بسم الله الرحمن الرحيم:-
انا هشارك بمشاركة أتمنى تكون مفيدة للجميع:-
قبل ما تشغل العربية اتعود انك تربط الحزام حتى لو هتطلع بالعربية منلا جراج وهتنزل تاني ولكن خليها عادة عشان متنساهاش ابدا

استخدم اشاراتك دايما قبل تغيير الحارة الخاصة بيك

اهتم بالغير لأن دا من أصول اهتمامك بالقيادة

انت متحكم مش في عربيتك بس ولكن انت متحكم في سبع سيارات خلينا نعدم مع بعض:-
عربيتك ادي واحد و3 عربيات وراك بصورة افقية وعربيتين جنبيك اليمين والشمال والعربية اللي قدامك كمان
لغة الاشارات لغة مهمة جدا مع كل دول:-
لو انت ماشي على طريق فردي رايح جاي واللي وراك عايز يعدي بس انت شايف انه مش هينفع يعدي بكل هدوء اديله اشارة شمال هتلاقيه هينتظر ومش هيعدي ولو هينفع انه يعدي اديله اشارة يمين وافتح ليه الطريق وزي ما هتعمل هتلاقي اللي هيعمل معاك وغيره طبعا

لنفترض انك على طريق سريع:-
التزم بحارتك المرورية
بلاش تضرب غرز لأنك مش محترف كفاية عشان تاخدها بالشوكة والسكينة واحتمال الخطأ وارد سواء منك او من العربية او احتمال ان يحصل اي شيء غير متوقع زي ان عجلة تضرب او اي حاجة
لو انت مقبل على يو تيرن يبقا ابعد عن الجهة اللي العربيات هتطلع منها يبقا تاخد يمينك ودا طبيعي جدا
نفترض انك مقبل على نزلة من الطريق او طلعه ابعد برده عن النزلة عشان تفتح الرطيق للعربيات اللي نازلة انها تنزل من على الطريق
ولو طلعه ابعد عن الطلعة وخد شمالك عشان تضمن انك في امان وانك مش هتتفاجئ بعربية طالعة بسرعتها لأنه طالع مطلع وهو مش غلطان رغم ان الاولوية ليك

دائما وابدا متخليش نظرتك للطريق مقتصرة على العربية اللي قدامك لا ابدا
بص لما بعد اللي قدامك وادي مساحة للتصرف
لو عربية على يمينك وانت الطريق قدامك يخليك تتوقع انه هيرمي شمال شوية يبقا متكبسش عليه واديله فرصة يرمي شمال وهيعدل نفسه وتقدر تعدي منه طبعا

الطريق ساحة للوصول وليس ساحة للسباق -نصيحة ليا وليكم جميعا رغم اني مبقدرش اعملها دايما- متتفرعنش بامكانيات عربيتك وخلي دايما في دماغك ان فيه عربية احسن من عربيتك دايما وهتعمل فيك اللي بتعمله في غيرك

حافظ على مسافة بينك وبين اللي قدامك تتناسب مع امكانيات عربيتك في الفرامل يعني اعرف امكانيات عربيتك في الفرامل وتعامل مع اللي قدامك على الاساس دا وطبعا متلزقش فيه عشان دا قمة الخطر لو هو فرمل مفاجيء

عود نفسك انك تستعمل الفرامل دون دبرياج عشان تستفيد من الفرملة الاوتوماتيكية للموتور

اعتقد دي اهم الحجات اللي في دماغي دلوقتي ويارب اكون افدتك وافدت الجميع ومنتظر معاكم توجيهات اضافية انا مكتبتهاش وربنا يحمينا جميعا من شر الطريق وشر الناس المتهورة