الموضوع: تقرير عن byd f3 اتوماتيك

ألف مبروك يا أبو حميد وربنا يبارك ليك فيها ويكفيك شرها .. واسمحلي أرد على بعض الملاحظات اللي قولتها

المشاركة الأصلية كتبت بواسطة gad_fcis

نبتدي بالعيوب :

1-الشنطة عشان تتقفل لازم تترزع جامد و رحت عن واحد بتاع أبواب في السابع عملها بس للأسف المفتاح إلي بيفتح الشنطة من جوة بقى أوقات يشتغل و أوقات لأ و كمان الشنطة مفارقة من جانب و الجانب التاني لأ
إن شاء الله المشكلة دي تتحل في الصيانة القادمة .. بس زن عليهم في تصليحها .

2-فيه هواء ساخن بيجي من عند الدواسة أو من تحت التابلوه و ديه فعلاً الحاجة إلي مزعلاني خصوصاً إن التكييف بتاع العربية حلو أوي بس بسبب الهواء السخن دة العربية بتاخد وقت عشان تسقع (أنا عارف اني المفروض مشغلش التكييف بس عشان كان راكب معايا ناس كبيرة )
الهوا السخن ده أثناء تشغيل التكييف؟!! ولا بتحصل لو التكييف مش شغال ؟!!
لو السخونية دي بتحصل والتكييف مش شغال .. أقفل اتجاه دوران الهواء وخليه من داخل العربية وليس تجديد الهواء من داخل العربية .. وإن شاء الله حتتحل وأدعيلي .

3- العربية فيها رعشة أو غربلة عند سرعة 120 كم فما فوق (مش عارف دة ترصيص ولا إيه )
ترصيص أو تربيط عفشة

4-الفوانيس الأمامية مرفوعة أوي لفوق لدرجة اني بحس إن مفيش فرق بن العالي و الواطي
ظبط فوانيس .. وإن شاء الله تتحل في الصيانة


5-أوقات بسمعة صوت ونة بسيطة أوي عند سرعة 60-70 كم (دة عيب ممكن التغاضي عنه عشان أنا ودني حساسة زيادة عن الزوم و ممكن العيب دة يكون عند حد تاني و مش واخد باله عشان ذي مابقول أنا بركز أوي مع العربية)
الصوت ده جاي منين من ناحية العجل ولا الفتيس .. وهل بيكون مش موجود قبل السرعة دي .. وهل بيزيد بعد السرعة دي .. حاول تركز ناحية العجل لأنه ممكن يكون بدايات بلية العجلة .. وقول ليهم عليه في الصيانة .

6- الباركينج سنسور بيدي صوت على أساس اني هخبط في اللي ورايا في حين إن بيبقى فيه لسة مسافة حوالي نص متر
أعتقد (والله وأعلم) أن هو ده الصح بتاعه .


7- إستهلاك البنزين كان مع أول تفويلة 11.7 كم في اللتر ، مع تاني تفويلة كان 9 كم في اللتر
بتختلف من بنزينة لأخرى .. وحتى لو بنزينة واحدة بتفرق برضة لاختلاف ظروف الطريق وأسلوب القيادة .. بس أهم حاجة أنها في الحدود المقبولة بالنسبة لعربية أتوماتيك .

ومتنساش الزرار بتاع الفتيس وأي ملاحظات تانية تظهر لا قدر الله لحد ميعاد الصيانة .. وحاول تكتبهم في ورقة علشان متنساهمش .