هل يوجد حل لمشكلة ضيق الكنبة الخلفية للصنى

**khaled_afandy** · 12-12-2011 08:51 AM

تحياتى الى جميع النيسانويةأنا بقى لى حوالى سنة بأدرس قرار الشراء و أستقريت تقريبا على الصنى بعد دراسة الكارينز و السيراتو و الجيتا و الأوكتافيا و الكورولا و السيمبول و غيرهم، طبعا السعر متفاوت جدا بينهم و من فئات مختلفة، بس كان يهمنى الحصول على قيمة جيدة مقابل ما أدفعه ووجدت أن الصنى هى الأفضل، و ممكن ألخص مشكلتى معها فى التقفيل المصرى و ضيق الكنبة الخلفية.

الحقيقة رحت جربت الجلوس فيها و فعلا رغم أنى غير طويل القامة الإ أنى وجدت انه يجب تحريك الكرسى للأمام بشدة و تصبح رجلى مثنية لإتاحة مساحة للراكب الخلفى للجلوس، بصراحة مش عارف إزاى تبقى الشاهين و هى سيارتى الحالية أوسع منها داخليا رغم أنها أقصر 20 سم من الصنى.

طبعا كل مشكلة و لها حل، و المشكلة هنا هى طول مقعد الكنبة زيادة عن اللزوم و أيضا الظهر مائل مما تسبب فى هذا الضيق. فهل توصل أحد لحل هذة المشكلة مع العلم بأنى بحثت بما فيه الكفاية فى المنتدى ووجدت الشكوى المؤكدة و لم أجد حلول، ياريت حد يفيدنى فى هذا الموضوع علشان الشاهين خلاص فوتت تماما بعد خدمة شاقة حقيقى

**ShekeeS** · 12-12-2011 09:07 AM

زى ما حضرتك قارنت بين عربيات اعلى منه فى السعر واكيد وجدت فى كل عربيه عيب ما
يعنى مفيش عربيه هتكون خاليه من الملاحظات
انا معايا صنى 2002 الشكل القديم تقفيل يبانانى ومش شايف ان فى مشكله فى ضيق الكنبه
يعنى دة مش مشكله عامه = مشكله خاصه لاصحاب الطول

**Land_Cruiser** · 12-12-2011 09:12 AM

بص هو حضرتك هو اللى انا اعرفه ان ضيق الكنبه ده كان علشان يكبروا مساحه شنطه العربيه علشان تبقى مفيده للاسره و أنا خدت باللى من الحكايه دى و أنا باشترى لكن الشنطه بالنسبه لى كانت اهم و كمان العربيه عمليه و كويسه كمجمل و بعد شويه اتعودت علي حجم الكنبه و اكيد مش هتلاقى جميع امميزات فى عربيه واحده أيا كانت و المهم فى الاخر محصله المزايا امام العيوب و بالتوفيق

**AbuHusam** · 12-12-2011 10:56 AM

[justify]الحل الوحيد للمشكلة دي إن يتم تعديل الكنبة الخلفية بحيث تبقى أرفع شوية.. وده معناه أولاً تصنيع كنبة من جديد لأن الأصلية بالتأكيد هاتبوظ لو تم قص جزء منها.. وثانياً المسافة مش هاتزيد عن 5-10 سم وإلا الكنبة هاتبقى رفيعة قوي مش مريحة..
الخلاصة إن دي مسألة معروفة في الصني واللي بيشتريها بيقبلها كدة مقابل الميزات الكتير اللي فيها.. الثبات على السرعات.. الاعتمادية العالية.. الشكل الخارجي الانسيابي.. الموتور الجبار.. وغيره..[/justify]

**SonaSteel** · 12-12-2011 11:47 AM

اللي لا حظته لما بيشوي عمل الفرش عند جينز كار
الفرش جلد ....... ان الكنبة اتلمت مع الجلد جامد وممكن تشوف الارضية بوضوح
ان شاء الله يوم المقابلة نبقي نقيس المسافة للصني بتاعتي مثلا والصني بتاع بيشو
انا حاسس انها فرقت جامد
حد يفكرني بس :))

**Dr'AhmZZong** · 12-12-2011 07:52 PM

ممكن لو مضيقك قوي الموضوع ده .. ممكن تروح عند سروجي محترم زي جينز كار .. هيظبطلك الكنبة على الآخِر .. ولو عيزه يقصها هيقصها و يقفلهالك حلو قوي ما شاء الله ..

**Amr2004IBM** · 12-12-2011 10:38 PM

اخى الكريم
انا لما كنت بشتر الصنى كنت عارف العيب ده بس انا تجاوزت المشكله دي بان جبت زوجتى واختى قعتهم ورا واعدت ادام اظبط الاوضاع للامام و الخلف والميول للظهر للامام والخلف لحد ما وصلت لاوسط الامور وافضل وضع يريح الجميع وعلمته وحفظته ولما ببقى مسافر ومعايا الاسره بظبطه على الوضع ده ولما ببقى لوحدى او انا وزوجتى بنفرد ونرحرح زى محنا عوزين
وفى الاول وفى الاخر المساله دى مسالت تعود
ونصيحه متتعودش جسمك انك ترجع الكرسى ورا اوى تعالى على نفسك سنه صغيره ومترحرحش اوى هتلقى الموضوع بقى مقبول علشان لما تبقى العربيه كومبليت ديق الكرسى شويه علشان متحسش بفرق كبير وتدايق
2- انا متفق مع راى الصقور انك تروح لسروجى كويس يظبطلك الفرش شويه , ممكن تحس بفرق شويه بس احسن من مافيش
لكن ده عيب مش هتحس بيه لما تشوف مميزات العربيه الجباره دى
وربنا يوفقك

**Youssef.Awad** · 13-12-2011 02:58 AM

اهلا بيك يا استاذ خالد
اذا كنت حضرتك قعدت سنة تفكر بين الصنى وغيرها
ربنا يستر بقى والتنفيذ ما ياخدش سنة تانية
وبالنسبة للكنبة لو هاتضايقك اوى كده قدامك حل من اتنين
1- التعامل مع الكنبة اللى فى العربية عند اى سروجى او اختيار فرش مناسب زى جينزكار مثلا
2- استبدال الكنبة نفسها بواحدة جديدة (فوم foam) برضه من عند موبيكا مثلا لتصنيع الكراسى واكبر مورد لفرش العربيات المجمعة محليا او انتظر لمعرض فورميلا الشهر الجاى بيبقى فيه عارضين غير موبيكا فى قسم الصناعات المغذية والمكملة للسيارات ممكن يفيدوك اكتر