الموضوع: طريق مطار برج العرب الجديد...إحترسوا

باسم الله الرحمن الرحيم

اليوم كنت طالع على مطار برج العرب الجديد بعد الصينية الي بتودي على طريق المطار الجديد في مزلقان قطر و بعده في طريق طويل شوية حوالي كيلو متر او اثنين لحد بوابة المطار ..... الشارع ده في منتهى الخطر لضيقة الشديد ولكثر الحفر المفاجئة و لإن ملفاته معدومة الرؤية للجانب الآخر و لإنعدام الحاجز بين جانبي الطريق الرايح و الجاي والشارع بيجذب الي ماشي للسرعة فيه بطريقة مش طبيعية... النهاردة كنت باوصل أحد الأصدقاء و ورانا عربية هيونداي النترا 2009 .. كان ماشي على 80-100 و لإنه مش حافظ الطريق جالة واحد من الملفات الضيقة لليمين الصعبة جدا فالعربية سرحت منه على الجانب الآخر و خبط في عربية تانية مسرعة جدا برضه من الناحية الثانية في الملف .. أنا وقفت و رجعت و قعدنا نطلع الناس من العربيتين لحين وصول الإسعاف .. كان حادث دموي جدا كل الركاب للأسف مصابين بينهم واحد نزيف داخلي وواحد كسور بسيطة و معظمهم خرابيش من الزجاج الي اتكسر وبعض الرضوض .... و الإسعاف الي جاه قالنا كل يوم او اثنين لازم على الملفات دي تحصل حادثة بنفس الشكل ده و بعد ما سيبتهم و طلعت على المطار بعدها بملفين كان في حادثة مشابهه ليها بس بدون إصابات خالص تكسير اكصدامات و إيرباج بس الحمد لله ......

انا اتخضيت جدا جدا من المنظر ده النهاردة و حبيت أنقللكم بس الي حصل عشان خلوا بالكم بالله عليكم الي رايح فالطريق ده ما يعدي 60 كيلو/ساعة و لما يخش على الملفات كلها يهدئ خــــــــالص و ربنا معانا و معاكم و يحفظنا جميعا من الحوادث

لا قدر الله لما تعمل حادثة تتصل بمعارفك يجولك في أسرع وقت لمكان الحادثة و طبيعي يكون معاك عصاية ناشفة او سلاح دفاع عن النفس موجود في العربية بشكل يومي ... انا عندي عصاية تخينة ناشفة مزينة بجلد كده شريتها من محطة مصر (الاسكندرية) وسايبها تحت الكرسي من بعد استلام العربية باسبوع تقريبا وعمر ما ظابط سألني باعمل بيها ايه ولا شك حتى لإنهم عارفين بس بيسألني ايه دي بأقوله دي لزوم الطوارئ لا قدر الله على الصحراوي او في المناطق المنعزلة نسبيا بيقولي اوك وسلام سلام .. بس يعني مش تجيبلك عصاية 130 سم سايبها فالشنطة او سكينة كبيرة او مسدس غير مسدس صوت يعني .... والله يحمينا جميعا من مشاكل الطريق كلها