Diy عمل فوانيس ليدات

**eng_tefa** · 18-05-2011 08:44 PM

انا قررت انى انزل طريقه عمل الفوانيس الليدات عشان اكتشفت طريقه جديده وطبعا عايز مساعدتكم معايا
نخش فى الموضوع على طول عشان مبحبش التطويل
انا هشرح على عربيتى (تمبرا)
الادوات
بورده نحاس ساده بحجم الفانوس
محلول
قلم دوكو
دريمل
ليدات مقعره من فرع نور ليدات
3 فروع( احمر -ابيض - برتقالى )
مقاومات هقولى على ارقامها بعدين
اسبراى اسود
فاميه اسود او استيكر كاربون

الفكره
انا واخدها من واحد تركى عاملها فى عربيته
انا لسه منفذتش الفكره دى فعليا فعشان كدا هعملها فوتوشوب
شريط الليدات الوحيد اللى ممكن تجيب منه ليدات مقعره فى مصر هو متعب شويه وانت بتفك الليد بس مش لاقى حل تانى
الفاميه الاسود عشان اعمل الشكل دا

انا هقطع فى الباغه اللى عندى وهحط مكانها اكليريك زى الشكل كدا
والفاميه هيكون من حواليها

الطريقه
هنا بقى هقول اللى انا عملته ومستنى راى الخبراء ومهندسين الكهربا عشان انا مدنى
عمل التصميم وفى برامج بتعمل تصميم زى اور كاد وايجل بس الحمد لله مليش فى البرامج دى
قولت اعملها يدوى
افضل طريقه لتوصيل الليدات هو 3 توالى مع مقاومه عشان العربيه 12 فولت
المقاومه بتتحسب من برامج كتير او يدوى
المهم ان كل لون ليد ليه فولت معين للتوصيل
تركيب مقاومه قليله نسبيا مش مشكله كبيره بس المقاومه هتسخن

اولا تقطيع البورده النحاس بنفس حجم الفانوس من جوه ورشها اسبراى اسود

طباعه التصميم على البورده النحاس وفيه كذا طريقه ومحتاج راى الخبراء
رسم الدايره على النحاس بالقلم الدوكو وبعد كدا نحطها فى المحلول
اوعمل الدايره على برنامج وطباعتها ببرنتر ليزر وكويها على النحاس ودى اللى مش عارف اعمله مظبوط عشان مش عندى برنتر ليزر
بعد كدا تخريم البورده بالدريمل او الشنيور اليدوى وطبعا الفرق فى الوقت والمجهود رهييييب بين الاتنين

بدا اللحام فى البورده على حسب التصميم بتاعك

التوصيل بالضفيره انا ريحت دماغى وجبت فيشه 6 طرف من عند اكسسورات عربيات وترامل وعملت فيشه

الشكل النهائى

دا شكل الليدات بس انا مش هعمل كل دا عشان عايز اخلى الاشاره والرجوع كريستال زى الفرامل

التصميم انا بعمله حاليا
بس اللى ناقص عندى العاكس اللى هو حاطه حوالين الليد

دا فيديو تعليم طباعه الدايره على البورده
[youtube]http://www.youtube.com/watch?v=wKEe3otWstM[/youtube]

**misoalex** · 18-05-2011 11:25 PM

تسلم ايدك
هو الموضوع سهل وبسيط ومعروف لكل الناس اللى بتشتغل بأيدها فى الالكترونيات

انا عندى دوائر كمان ممكن تتوصل باليدات تعمل شغل جميل

بس هو موضوع التوصيلات واليدات ده حتلاقى نناس كتييييييير مش بتعرف فيه

بالنسبه للعاكس اللى ورا الليد ده انا شفته عند الفنجرى بتاع الفوانيس ونفسى اعرف بيجيبه منين

**Memo_Lancer** · 18-05-2011 11:41 PM

عقبالي بقي ان شاء الله
شغل روعه بحد

**eng_tefa** · 19-05-2011 03:07 AM

المشاركة الأصلية كتبت بواسطة misoalex

تسلم ايدك
هو الموضوع سهل وبسيط ومعروف لكل الناس اللى بتشتغل بأيدها فى الالكترونيات

انا عندى دوائر كمان ممكن تتوصل باليدات تعمل شغل جميل

بس هو موضوع التوصيلات واليدات ده حتلاقى نناس كتييييييير مش بتعرف فيه

بالنسبه للعاكس اللى ورا الليد ده انا شفته عند الفنجرى بتاع الفوانيس ونفسى اعرف بيجيبه منين

مهو دا اللى محيرنى ومش عارف اجيبه منين ولا حتى اى عاكس بديل ليه