الموضوع: اشترى a113 ولا لاء بس ردو عليا بامانة

صراحة العربية دى انا سوقتها لمدة اسبوعين بتاعت بنت خالتى وطبعاً بالنسبة للى معايا لادا 2105 فرق خرافى بس لاننى سوقت اكثر من عربية زى لادا والشاهين واللانوس واللانسر والبيجو والمازدا لفترات فده تقييمى ليها :
1 - محرك جميل وناعم وتسارعه كويس وعزمه حلو بالنسبة للعربية .
2 - العفشة ناشفة صراحة والعربية جريت بيها لغاية 140 وكان معايا 3 وكان الثبات كويس بس العربية عالية عن الارض وانا وحدى بخاف اعدى 120 على طريق السفر لانها خفيفة وجراية بعد 130 حسيت ان الثبات مش قوى فرامل سريعة الاستجابة بس لو فرملت فجأة بحسها بتقفش يمكن يكون عيب فى العربية لسوء الاستعمال.
3 - التقفيل بالنسبة للفئة السعرية للسيارة تقفيل الصالون والتابلوه فوق متوسط ويعيب عليه خامة التابلوه ، فرش الكراسى كويس والعربية واسعة من جوه وتشيل اسرة صغيرة وطبعاً ننسى الشنطة .
4 - استهلاك البنزين ممتاز .
الخلاصة عربية شبابية او لعائلة صغيرة ذات كماليات خطيرة بالنسبة لسعرها وفئتها (جميع الكماليات ) بس مش بتاعت طحن استعمال خفيف .
وعندك اكثر من خيار (بيكانتو 1100- سوزوكى التو 1100- برايد سايبا 1300 ايرانى- لادا 2107 الاوكرانى 1500- رينو لوجان 1400 تقفيل مغربى ) وكلهم انجيكشن وفول اوبشنز ولا يتعدوا 56000 جنيه وربنا يوفقك ويهديك للاحسن وشكراً .

ابعد عن الصيني . . .

باختصار سأروي لكم خلاصة تجربتي المريرة ومعاناتي مع اسبيرانزا 516 -1600cc حتى تم بيعها والحمد لله ،هذا ليس للنقد ولكن للاستفادة وأخذ العبرة لمن يريد :

(سيارتي كانت موديل 2007 وعملت بها 20000كم ولونها ،Sky grey- سيارتي السابقة كانت نوبيرا 2003 أوتوماتيك)

