الموضوع: حصريا ً لصقور نيسان جهاز انذار يتصل بيك في حالة السرقة "Call Car"

معلومات اضافية منقولة من مشاركة احد الاعضاء باحد المواضيع بقسم كيا:

المشاركة الأصلية كتبت بواسطة mcmemam

أنا هقولك رأيي الشخصي فالموضوع ده
العربيه من غير إيموبلايزر ممكن تتسرق من أى حد. الفكره إنه بعد ميطلع عليه هيبقا عاوز يعرف إنت ساكن فين ويروحلك ياخد العربيه ويمشى بسهوله. اكيد كيا مشغله واد حرامي بيطلع عالمفاتيح وبكره يترقى ويشتغل فالفطيم :)
الفكره إن لو العربيه هتاخد أكتر من 5 دقايق هيسيبها ويمشى والحل إنك تحط كلبش الديكسيون وتركب عن أي كهربائي مفتاح يفصل طلمبة البنزين. تفصله أول ماتركن.
أنا مركب جهاز فى عربيتى بيفصلها بالموبايل بتاعى أو موبيل مراتي بس مكلف شويه ب 1200. إنت ممكن تعمل المفتاح ده ب 50 جنيه.
لو حد وقفنى وأخد العربيه هعرف أوقفها بعدها يإما بموبايلي أو موبايل مراتي أو موبايل أخويا
الإيموبلايزر مهم بس لو الحرامي وقفك عالطريق هيخدها برده


موصفات الجهاز:
- لو حد خبط العربيه بتتصل بك مره واحده. يعنى لو حد بيلعب فى العربيه هتلاقيها كل شويه بتتصل بشكل متقطع.
- لو باب إتفتح وأنت قافلها بالموبايل بتتصل بيك 6 مرات ورا بعض حتى لو إتفتح بمفتاحك. كل أما بتكنسل عليها بتتصل تاني. وده معناه إن حد دخل جوه العربيه.
- لو إنت إتصلت عليها وتسمع 3 رنات وتقفل الجهاز بيفصل طرمبة البنزين ويقفل الأبواب وبالتالى محدش يعرف يدورها حتى لو معاه مفتاحك شخصيا.
- لو إتصلت عليها رنه وتقفل مرتيين الجهاز بيوصل طرمبة البنزين ويفتح الأبواب.


عيوب الجهاز:
مزعج شويه - لو قطه بتلعب تحت العربيه هتلائي العربيه بتتصل عليك ولو البواب بيمسح العربيه الساعه سته الصبح هتلاقيها بتتصل عليك :)

ميزه جامده فى الجهاز:
ممكن تسجل عليه نمر تليفونات زى مأنت عاوز. والجهاز بيستجيب بس للنمر المسجله عليه.
يعنى حتى لو حد ثبتك وخد العربيه وموبايلك ممكن تكلم أخوك أو مراتك تتصل عالجهاز فتوقف العربيه.
الميزه التانيه إن الشركه إليي بتركبه متعاقده مع فودافون وممكن بمحضر منك الشركه تعرفلك مكان العربيه.

بديل الجهاز: ممكن تعمل مفتاح لفصل طرمية البنزين بس يكون مستخبي فى أى حته فى العربيه وهيكلفك 50 جنيه. بس لو حد ثبتك عالطريق وخد العربيه مش هتعرف تجيبها تاني.
الجهاز بيتباع بره وممكن إنت تركبه بس معرفش تمنه كام. الفكره إن ده أحسن عشان الشركه بتجبلك مكان العربيه في يومين بالكتير لكن الجهاز إليي بيركب هتعمل إنت كل حاجه.

أنا مركبه عند مينا مقار "من عيلة مقار بتاع المرسيدس" فى المعادي وليه فرع فى مدينة نصر.
فرع المعادي أول شارع الزهراء بجوار داماس
رقم تليفونه 0122104462 - 01091555654 بس يريت إليي يكلمه يقوله أنا من طرف مصطفى بتاع السيراتو الفيراني :) وبالتوفيق