Diy عمل فوانيس ليدات

**smsm_nabawy** · 18-06-2011 03:43 PM

المشاركة الأصلية كتبت بواسطة blackverna

انا متابع الموضوع من اوله

و استفدت منه كتير جدا و شكرا لكل من ساهم بمعلومة
و فعلا اشريت شوية ليدات و مقاومات 270 و 220

بس ليا شوية اسئلة

عاوز اعرف طرية تركيب المقاومات :
- يعنى بتركب قبل و لا بعد الليدات
- هل بتقى مقاومة واحدة لليدات كلها و لا لا
- ازاى احدد قدرة المقاومة اللى انا هركبها

و ياريت لو فى رسم توضيحى

حنمسك سؤال سؤال
1-
المقاومة بتركب قبل الليد ،، علشان تحكم التيار الي ماشي علشان ميدخلش فولت عالي على الليد يحرقه لا قدر الله :)

بالعقل كده و الهداوة ،، حضرتك عندك أنبوبة "الي هيا السلك" و ماشي فيها مياه "الي هيا التيار" و فيالاخر في كيس بيتنفخ بالمياه دي !!

لو المياه دي جت جامدة ،، حتفرقع الكيس !!
كده حضرتك محتاج محبس يقفل المياه و يقلل كميتها علشان متقطعش الكيس "الي هو في الحالة دي المقاومة"

أذن هيا مابين مصدر التيار في الدائرة و الليد نفسه
=====================
2-
عدد المقاومات بيبقى على حسب طريقة التوصيل ،، بمعنى !!

لو حضرتك حتوصل على التوالي ،، أي ان كله مع بعضه ،، حيبقى الحال كالتالي

كأن حضرتك عندك شارع كله عربياااات كتيييييييير "السلك ماشي فيه التيار"

و حضرتك حطيت اكتررر من شارع جانبي ... و المفروض أن العربيات دي تتوزع على الشوارع الجانبية دي كلها !!

بالتالي الزحمة في كل شارع جانبي بتقل كل ميزيد عدد الشوارع الجانبية

و الطريقة دي أسمها التوصيل على التوالي ،، أي أن كل الشوارع الجانبية متفرعه من نفس الشارع الرئيسي ،، بالتالي حضرتك علشان تنظم الزحمة ،، مش حتحتاج عدد أشارات مرور كتير "الي هيا في الحالة دي مقاومات " و يادوبك ممكن تحتاج مقاومة واحدة في بداية التوزيع خالص !! و تكون ذات قيمة قليلة خالص" على حسب حضرتك حاطط كام ليد مع بعض توالي :)
و العربيات "التيار" بتكون ليها حرية أكتر في انها تمشي في الشوارع الجانبية "الليدات" أو الشارع الرئيسي"السلك" بالتالي الزحمة "الي ممكن نتغاضى و نقول عنها الجهد" حتقل على كل شارع جانبي ،، :)
=======
في نوع توصيل تاني ،، و هو التوازي ،، و كالتالي

أن حضرتك عندك طريق طويل و فيه عربيات كتييييير أوي !! "السلك ماشي فيه التيار" و بعد كده الطريق ده فجأة بينتهي و يتفرع الى عدد معين من الطرق ،، "بيساوي عدد التوصيلات التوازي الي حضرتك عملتها" و بعد كده رجعت تاني أتجمعت في طريق واحد الي هو الطريق الأصلي تاني

و هنا العربيات الي عددها كبييير اوي و مش منتهي "التيار" بتوزع نفسها على الطرق دي !! و لكن برده !! بتفضل متزاحمة !! لأن كلللهااا دخلت مرة واحدة الطرق دي ،، و فجأة مرة واحدة الطرق دي كلها اتجمعت في الآخر في طريق واحد !! فالزحمة "الجهد" فضلت واحدة في الطرق دي !!

بالتالي حضرتك علشان تقلل الزحمة حتحتاج أشارة مرور "مقاومة" على كل طريق على حدى !! لازم كل طريق يكون عليه أشارة "مقاومة" و قيمتها بتختلف حسب رغبتك ،، حضرتك عايز الطريق ده يمشي فيه تيار كتير ولا قليل ،، لو كتير يبقى حط مقاومة قليلة ،، لو قليل ،، يبقى حط مقاومة كبيرة !! و هكذا !! :))

يا رب أكون عرفت أفيدك أن شاء الله
================================
3-
قيمة المقاومة بتتحدد زي مقولت لحضرتك على حسب ،، حيث انها بتعتمد على أكتر من حاجة

بأختصار بتعتمد على
*الفولت المغذي
*عدد الليدات
*فولت كل ليد
طريقة توزيعم "توالي ام توازي"

تحياتي :)

**smsm_nabawy** · 18-06-2011 07:25 PM

المشاركة الأصلية كتبت بواسطة tiktaktok2008

الله علييييييييييييييييييييييي ييييييك يا سمسم يا مظبطنا ايه الشرح ده والله حاجه زي الفل بس انا اتلخبطت شوية من كتر العربيات ومعرفتش اروح فين فنزلت اخدت تاكسي

العععععفوو يا باااسم :)) لا مظبط ولا حاجة يا باسم والله :) ده بس من ذوقك

**smsm_nabawy** · 18-06-2011 07:29 PM

المشاركة الأصلية كتبت بواسطة BLACKVERNA

ربنا يكرمك و الله على الشرح الوافى دا

طيب دلوقتى انا عايز اعرف انا اشريت ليدات 5 مللى

لو انا عايز احط مثلا 20 ليد منهم فى الفانوس و اوصلهم على التوالى

احسب ازاى المقاومة اللى انا هحتاجها

اللهم آمين ،، و شكراً ليك ،،

اما لقيمة المقاومة بتتحسب من على النت ،، الأخ الكلايم باسم tiktaktok2008
يعرف مواقع كتير مفيدة في الموضوع ده ،، بتديله الفولت بتاع السابلاي ،، و عدد الليدات ،، و كل ليد كام مللم

و هو حيقولك قيمة المقاومة كام

مش عارف بقا هو ماشي على نظام المقاومة الي بتدي أكبر قدرة لأضائة الليد !! ولا ماشي بأأمن مقاومة !! عامةً حضرتك أمشي بالمقاومة دي و جرب على العربية ،، لقيت الأضائة ضعيفة ،، حتضر تاخد الفانوس تاني ،، و تصغر المقاومة شوية !!

بس بأمانة موضوع مممممتتتتتتتتعععععععع !! و مش مكللللف على الطلاق ،، حضرتك بتحول فوانيسك لشكل تاااني خالص بتكلفة لا تُذكر بالنسبة لتكلفة تعديل الفاونيس !! ده + الخبرة الي بتكتسبها في التجربة دي :)