزين تطفى عربيه علشان قراءة عداد متبقاش خطأ

مازدا 3 يابانى 100% و عفشه و ثبات و هاندلينج رائعه ومشكلتها فى قطع غيار و كنبه خلفيه ضيقه نسبيا و ارتفاعها بقى معقول لكنى لما اجربها و هى محمله مع مطب عالى

سيراتو كامله جميله بس بلاش جنط 17 و املى كاوتش نيتروجين علشان عفشه ناشفه و فى ناس بتقول ان موتور على سرعات عاليه بيكون كسول شويه

انا عن نفسى بحب شارك و نفسى اجبها لكن لما ربنا يسهل مش دلوقتى انا مكتفى بالبومه لحد ما اجهز شقه ههههههههههههههههههه

شوف كماليات كل سيارة وروح معرض و اقعد فى كل واحدة وصدقنى هتعرف مين اكتر واحدة تناسبك و تناسب احتياجاتك
انا عملت كده و انا بشتر لانسر بومه و كان ايامها سيراتو شكل قديم و اوبترا و نيسان صنى و بروتون جين2 و كنت محتار ما بينهم روحت معرض و قعدت فى كل عربيه لكن بصراحه ارتحت فى بومه فجبتها على طول و مش ندمان خالص الحمد لله لأنى جبتها بعد اقتناع و بحث فى عربيات اللى كانت موجوده فى سوق وقتها
اتمنى انى اكون ساعدتك و لو بقليل و لو فى استفسارات انا تحت امرك

المشاركة الأصلية كتبت بواسطة basemsaeed

استاذ باسم بجد رد رائع
مفيش بعد كده
زي ما الاستاذ باسم قالك,,الشارك فعلا عربية محترمة و واسعة في الصالون و عالية عن الارض
بس شنطتها صغيرة شوية و تقريبا 380 لتر
و زي ما الاستاذ باسم قال على البدائل و كلهم كويسين ما عدا(في رائي انا)السيراتو
المازدا حلوة و محترمة,,بس عيبها الصالون ضيق ورا و قطع غيارها غالية شوية
اما الفلونس فأنا معرفش فيها اوي الصراحة
بس بالنسبة لفئتها اول فئة ب120 الف ناقل مانيوال
و تاني فئة ب130 الف ناقل اتوماتيك
و تالت فئة ب 140 الف
و رابع فئة ب 150 الف و الهاي لاين ب 167 الف
و زي ما قال لحضرتك الاستاذ باسم,,حضرتك روح و شوف العربيات بنفسك و شوف حترتاح لاني واحدة فيهم
لان الراحة النفسية عامل مهم
و اخيرا صلي استخارة و اللي فيه الخير يقدمهولك ربنا ان شاء الله

و الله يا استاذ باسم انت انسان محترم ردك على مشاركتى و الله اسعدنى و انا بعتبر ناس فى منتدى اخواتى فبحاول اساعدهم على قد ما اقدر و يارب صاحب موضوع يعمل استخارة و يأخذ وقتوا بس مينساش يفرحنا هو جاب ايه

المشاركة الأصلية كتبت بواسطة hesham_one

ياتري ايه رأيكو في الشارك انا بسال عن التوب لاين
و ايه امكانياته و ارتفاع العربيه عن الارض كويس و لا لا يعني لو فيها خمسه راكبين تحك في المطبات

و ايه اخبار قطع الغيار و التوكيل

معلش انا محتار جدا و لو مش الشارك ترشحولي ايه انا كنت بفكر في الكروز

انا عاوز عربيه في حدود 145000 ممكن اجيب ايه

يا ريت النصيحه لاني محتار جدا

وشكرا

الشارك عربية ممتازة جدا و مريحة وصالون واسع وارتفاعها عن الارض ميخليهاش تحك في المطبات خالص حتى لو فيها خمسة وفي نفس الوقت مع الارتفاع ثباتها عالي جدا وعفشة مش ناشفة ومش طرية لاكنها مريحة

قطع غيارها غالية شوية لاكن موجودة في التوكيل

لو عربية تقارنها بالشارك الهوندا سيقيك او السوبارو امبريزا او المازدا 3 بس في رأيي احسنهم الشارك وبعدين السيفيك

انا عن نفسي بنصحك بالشارك لان محدش عارف قيمة العربية دي الا اللي جربها بس وانا في رأيي احسن عربيةفي فئتها

انشاء الله بالتوفيق لحضرتك وانشاء الله تجيب العربية اللي نفسك فيها

والله يا جماعه شكرا جدا لكل المحترمي الردوا و للاستاذ باسم خصوصا تعبتك معايا و اسف اني مردتش بسرعه لاني مبدخلش كتير و ادعولي ربنا يكرمني و يوفقني للاختيار الصواب اللي ارتاحلة بعد كده الف شكر يا جماعه

المشاركة الأصلية كتبت بواسطة basemsaeed

حضرتك اللي محترم و ذوق والله
و فعلا ردك والله رائع و مفصل و عجبني بجد
و طبعا حضرتك زي اخويا ,,بش كفاية اسمك زي اسمي
و بعتبر بقية الاعضاء اخواتي في الله
و جزاك الله خير على مساعدتك للاعضاء
و عموما العضو صاحب الموضوع لو حب انزل معاه و نبص على العربيات ,انا معنديش مانع
و انا تحت امرك يا استاذ باسم في اي وقت

و تقبل مروري

الف شكر يا استاذ باسم علي عرضك يا ريت و الله لو حضرتك فاضي ده لو مش هاعطل حضرتك
وبجد ماشاء الله علي المنتدي كله ناس محترمة ربنا يجازيكوا عني كل خير