الموضوع: استفسار بخصوص السفر الي المانيا

المشاركة الأصلية كتبت بواسطة maserati

السلام عليكم و رحمة الله و بركاته

بالنسبة للسفر الى ألمانيا, فده طبعا حاجة جميلة جدا و ممتازة, بس محتاج تأشيرة, اذا ربنا أكرمك و أخدتها عالباسبور, يبقى -ان شاء الله- اعتبر نفسك سافرت, لأن هى العقبة الوحيدة فى كوووووووووووووووول الموضوع.

اللى أنا أتذكره لما كنت سافرت سويسرا مرتين و أنا طبيب امتياز, كانت الأولى فى 4-2001 و ساعتها كنت و أنا رايح مجهز معايا الباسبور و الصور و خطاب من العمل بيقول أنى طبيب امتياز و خطاب من البنك, كان بحوالى 60000 جنيه و المرة التانية كانت فى 1-2002, و ساعتها أخدت نفس الورق كوووووووووووووله, بس خطاب البنك كان أحدث و كان بحوالى 110000جنيه, و الحمد لله, أخدت الـتأشيرة من أول مرة.

طبعا بالنسبة للسفر فى الصيف بيبقى أغلى فى سعر التذكرة و أسعار الفنادق فى أوروبا عموما بنسبة 30% تقريبا عن السفر فى الشتا, يعنى السفر فى شهرى 6 و لا 7 , بيبقى أغلى من السفر فى شهر 3 و لا 4 , بس زى ماقلتلك, التأشيرة هى الأهم, خدها الأول و ابقى اسأل على الباقى براحتك.

و ربنا ييسرلك الأمور ان شاء الله و ابقى طمنا عملت ايه.

هو أنت متخرج و لا لسه طالب و ليك جيش و لا لأ؟؟؟

بالتوفيق.

اولا الف شكر لرد حضرتك ,, وانا مهندس كهرباء وواخد اعفاء من الجيش وان شاء الله ناوي اسافر اخر اخر 6 واول 7 واحتمال اقعد 10 ايام -اسبوعين ان شاء الله
بس بالنسبه للتأشيره دي ايه اجراءتها بالظبط؟؟؟

المشاركة الأصلية كتبت بواسطة ehab_mansour

السلام عليكم
ياريت تشوف الموقع ده وهتجد فيه كل شيء ان شاء الله
بوابة السفر إلى المانيا germany
وانا كنت في ايطاليا نوفمبر الماضي ولكن الشركة اللي احنا وكيل لها هي اللي كانت متكفلة لكل شيء
المهم ان اهم شيء في الموضوع زي ما قال الأخ السابق هو استخراج الفيزا وده بيتطلب منك تتصل بالسفارة الألمانية عشان يحددولك ميعاد للمقابلة ووقتها هيقلولك ايه الأوراق المطلوبة بالضبط
ومن ضمن هذه الأوراق واهم شيء فيها هو حساب بنكي لأخر ست شهور لحسابك البنكي بالاضافة الي دعوة من أحد معروف في ألمانيا والباقي سهل
انا تقريبا فاكر ان تكلفة استخراج التأشيرة كانت تقريبا في حدود 1000 جنيه أو أقل وتذكرة السفر طيران علي الخطوط الايطالية ذهاب وعوده ب 5500 ولكن مصر للطيران أغلي من كده وده كان لفترة 11 يوم
تكلفة الفندق اللي كنت فيه هناك تقريبا ممكن تقول 100 يورو في اليوم شامل أكلك كمان لكن عشان كل ده مكنش ليا يد فيه وكانت الشركة هيا اللي بتدفع وهيا اللي حاجزة كل شيء فكبرت دماغي ولكن ممكن التكاليف تقل عن كده كتير و أعتقد الموقع اللي وضعتهولك هيبينلك كل حاجه ان شاء الله

ونسيت أقلك كمان ان التأشيرة الي هتطلعلك دي تأشيرة اتحاد اوروبي(شنجن) يعني عادي جدا تتنقل في كل دول الأتحاد دون ادني مشكلة ودي تقريبا كل دول اوروبا ما عدا بريطانيا و السويد تقريبا مش فاكر دور شوف وممكن تعمل جولة في اوروبا كلها

وربنا يوفقك للخير ولما يحبه ويرضاه

شكرا لرد حضرتك و بس الحساب البنكي ده يشترط انه يكون في مبلغ معين في البنك ولا مثلا الحساب اللي بيتحول عليه المرتب بتاعي ؟ وبالنسبه للدعوه دي ممكن تتبعتلي ازاي انا فعلا اعرف ناس هناك

المشاركة الأصلية كتبت بواسطة ahmedsamir5edr

و هنا ممكن تاخد فكره عن أسعار تذاكر مصر للطيران egyptair - welcome to egyptair website

شكرا لردك,,, هوه اللي شفته تقريبا هايبقي سعر الطيران ذهاب وعوده حوالي 3500 4000 ج

المشاركة الأصلية كتبت بواسطة a_h_m_a_d

انا سافرت المانيا مرتين من غير ماعرف السفارة الالمانية موجوده فين ولا شوفتها !!!!

بس ده بسبب اني شغال في شركة المانية الاصل

التذكرة سعرها كان 3500 جنيه الكلام ده في 2009 ذهاب و عودة , طبعا دلوقتي اكيد الاسعار زادت

هناك بقى عليك و على المطاعم التركي , هاتلاقى عندهم اكل قريب قوي من اكلنا و اهم حاجه حلال

وعلى فكرة أسعار الاكل هناك رخيصة جدا , والسوبر ماركت هاتعيش حياتك بأرخص بكتير من اللي بتدفعه هنا

هاتشوف نضافة و نظام و خضرة و جمال عمرك ماشوفتهم في حياتك ,

ده طبعا هايسببلك حالة من الصدمة عند رجوعك مصر هاتفضل معاك فترة لحين التعود مرة أخرى على الطبيعة المصرية الاصيلة

بالتوفيق ان شاء الله

لأ يا باشا شفتهم والله قبل كده انا اصلا عشت في المانيا 4 سنوات بس كان عندي 10 سنوات فاكر كل حاجه
وفاكر طبعا اني جاتلي صدمه اول مانزلت من علي الطياره بس للاسف طبعا مش فاكر الاجراءات خالص علشان تقريبا عدت 16 سنه لحد دلوقتي وماسفرتش من ساعتها ,, بالنسبه لسعر الطيران انا دخلت علي مصر للطيران ولقيته حوالي 3500-4000ج اعتقد مازدشي اوي برده ولا ايه؟

المشاركة الأصلية كتبت بواسطة ahmedbatoos

1- اقناع السفارة ان هناك ما يربطك في مصر وانك ذاهب لامنيا لشئ قوي ومحدد
2-اثبات انك تمتلك عمل بيجيب اجر متوسط لكبير
3-كاش مني في البنك في حساب جاري وليست حاسبات ودائع او غيرة


وربنا يقويك . . . لو عايز معلومات انا ممكن اقول علي قد علمي

بس السبب ده ممكن يكون اني هاقضي اجازه وراجع؟؟؟
وبالنيبه للحساب اللي في البنك ده ممكن الحساب اللي بيحول عليه المرتب ولا لازم يكون فيه رقم معين ؟؟
وشكرا لرد حضرتك

المشاركة الأصلية كتبت بواسطة vinosse

انا فى سويسرا واسكندرانى لو جاى سويسرا ممكن اظبطك
واى خدمة

ربنا يخليك يا باشا بس دي السفريه اللي جايه بي ان شاء الله