عملت حادثة صغيرة الحمد لله

**Ahmed Samy** · 21-04-2008 11:22 PM

اخواني :
انهاردة و الحمد لله العربية اتخبطت على مطلع الدائري باتجاه المهندسين
انا داخل المطلع مع ديناصور بمقطورة و لاقيتة بياخد يمين فخدت انا شماله و لكن انتو عارفين طبعا ان المطلع ده فيه كيرفين يمين في شمال
المهم ان الديناصور مامشيش مع الكيرفات بتاعة المطلع ولكن (وسطن نفسه) و خده بخط مستقيم و بالتالى العبد لله اتزنق بينه و بين الرصيف الخرساني و لمسة فرامل ......مع رملة ناعمة .......و.............الف سلامة
اكصدام + رفرف شمال + فانوس شمال + مقص شمال + ميزان + مساعد + كوبلن شمال برضه :d و طبعا جنط و فردة كاوتش
و لم تتجاوز ذلك بمللي واحد و في حاجات شكلها غير متضررة و لكني حسبتها من الخسائر لأني مش عايز ذيول .

جت سليمة طبعا أنا و الحمد لله تمام
بس فعلا الديناصور ده منه لله
و لا أنكر انني تجاهلت للحظة أسس القيادة الدفاعية التي التزم بها دوما في طرقنا الأمنة
و من الخطأ طبعا محاولة التجاوز في مطلع فما بالك بتجاوز ديناصور يقوده مخلوق من جنس أخر و يجر مقطورة ؟؟؟؟؟؟

المهم اتصلت بالونش
و جه و شالني هيلا هوبا ورجعني المنصورة و أخد 320 جنيه بدون فصال ولا اكرامية
و بكرة ان شاء الله سيبدأ العمل على اعادة ترميم البنية التحتية (العفشة) و التجميل و التزيين (البدن)
و سنتبنى بإذن الله تعالى سياسة الاستبدال وليس الاستعدال :d

و سنوافيكم بالأخبار تباعا