الغرور لازم يصيب البني ادم مننا من حين لاخر ..حتي لو ماشي في الحر و مش معاك عربية و ركبت الاتوبيس المستكيف و انت واقف في الاشارة ييجي الاتوبيس العادي يقف جنبك .. و تبص للناس تلاقيها بتبظ من الشبابيك و الابواب .... ساعتها بتلاقي نفسك ركبك عفريت العظمة .. و اتجعصت في الكرسي .. و انت و لا أي حاجة ..
و ممكن اقل واحد من الناس المدلدلة من الاتوبيس يكون عند ربنا احسن مني الف مرة
********
بالنسبة لغرور العربيات ..
حاليا مش معايا عربية .. لكن بركب كتير .. و كلها حديثة و لله الحمد ..ساعات و الله و انا خارج الصبح اقوم امر عمدا علي محطة الاتوبيس اللي جنب البيت .. يمكن الاقي حد اعرفه يكون في طريقي ..
************
مكان الشغل عندنا ليه 3 بوابات .. و المساحات بالداخل شاسعة و مترامية الاطراف .. لذلك تلاقي اوقات كتير موظفين داخلين و رايحين مكان بعيد جوه .. يقفوا يشاوروا لأي عربية داخلة .. هما دول اللي بحط عيني عليهم لما بيكون معايا عربية .. و الحمد لله بلاقيهم دايما .. و اللي عايز ياخد ثواب يقوللي و أقوله علي المكان :)
*********
و حاقولكوا علي حاجة حلوة جدا .. من فترة والدي كان نازل رايح مشوار الصبح ( و هو راجل مسن )و اتمشي لحد المحطة ووقف عليها و استني .. لقي واحد جه سلم عليه .. و قالوا سلام عليكم .. ازيك يا حاج .. انا فلان الفلاني بصلي مع حضرتك في المسجد .. و كان معاه عربية ماتريكس .. و اخد الوالد و صله مشواره .. و كمان قعد معاه لغاية ما خلص .. و رجعه تاني :)
الشاهد : اسع في الخير و انتظر الاجر من الله .. مش في الاخرة بس .. لا .. ربنا كريم جداجدا .. و اجرك ان شاء الله دنيا و اخره
*********
لكن مع ذلك .. يظل الشيطان شغال و مبيهمدش ..ربنا يعيذنا جميعا من شروره .. و يمن علينا بالرضا و القناعة وحب الناس .
المفضلات