السلاموا عليكم ورحمة الله:
من باب تناقل الخبرات .. حصل معايا موقف قلت احكهلكم يمكن حد يستفيد منه .. كنت راجع من السفر يوم الاحد اللي فات .. واول لما خرجت من اسماعيلية نورت لمبة ال epc واداني engine fault workshop المهم وقفت وطفيت العربية لاني اعتقدت ان الكمبيوتر مهنج .. ودورت تاني راحت العلامة .. ومشيت شوية وبعد 10 كم نورت تاني ..
بصراحة خفت اقف تاني من ناحية خفت من الطريق وخصوصا ان معايا العيال ولاني كنت بالليل.. ومن ناحية تانية خفت العربية مترضاش تدور تاني.
المهم اتكلت على الله وقلت ربنا يستر واكمل على خير .. كلمت واحد صديق عزيز عليا في التوكيل قالي هي حاجة في الكهرباء .. ومتقلقش ان شاء الله توصل بالسلامة.
العربية بدأت ميبقاش فيها سحب يعني علشان تجيب السرعة وليكن 100 مثلا بتاخد وقت كبير قوي .. يعني مفيش تسارع .. وكمان لما بشيل رجلى من على البنزين وبحطها تاني تحس ان الموتور بيترج .. فاعتقدت انه واحد من البوجيهات قطع او السلك بتاعة حصل فية حاجة.
قلت طيب اشغل مثبت السرعة والعربية تظبط نفسها بنفسها .. جيت اشغلة مرضيش يشتغل والنور بتاعة اللي في التابلوة طفي .. قلت حلو لليتنا فل ان شاء الله .. طبعا ان فضلت ماشي وعمال ادعي ربنا يسترها.
الحمد لله العربية وصلتنا البيت في القاهرة .. ولما وقفت قدام البيت لقيت وشيلت رجلى من على الدواسات .. لقيت العربية بتعلى وتوطي لوحديها .. كانها بتحاول تظبت نفسها .. والله صعبت عليا سعتها .. كان واحد مريض بيحاول ياخد نفس بالعافية .. طبعا اتصلت بريسي واخدت اجازة تاني يوم من الشغل وانا في منتهي الاحراج محنا خارجين من اجازة حلوة تلت ايام جمعة وسبت وحد.
الصبح بقي رحت واخد العربية ورايح على غمرة .. المهندسة ليديا هي اللي استقبلتني حكتلها القصة لقيتها بتكمل معايا الكلام كانها عارفة الحالة بالظبط .. قلتلها دانتي عارفة المشكلة بقي هي بتتكرر ولا اية قالتلي لا .. بس كل الاعراض دية بتحصل مع بعضيها هو غالبا دا بلف الخنق بتاع دخول الهواء على غرفة الاحتراق .. بس قلتلي احنا هنحطها على الجهاز ونشوف فيها اية بالظبط.
المهم اخدوا مني العربية الساعة 9 صباحا واستلمتها الساعة 1.30 ظهرا .. يعني اربع ساعات ونصف ..
وكل شوية انزل اتابع واسال المهندسة .. المهم استملت العربية وطلع فيها الاتي:
- اولا الفيشة بتاعت بلف الخنق throat valve دة باظت .. فغيروها
- ثانيا السوفت وير طلع مهنج ودا اللي خلى مثبت السرعة ميش شغال .. فعملولة up date .
طبعا الحمد لله ان العربية لسه في الضمان (فضلها 10 ايام) .. فبالتالي مخدوش مني فلوس.
- سالتها طيب هي طبيعي انها تبوظ .. قالتلي لا بس هي في نسبة طبعا عيوب صناعة ودا وارد ودا بيغطية الضمان.
ربنا يتر بقي الضمان اخرة الاسبوع اللي جاي .. ربنا ميجبش مشاكل بقي ان شاء الله .. ويحفظنا ويحفظكم من كل سوء .. امين
دا من باب نقل الاخبرة وتعميم الاستفادة .. سلام بقي
المفضلات