الموضوع: الحمد لله العربية خيشت :)

السلام عليكم و رحمة الله و بركاته
يو الخميس اللي فات و أنا قاعد في الشغل حوالي الساعة الواحدة ظهرا خير اللهم اجعله خير لقيت الموبايل بيرن رديت طبعا لقيت الراجل اللي بركن معاه العربية (بس مش بسيب معاه المفتاح) بيقولي تعالى يا دكتور العربية اتخبطت (طبعا أنا زهقت من كتر لما بقولوا أنا مش دكتور والله مهندس)
قلتلو خير إن شاء الله
قاللي العربية اتخبطت في ميكروباص من بتوع الجيزة و احنا ماسكين السواق
قلتله لو خبطة صغيرة ماشيه
قاللي خبطه جامدة يا "دكتور" و قفل السكة
نزلت جري من الشغل و نسيت طبعا اعمل إذن أو أي حاجة و الشيطان مسكني إن الخبطة جامدة و قضت على الأخضر و اليابس في العربية اللي لسة عاملة 4500 كم بس
و بخاصة إني كنت راكن عمودي على الرصيف و وش العربية لبرة و كان في عربية على يميني و واحدة تانية على شمالي يعني الخبطة في صدر العربية يا ترى العربية هاتدور يا ترى الريداتير اتكسر
المهم و صلت للعربية بعد حوالي ربع ساعة مشي (الناس اللي بتشتغل في المهندسين عارفين إني كنت راكن قريب من الشغل يومها) و لقيت الاكصدام اتجرح جامد و الصاج بتاع الكبوت مطبق في الحتة اللي بين الفانوس و الشبكة الأمامية (حته صغيرة بس مطبقة جامد قوي قلت الحمد لله إنها جت على قد كدة
المهم مش لاقي السايس اللي بيركن العربية
دورت عليه لقيتو واقف مع الضابط بتاع المرور و ماسكين الراجل بتاع الميني باص من بتوع الجيزة و كان بيخرم في الشوارع الجانبية عشان الزحمة
الضابط خدني على جنب و قاللي حاول تاخد منه تمن تصليح العربية من غير محضر و المحضر مش هايعملك حاجة و الكلام ده
المهم الراجل السواق كان محترم لحد كبير و قاللي أنا غلطان و عايز كام قلتله ماعرفش قاللي شوف كام
كان في واحد معدي من ولاد الحلال قال خد منه 200 جنية و تبقى ترجعله الباقي
السواق سمع 200 جنية اتحول فجاءة و قعد يبرطم و يعلي صوته و قال هي 50 جنية مافيش غيرها و من هنا لهنا الضابط و الناس اقنعوه انه يدفع 100 جنيه على اساس اني أرجعله الباقي لو فيه باقي (و أنا ناوي أرجعله الباقي لو فيه باقي )

بس
ده كل اللي حصل و كان نفسي أصورها و أحط الصورة بس للأسف مابعرفش
أنا العربية عاملة 4500 كم و ناوي أحاول أصلحها مع صيانة الـ 5000
كنت عايز أخد رأيكم هو أحسن مركز خدمة في موضوع السمكرة مين بالضبط ؟؟ ده طبعا إذا كانت ينفع تتسمكر
طبعا أن خايف التوكيل يقوللي نغير الكبوت كله و خاصة إن الحتة اللي مخبوطة مخبوطه جامد بس هي حجمها صغير
و التجريح اللي في الاكصدام ده عندي أمل كبير انه يتعالج بكمبوند أو حتى اسيبه كده

شكرا
محمد فوزي