أرخص سعر للسوزوكى ماروتى فى الإسكندرية !!

**abomouhsen** · 12-05-2011 12:35 PM

سلام عليكم يا جماعة ....... انا جديد هنا فى المنتدى !!
أولا بحييى كل الإعضاء وأعضاء الإدارة فى المنتدى الرائع ده على مجهوداتكم لإفادة الجميع

بما إنى جديد فى المنتدى وفى سوق السيارات عموما ، وكمان عايش برة مصر، ..... كنت عاوز أستفيد بخبرتكم فى موضوع شراء السيارة سوزوكى ماروتى (جديدة) إن شاء الله بعد العيد الصغير القادم !!

ياريت لو حد يفيدنى بأرخص سعر لهذه السيارة فى الإسكندرية، وعند مين بالضبط

لأنى فى الحقيقة شايف اختلاف كبير فى اسعارها فى الإسكندرية وعلى النت، فى فبراير اللى فات شوقتها ب، 39000 ألف عند أحمد مرعى - وفى أبريل اللى فات لقيتها بـ 36,750 الف عند أباظة بس ده كان بمناسبة عيد الربيع والعرض ده خلص آخر أبريل

ياريت تفيدونى بأرخص سعر ليها وموجودة عند مين فى الإسكندرية

أشكركم جزيلا
فى إنتظار ردودكم الكريمة

**dr.hazem** · 12-05-2011 01:33 PM

كان نفسي افيدك لكن للاسف انا في القاهره وكمان عندنا تضارب في الاسعار

تحياتي

**zenda** · 15-05-2011 08:34 AM

السعر دلوقتى 39000 ممكن ينزل 500 من عند احمد مرعى سيدى جابر

**abomouhsen** · 15-05-2011 09:24 AM

المشاركة الأصلية كتبت بواسطة zenda

السعر دلوقتى 39000 ممكن ينزل 500 من عند احمد مرعى سيدى جابر

ألف شكر ياباشا على المعلومة
هل ممكن الاقيها بسعر أقل فى الإسكندرية عن سعر أحمد مرعى؟

لو اى حد اسكندرانى عنده معلومات ياجماعة أرجوكم يفيدنا

**zenda** · 15-05-2011 09:50 AM

هتلاقى نفس السعر فى مودرن موتورز معتقدش فى سعر اقل من كدة إلا إذا السعر اتغير على العيد واحتمال صعب لان السعر لسه زايد قريب على العموم حضرتك لما تنزل الاسكندرية بالسلامة اسال على الاسعار تانى ولو قررت تشترى من عند احمد مرعى (فرع سيدى جابر) وعايز مساعدة انا فى الخدمة لانى اعرف الناس هناك و تحت امرك.

**abomouhsen** · 15-05-2011 10:16 AM

المشاركة الأصلية كتبت بواسطة zenda

هتلاقى نفس السعر فى مودرن موتورز معتقدش فى سعر اقل من كدة إلا إذا السعر اتغير على العيد واحتمال صعب لان السعر لسه زايد قريب على العموم حضرتك لما تنزل الاسكندرية بالسلامة اسال على الاسعار تانى ولو قررت تشترى من عند احمد مرعى (فرع سيدى جابر) وعايز مساعدة انا فى الخدمة لانى اعرف الناس هناك و تحت امرك.

متشكر جدا ياباشا على ذوقك
انا فعلا ناوى ان شاء الله اشترى عاليد اللى جاى لأنى نازل مصر ان شاء الله يوم 29 اغسطس يعنى آخر يوم رمضان، واعتقد ان ممكن يعملوا عرض عالعيد لأن (أباظة) كان عامل عرض عليها أبريل اللى فات مناسبة اعياد الربيع (36,750 جنية) بس طبعا ياخسارة ملحقتوش، ادعيلى بقة يعملوا عرض عالعيد لأن بصراحة الـ 100 جنيه تفرق معايا ههههههه.

وبما انك طلعت اسكندرانى، ياريت نتعرف ان شاء الله لما انزل اسكندرية، والشرف لينا ياباشا، وفرصة سعيدة جدا حتى منغير ما اشترى العربية، بإذن الله نتواصل لغاية ما انزل مصر، وانتا لو محتاج اى حاجة قبل منزل انا تحت امرك ياباشا.

**zenda** · 15-05-2011 07:44 PM

شكرا ليك ويشرفنى انى اتعرف على حضرتك لما تنزل الاسكندرية و اكيد كلنا بيفرق معانا الـ 100 جنية :d بتنفع برضة فى الصيانة
و ان شاء الله تلاقى ارخص سعر.

**abomouhsen** · 15-05-2011 09:59 PM

شكرا لذوقك ياباشا
انا قدرت اوصل النهاردة لإتفاق مع أباظة كنت عاوز اعرضه عليك وتقوللى ايه رأيك ؟

كان أباظة عامل عرض على الماروتى بـ 36750 جنية زى ما قولتلك فى أبريل اللى فات وانتهى العرض بنهاية أعياد شم النسيم

قدرت النهاردة اوصل لرقم موبايل صاحب معرض أباضة وعملت معاه اتفاق انى اول سهر يونيو ابعتله مقدم 5000 جنيه مع مرسال من عندى على أن يحجز ليا السيارة بنفس السعر الماضى 36750 جنيه عشان آخدها وادفع الباقى كاش فى آخر أغسطس القادم يعنى يستنى عليا 3 شهور ونص

وافق بس على شرط ادفع فرق سعر السيارة لو زاد فى آخر أغسطس فى حدود 1000 جنيه ولو قل يدينى هوا الفرق، بمعنى إنى هدفع دلوقتى 5000 وفى آخر أغسطس أدفع الباقى 31750 او 32750 لو زاد السعر يزود هوا عليا 1000 بس عشان خاطر استنانى إلى آخر أغسطس

وفى الحالة دى اكون انا برضه الكسبان لأن مش ممكن سعرها يبقى 37750 جنيه بس آخر أغسطس

إيه رأيك فى الــ Deal ده ؟
منتظر ردك

**zenda** · 16-05-2011 08:15 PM

انا شايف انه كدة كدة هيقولك ان السعر زاد الف جنية وهتدفع 37750 واحتمال اكتر لان السعر زاد من سوزوكى فعلا وحتى لو كان هيديلك من مخزون عندة بالسعر القديم كمان 3 شهور ونص اكيد هيكون المخزون كله اتباع ومش هيعطل عربية والله اعلم انت هتشتريها ولا لا ومش هيديك العربية غير لما ترخص انما عند مرعى هيديك نمر تجارى عشان تمشى بيها وبيبعت معاك حد عشان يساعدك فى الترخيص و بشوية ضغط ممكن يبيعها بـ 38 الف
والاهم انك هتدفع 5 الاف فى الظروف اللى البلد فيها دى ومش عارف ايه اللى هيحصل بكرة فما بالك كمان 3 شهور ونص.