السلام عليكم يا شباب الصوت الجامد
زمان كان الجيران بيطلبوا البوليس عشان الصوت اللى خارج من الاوضة عندي وهما مش عارفين يناموا . كنت حاطط في كل ركن صندوق فيه سماعتين وجايب ايكولايزر وجي ام وترانس عشان الفولت وموصل الكاسيت على التلفزيون على الدش وكنت عايش في الاوضة بتاعتي ملك .
شوية شوية دخلت في دوامة الحياة واتجوزت ونسيت الكلام ده خالص لكن اي دقة بيز بتعدى من جنبي بحس اني اتلوحت عليها . بدخل كارفور او حاجة من الهيبرات دي اول حاجة بروح عليها قسم الهاي فاي .
عشان ماطلوش عليكم كنت من يومين في بي تك اللى مكرم عبيد لقيت وراه فرع outlet للاجهزة المنزلية المخبوطة او الكرتونة بتاعتها بايظة او محكوكة وبتتباع بسعر اقل شوية من السعر الاصلي .
اول لما دخلت عيني طارت على حلة لونها احمر . الحلة دي هي صب ووفر سونى اكسبلود 12 سم 1300 وات . طبعا سيبت مراتي وروحت تلقائيا على الصب لقيته بسعر 222 جنيه وجنبيه حلتين كمان بس الرق بتاعهم اسود . سالت الراجل قالي انهم كانوا مسروقين من فرع شبرا ساعة الثورة ( الفرع كله اتقلب ) والناس اللى مسكوا الحرامية رجعوا الحاجات دي من غير كراتين . قعدت 3ايام مش عارف افكر غير في الصب ده .
النهاردة نزلت خلصت الموضوع ونهيت التفكير وجبت الصب ووسعت العملية وروحت جايب الاتي :
1- صب سونى اكسبلود 1300 تايلاندي
2- جي ام سيمفوني 500 وات 4 تشانيل
3- سماعتين كينوود 400 وات
4- كاسيت بايونير ( وده اكتر حاجة جبتها مكيفاني )

انا ركبت الكاسيت بس حاليا عشان كان التركيب مجانا , وبصراحة اتوهمت .
لسة عايز اعمل رف خلفي واركب فيه السماعتين ومش عارف بقى اركب الصب في بازوكا ولا صندوق ولا على الرف بين السماعتين ؟؟؟؟؟؟
وكمان مش عارف اركب عند مين في مدينة نصر او مصر الجديدة ؟؟؟؟؟
دي الصور بتاعة العدة الجديدة وهابقى احكيلكوا على الكاسيت شوية