بسم الله الرحمن الرحيم

اول شيء اقول الحمد لله و الشكر لله مليون مرة

بعد صلاة الجمعه النهاردة 20 / 5 / 2011

عربيتي لانسر 98
لقيت تليفوني بيرن رديت لقيت قريبي بيركن جنب عربيتي
انت فين تعالي بسرعة عربيتك ازازها مكسور و كانت هاتتسرق

انا بركن العربية في شارع بعيد عن بيتي بحوالي شارعين تلاتة عشان شارعنا مفهوش خرم ابرة
نزلت جري
ابص الاقي العربية الشراعة الورانية مكسورة
و العربية مفتوحة
و جمجمة الدركسيون ( الحتة اللي ورا طارة الدركسيون اللي فيها الكونتاكت ) مفكوكة و المسامير مرمية في الدواسة
و الاقي درج التابلوة مفتوح و كل حاجة فيه مرمية علي الدواسة
و الاقي علي الكرسي اللي جنب السواق شنطة عدة مش بتاعتي و العدة منطورة علي الكرسي مفكات علي زراضية علي مفاتيح 6 و 8

مفيش اي حاجة في العربية مسروقة خالص الحمد لله
حتي الكاسيت و النظارة مخدهمش

البية كان جاي ياخد العربية كلها مش بتاع كاسيتات و الكلام الصغير ده
تقريبا حد شافة او هو شاف حد جاي فا ساب العربية و العدة و جري


اخدت العربية و روحت ركبتلها شراعة
و عديت علي الكهربائي ركبلي مفتاح فصل الكهرباء عن العربية كلها


قدر الله و ماشاء فعل
و الف حمد و شكر ليك يا رب انها جت لحد كده
الف حمد و شكر ليك يا رب

خدوا بالكوا من عربياتكوا يا جماعة
لازم يبقي فيها اي شيء يعطل الحرامي
حتي لو هاتحط ادامها ووراها قالب طوب من بتوع الرصيف

ربنا يسترها علي الجميع