الموضوع: تعالوا ندلع الفيرنا

السلام عليكم

انا عملت شوية تظبيطات بايدي في الفيرنا بتاعتي و ممكن اي حد يعملها و اكيد حتدي شوية تغيير للعربية

اول حاجة قولت لازم اغير نور العدادات

اول خطوة حنفك العلبة الفيبر اللي ورا الدريكسيون و هي عبارة عن 3 مسامير زي ما موضح في الصورة

بعد اما نفك المسامير حتبقي عبارة عن جزئين نفكهم عن بعض بايدك لأنهم متركبيين علي بعض عن طريق كلبسات (الموضوع سهل جدا )

تاني حاجة حنفك الفيبرة اللي علي العداد اللي لونها اسود و هي عبارة عن مسمارين... مربوطين فيها فوق زي ما موضح في الصورة و انا مشاور فيها علي المسامير

بعد اما فكينا المسامير نمسك الفيبرة ديه من تحت و نشدها واحدة واحدة عشان فيها كلبسين من تحت و حتلاقيها طلعت معاك

كدة حتلاقي العداد في وشك علي طول مربوط ب 4 مسامير.... في كل ركن مسمار زي ما موضح في الصورة

شد العداد بقي حتلاقيه طالع في ايديك

حتلاقي بقي في ظهر العداد فيشتين واحدة صغيرة و واحدة كبيرة ...شدهم و اخلعهم ...هما رخمين شوية بس شدهم و متخافش و زي ما موضح في الصورة

كدة يبقي طلعنا العداد برة خالص و كدة يبقي مش فاضل غير السهل
حناخد العداد معانا البيت فوق ........

و حنلاقي ان الفيبرة الشفافة اللي علي العداد فيها كلبسات علي الاطراف زي اللي في الصورة

حنزق الكلبسات ديه و نطلع الفيبرة الشفافة زي ما موضح في الصورة

حنلاقي فيبرة تانية ورا الفيبرة الشفافة لونها اسود اللي هي في الصور لونها احمرو ليها كلبسات بردو زي الفيبرة الشفافة زي ما موضح في الصورة

بردو حنزق الكلبسات و نشيل الفيبرة ديه زي ما موضح في الصورة

كده حيبقي قدامنا العداد و المؤشرات
حنفك المؤشرات ديه واحدة واحدة عشان نعرف نشيل ورقة العدادات
حنجيب مفكين او اي ألتين زي مفك و قطر زي ما انا جايب في الصورة و نفكهم بالطريقة ديه ...حيتنطروا لبرة

نروح شايلين الورقة من العداد زي ما انا موضح في الصورة

كد بقي نبدأ نلعب

حنجيب اي برفيوم او كولونيا ...و بحتة قماشة نمسح الطبقة الخضراء اللي في ظهر العداد (هي ديه الطبقة اللي بتعمل النور الاخضر اللي في العدادات )

و بعد اما تخلص تجيب بكرتين شريط لحام لون او لونين اللي انت عايز تخليه نور العداد يعني مثلا احمر و ازرق
و تبدأ تحط شريط اللحام ده علي اماكن الشرط و الارقام علي ظهر العداد...زي ما انا موضح في الصورة

و كده يبقي خلصنا

مش فاضل غير اللوحة الديجيتال اللي فيها ال كيلومتر...و ديه اضاءتها صفرا

حنروح لأي حد بتاع كماليات و نجيب استيكر احمر اللي بيتلزق علي الفوانيس..... عشان نخليها تبقي كلها احمر و طبعا في منه الوان كتيير

و نروح لزقنها علي الشاشة زي ما انا موضح في الصورة

كده خلاص كل حاجة خلصت

نبدأ بقي نركب كل حاجة زي ما فكيناها
و ناخد بالنا و احنا بنركب المؤشرات تاني..... واحدة واحدة و نظبطهم كلهم علي الصفر بتاعهم

و كده يبقي خلصنا و تبقي الصورة النهائية كده

بكرة ان شاء الله حكتبلكوا تقرير في نفس الموضوع علي تركيب ال RPM السبورت

و بعدها طريق فك و رش التابلوة

و بعدها تركيب شرايط ليدات في الابواب

أحسن حاجة لفك المؤشر على ما اعتقد...شوكة الطعام وبالراحة خالص وتسندها على منديل او حتة قطن