1) بداية استلام السيارة المكيف كان لا يعمل ودواسة البنزين بتقطع، تم ضبطهم بصعوبه وبعد عده زيارات للتوكيل وعده خناقات أيضا.
2) العفشة ناشفة جدا وتحس بكل زلطة في الطريق وتسمع أصوات غريبة وانت بتلف يمين أو شمال حتى بعد تعديل العفشة .
3) سحبها ضعيف جدا خاصة عند تشغيل التكييف وياسلام لو كنت محمل معاك ناس في العربية وطالع كبري في عز الظهر (فضيـــــــــــــــحة)، وحتلاقي في الأحوال العادية والله بلا مبالغة الـ 128 بتسبقك في الطلعة وكذلك جميع السيارات الـ 1300 والـ 1600 طبعا ، وموضوع انها 117 حصان وانها 147 نيوتن ده كلام فاضي وكذب عن تجربة وهي من واقع التجارب تقدر تقول انها فعليا 90 حصان ، 130 نيوتن/م
4) في المطبات وما أكثرها تسمع صوت طقطقة قدام ولما المطب ييجي وره تسمع نفس الصوت ورا وهو صوت ثابت في المطبات ومنتظم. (سوف تتعود عليه).
5) صفارة الفرامل وخاصة عندما تسخن الطنابير تحس انك ماشي بصفارة ممتازة تغنيك عن أي كلاكس (أيضا فضيحة)، نوعية التيل سيئ جدا بياكل الطنابير ، وكذلك نوعية الطنابير سيئة جدا - الطنابير اتاكلت بعد 20الف كيلو - طبعا خارج الضمان.
6) التابلوه بدأ يتقوس ويقب من الشمس ولسة العربية ما كملتش سنة !!
7) الباغة الخاصة بالكلاكس في الدركسيون غير حساسة وأحيانا بتعلق ونوعيتها رديئة .
8) الدوكو الخاص بالسيارة خفيف جدا لو عملتوا بأظافرك حيطلع علطول والاكصدام الأمامي والخلفي بدأوا في التقشير بعد الشهر الأول!!
9) صوت المارشدير عالي جدا (أيضا فضيحة ) الفتيس بيعض في المارشدير حتى بعد ضبطه في التوكيل ( لكن حتتعود عليه)
10) عيب قوي جدا في تصميم الموتور وأنه مقلوب ستجد الهيدرز الخاصة بالشكمان والفرن تم وضعهم إلى الداخل ناحية السائق والتابلوه وليس إلى الخارج كما هو الحال في جميع السيارات الأخرى المحترمة (فهل هذا اختراع جديد ؟) مما يسبب دخول حرارة الشكمان إلى الداخل ودليل ذلك حط يدك على الكاسيت بعد السير لفترة طويلة حتلاقيه مولع وسخن جدا ، انا كنت مركب صفارة انذار في الموتور ساحت واضطررت لتغييرها من سخونة الموتور ، فحركة قلب الموتور سيئة جدا وفكرة فاشلة تضر بالسيارة على المدى البعيد.
11) سماعات الكاسيت الأمامية كانت لا تعمل وتم ضبطها في توكيل كلاريون (السيارة زيرو !!!)
12) التوكيل وما أدراك ما التوكيل المعاملة الفعلية سيئة جدا جدا جدا ، لا تنخدع بالابتسامة وحضرتك ويا افندم وتحت أمرك ... ، انا عايز واحد يشتمنى بس يصلحلي العيوب اللي رايح عشانها مش بعد ما أحجز قبلها بأسبوعين وأروح وأضيع يوم كامل وأدفع مبلغ لا بأس به أرجع البيت بنفس العيوب !!!! (ضحك على الذقون)
13) أسعار الصيانة غالية صيانة 10000كم 300 جنيه - صيانة 20000كم - 700 جنيه ولدي ايصالات دفع بذلك ،طبعا كتير جدا غير اللي كنت بأدفعه في الزيارات اللي في النص مع المعاناه مع حضرتك وتحت أمرك يا فندم والكلام الفارغ ده والنتيجة ولا حاجة.
14) سنتر الباب الخلفي يمين لا يعمل وذهبت للتوكيل 3 مرات دون جدوى السنتر مش موجود حاليا ياا فندم على مدى شهرين !!!!
15) يوجد حدفة يمين لوجود عيب في الشاسيه باعتراف التوكيل وكثير من مالكيها سواء شعروا بها أو لم يشعروا وليس لها حل .

عموما هذا ما أذكره وهذه تجربتي الشخصية لمن يريد أن يستفيد ، والحمد لله بعت العربية وخلصت منها واشتريت الآن دايو ليجانزا مو 2001 أوتوماتيك وهي الحمد لله زي الفل وربنا يبارك فيها .

وتقييم نهائي للسيارة أعطيها 60% وقد تكون جيده لمن كان لديه قبلها 128 - سيات 133 – فيات 127- 125 أو شي من هذا القبيل مع احترامي الكامل لجميع السيارات السابقة ، وهي تصلح أكثر للسيدات وللاستخدام الخفيف غير كده للأسف مش حتنفع واللي حياخدها حيفكر يبيعها بعد أسبوع من شرائها .

اللهم قد بلغت اللهم فاشهد - نصيحة خالصة لوجه الله

أي استفسار انا جاهز 0123498224 م/ خالد جمال -