الموضوع: سيكولوجية التعامل مع سيارة الإسعاف.. وي وا

السلام عليكم شعب نايل موتورز


لالالالا فوقوا شوية الله يخليكم عاوزين نتكلم ف موضوع مهم

أكيد يعني مش طريقة عمل الممبار بالكنافية طيب مهو واضح ملعنوان اهو

ألاوهو سيكولوجية التعامل مع سيارة الإسعاف اللي نفسي افهمها فعلا...

دلوقتي مين الأطراف المتعاملة؟؟؟؟ سائق السيارة نفسها والسائقين اللي حواليه

نيجي نتكلم فللي بيحصل...بنسمع الصوت المعتاد وي واااااااا وي واااااااااا


تلاقي الناس انقسمت اتنين..يقولولك لاياعم مش هنوسعله دي العربية فاضية وهو بيشغل

السارينة عشان يفضي الطريق وخلاصيعني محدش فكر أن السيارة فاضية

عشان هو لسه رايح يجيب مريض مثلا؟؟؟ ولاحنا مفكرين ان عربية الاسعاف دي بتاعت جوز خالته ويخرج بيها ويتحرك وقت ميحب؟؟

نيجي بقي للمصري الاصيل النص التاني..اللي بتاخده الشهامة وتلاقيه بيكسر يمين ويوسع للاسعاف

وأول ميشوفها قدامه تنهار الشهامة دي ف لحظات ويحرررررررق علغيار عشان يطلع يجري وراها...علي اساس بردوا ان جوز خالته هواللي ف الاسعاف دا

وفلحظات تاني يتكعبل الطريق قدام شوية...وتصبح عربية الاسعاف كمغناطيس يطرد من الامام ويجذب السيارات من الخلف

دا غير اني بحس ان سائقي الاسعاف نفسهم معندهمش اي تفاهم غير ف الجري وبس...

افتكر مرة كنت راكبة الاسعاف من جوا ونا سليمة الحمدلله ونزلت مكسرة ملخلاط اللي كنت راكبة فيه
اكيد في اسلوب منظم لكيفية التعامل مع سيارة الاسعاف..انا بصراحة معرفوش

لكن مرة اخدت بالي ان في عربية فضلت واقفة شمال وويتنج ونا عمالة اكلكسله ومش فاهمة واقف ليه..وعماله اشاورله يطلع علشان الاسعاف جي ورايا

لقيته نزل وفهمني انه وقف الشمال خالص عشان الاسعاف تطلع وتلاقي الشمال فاضي قدام بطول الطريق..طبعا انا تنحت شوية ومفهمتش ...كنت عاملة زي عمو البواب وهو بيتفرج علمسلسل الكوري


ياريت لو حد عنده فكرة او معلومة عن الموضوع دا...يفهمنا ويكسب فينا ثواب بقي

اعتقد انها مسؤوليه منظمة الصحة بالتعاون مع المرور انها تنزل زى بيان عشان الكل يتفق على حاجة واحدة
وعشان سواق الاسعاف نفسه يكون عارف رد فعل العربيات الحواليه مسبقا
اعتقد كدة هيكون احسن بدل ما كل واححد ياخد قرار انه ياخد يمين او شمال
لازم الكل يكون متفق على حاجة واحدة