الموضوع: تسخين الماتور الصح !!؟؟؟؟؟

المشاركة الأصلية كتبت بواسطة ahmedhawas

الله ينور عليك يا هندسة .. وأحب أضيف ان التسخين فعلا ضروري عشان الخلوصات اللي في الموتور تكون كلها في الرينج المظبوط للتشغيل ومن ضمن الخلوصات دي
الخلوص بين سبايك الكرنك والكرنك نفسه- بحيث بعد إتمام عملية التسخين بتكون في طبقة رفيعة من الزيت بينهم تقلل الاحتكاك لأقصى درجة ممكنة- وبيدور الكرنك وهو متحمل عليها
كذلك أحب أضيف : ان ثرموستات الكوعة ليه دور كبير في تقليل زمن التسخين:
لان خلال عملية التسخين هو اللي بيمنع المياه من انها تروح للردياتير قبل ما توصل لدرجة حرارة التشغيل- (عشان كده لو الثرموستات بايظ : غيره...لكن متلغيهوش)-وكمان لغيانه بيأثر على أداء الموتور حتى بعد عملية التسخين.
أما بخصوص وصول الزيت لجميع أجزاء المحرك أثناء بداية عملية التسخين-:
في معظم العربيات الحديثة (أخص بالذكر فلترالنيسان...لاني شوفتها في فلتر نيسان الأصلي) بيكون في حاجة اسمهاAnti-drain back valve وده بيمنع الزيت انه يرجع للكارتيرة لما تطفي الموتور- وبالتالي أول ما تدور العربية الزيت بيكون متوزع في معظم أجزاء الموتور- وده بيقلل الاحتكاك الجاف جدا وبيطيل العمر الافتراضي للموتور
عشان كده متجيبش الفلتر غير من التوكيل أو من موزع قطع غيار أصلي

بجد معلومة قيمة جدا و هى Anti drain back valve
جزاك الله كل الخير

اما بالنسبة للمشاركة الخاصة بأن التسخين ليس هام و لا ضرورى ( حسب الكتالوج طبعا )
ارى ان الاساس العلمى يختلف معها الا اذا كان هناك تكنولوجيا تضمن تجنب الاثار السلبة لعدم التسخين

بالنسبة للتسخين اللى اقصده - التسخين على الواقف - انه لازم انك تسخن السيارة ع الواقف لانه ما ينفعش تحمل عليها و هى لسه مش جاهزة للتحميل
لكن التسخين و انت ماشي ده منصوص عليه فى السيارات الجديدة و خصوصا للمناطق الاوروبية للاسباب التالية:
1- التسخين بيزود استهلاك الوقود للسيارة لانك بتستهلك وقود و انت واقف ( ما عملتش بيه مسافة و لا اتحركت من مكانك) وطبعا هما بيستخدموا الوقود فى التدفئة- فلو كل واحد سخن سيارته مش هيلاقوا وقود ( اعتبارات اقتصادية)
2- زيادة التلوث لان انت استهلكت وقود و انت واقف وهتستهلك وقود تانى علشان القيادة اذن زودت فترات تشغيل المحرك و زودت نسب انبعاثات العوادم (اعتبارات بيئية)
القصد : ان الكلام اللى بيقولوه فى الكتالوج يتوافق مع انهم بيوفروا ف الوقود - و بيحافظوا على البيئة - الى جانب انهم اصلا ما بيستخدموش السيارات لفترات طويلة (10 و 15 سنة) زينا بالتالى الاثار السيئة لعدم تسخين السيارة مش هيتأثروا بيها لان السيارة كده كده بيخلص منها بدري بدري

ملحوظة : انا معايا سيارة نيسان تيدا و كتالوجها بيقول ان التسخين و انت ماشي لكن انا عارف هو بيقول كده ليه لان كلامه مش قرآن خصوصا ان كلامه ده مبنى على اساس علمى انا قلته فى الاسباب المذكورة انفا الى جانب ان كلامى عن التسخين مبنى كذلك على اساس علمى تم دراسته فى الكلية
و مفيش حد طبعا عايز يتلف موتور سيارته
الرأى اللى هتقتنع بيه نفذه و انت تتحمل عواقب اختيارك و اتمنالك الخير اكيد