الموضوع: تقطيع فى صوت الكاسيت

شكرا لمجهودك

المشاركة الأصلية كتبت بواسطة exact

سيادتك هتروح لمحل الكترونيات وتجيب 4 مكثفات 22000 ميكرو فاراد 25 فولت وتشبكهم متوازيين مع مراعاة انه بيبقى له موجب وسالب وتوصل الموجب بتاعهم بموجب الكهربا اللي فالكاسيت والسالب في السالب وتاخد فرع من وصلة السالب وتربطه فالشاسية وياريت يكون فرع تقيل....الكلفة الاجمالية 18 جنيه....وعرفني عملت ايه

طب ده بالنسبة لايه بالظبط عشان ابقي فاهم لتقطيع mp3ولا الريستارت بتاعه وهل لو عندي التقطيع في الانتين اعمل للاتنين نفس الموضوع يعني اجيب الحاجات دي واركبها للكاسيت واجيبها واركبها لmp3 وهل ليها ضرر لو ركبت غلط وهل الكهربائي يعرف يعمل الموضوع ده دي نقطة تاني نقفطه انا مش فاهم الجزئية دي وتاخد فرع من وصلة السالب وتربطه فالشاسية وياريت يكون فرع تقيل....
وشكرا لتعب حضرتك في جميع الحالات وارجو اني استفيد وكل الناس تستفيد وشكرا ويا ريت حضرتك ترد بسرعه عشان عايز اعمل الموضوع ده بسرعه وشكرا

المشاركة الأصلية كتبت بواسطة exact

المكثف في هذه الوضعيه هيبقى عامل زي المساعد بتاع العربية....بيمنع الارتفاع المفاجئ في الفولت وبرضه الانخفاض المفاجئ...لانه بيشحن اما الفولت يعلي ويفرغ اما يقل...انت قلت ان الفولت بيعلى ل 17 فولت لحظيا وده كتير جدا جدا...معظم الكاسيتات وبالذات اللي فيها نظام ديجيتال زي الام بي 3 او السيديهات تتكيف حتى 15 فولت واما تحصل ذبذبه (ولو كان الكاسيت ابن حلال) فيه نظام حماية للفولت العالي Over Voltage Protection في الدوائر بتاعته عشان يحميه...

الحل الامثل لحالتك انك تغير الدينامو او المنظم اللي موجود في قلبه....وده الحل الجذري...اللي باوصفه ليك ده مسكن قد ينفع (وده احتمال كبير) وقد لا ينفع...العربية بتاعك هتلاقي دينامو بتاعها مش غالي عند بتوع الاستعمال وممكن يكون بيركب عليها دينامو الميكروباص وده هتلاقيه طبعا بالهبل

فيه حل كمان وده درجة نجاحه عاليه جدا لو كانت المشكلة بسبب تذبذب الكهربا....استعمال نوع من مثبتات الكهرباء ترانزيستوراية اسمها KIA7812 وده بياخد فولت لحد 19 ويخرج 12 ثااااااااااااااااابت تماما بشدة 1 امبير واشهر مثال موجود فيه الترانزيستور ده...الباور سابلاي بتاع الكمبيوتر هتلاقي عالاقل 3 جواه....فده ممكن تعمل بيه دايره مش هتتكلف 20 جنيه هتظبط المسائل

خوفي من نقطه واحدة بس...ان بعد ده كله يكون الكسيت اساسا باظ من تذبذب الكهربا....وعشان تتاكد هل هو سليم وللا لأ...سيادتك في نفس الظروف الحرارية هتشغل الكاسيت والموتور واقف وشوف ايه اللي هيحصل...هل هيقطع؟؟...لو قطع برضه والموتور مبطل وهو شغال عالبطاريه يبقى كده البقاء لله فالكاسيت وتشوف حد بتاع تصليح الكترونيات او كمبيوتر تديهوله يصلحهولك....نقطه كمان تخللي بالك منها هل التقطيع ده مرتبط بالمطبات؟؟؟

المقصود بالفرع اللي تاخده ده...انت مش هتوصل سالب الكاسيت بالسالب بتاع المكثفات؟؟؟ سيادتك هتيجي عالنقطة اللي انت موصل فيها السالب دي وتوصل سلك (فرع) بسمك 1 مللي عالاقل بالبودي بتاع العربية في اي مكان...تفك مسمار وتربط السلك تحته

لو عكست توصيل المكثف مفيش ضرر للعربية انما هتحرق المكثفات...دي صورة مشابهه ليه...

شايف الشريط الرمادي اللي مكتوب عليه 0 0 0 ده جنب الرجل بتاع السالب او الارضي والتانية بتبقى بتاع الموجب....سيادتك هتوصل كل الموجب في بعضه وكل السالب في بعضه ده توصيل توازي
واي استفسار نوضح تاني مفيش اي مشكله

أخوك...د مصطفى...صيدلي ب20 سنه الكترونيكس

شكرا جدا لمجهود حضرتك بس انا عارف اني بتقل عليك بس حضرتك اخونا برضو ولازم نستفيد منك في نقطتين عايز استفسر عنهم تاني الاول هل اعمل لولاعه اmp3وصلة مكثفات وللكاسيت وصلت مكثفات وهل اعملهم قبل الفيوز ولا بعده ولا مش هتفرق
تاني حاجة اني حل احسن بتاع الترانزستور ولا المكثفات ولا الاتنين يتعملوا وازاي اعرف ان في تذبذب ف الكهرباء وشكرا لرد حضرتك
وياريت كمان الفرق بين الترانستور والمكثف وحضرتك تقترحلي اعمل ايه

سؤال كمان هل الترانزستور بيتركب قبل الفيوز ولا بعده
وبتتركب زي المكثفات برضو وطرف يبقي في الشاسيه
وهلي ترانستور واحد يكفي للكاسيت والmp3
ولا اعمل لكل واحد ترانستور وشكرا

انت زهقت مني ولا ايه المهم سؤال تاني هل المكثف 22000 ولا2200
وشكرا انا عارف انك كرهتني بس معلش

كان عندى نفس المشكلة و صلحتها بتغيير اى سى الصوت - هاتلاقيى بعد لما تفك الكاسيت فى الخلف راكب فى ظهرة مبرد (زعانف تبريد) عشان هوة طبيعى بيسخن بس لما بتزيد السخونة بيبداء الصوت يقطع زى ما بتقول