الموضوع: دردشة صقور نيسان .. ادخل عرفنا بيك ودردش معانا .. ومتكتفيش بمشاهدتنا وخاليك جرئ

المشاركة الأصلية كتبت بواسطة ahmed.tv

يعني يابسااااام احنا بنهاتي و بنادي الناس وعايزنهم ميبعدوش عننا حتي لو اتأخروا علينا في الرد
وانا دايخ بقالى اسبوع علشان بحضر للمقابلة وعايزين نتعرف علي الناس الجديدة
وعملت موضوع الكافيه علشان يقربنا اكتر واكتر من بعض ولو حتي قدام الكمبيوتر لغايه ما نتقابل في أي مقابلة سواء كانت صغيرة أو كبيرة ....
ونقول فى الاخر اللى يدخل يدخل واللى يشارك يشارك , واللى مش يشارك مش فارقة .. لاتفرق معايا ياجميل الموضوع ده جدا
حتى لو كنت قاصد انى مزعلش وبتهدينا , لا ليه حق ازعل من الاعضاء اللى بتكتفى من المشاهدة ولازم يعرفوا , عشان الواحد لو مل ومعنوياته انخفضت , حيكون بسبب كدا
لازم نحس الناس ونقربها لينا وللموقع وللقسم وندفعها ونحمسها مش نهبطها خصوصا لازم تيجى مننا كاعضاء قدامى
انت عارف انا بحاول اخدم واساعد اي حد بيتصل بيا او بيبعتلي علي الخاص ومش بتأخر عنه
وبعمل كدا لوجه الله وعلشان اتعرف علي بسام وبسام يتعرف علي وليد و وليد يتعرف علي حسين ونبقي في الاخر الصحبة الطيبة اللي لو واحد فينا وقع اخوه يلحقه
وبحاول افتح مواضيع علشان نتعرف علي الناس اكتر واكتر ... لأن كل سؤال هما بيسألوه او رد علي سؤال حد سأله اكيد بيبقي في افاده لحد ميعرفش او مسمعش عنها قبل كده , ودى حقيقة , وانا شخصيا استفدت جدا من اسئلة كتيرة واستفسارات حتى لو كانت بسيطة
ولو انا كبرت دماغى قسم نيسان المفتوح ده هايتلخبط والدنيا هاتبوظ واي حد عنده اي موضوع يفتحه ولا حد هايحاول يرد عليه , وكمان قسم نيسان مش حيسمع فى مراكز الخدمة , ومش حيكون فى معارف فى التوكيلات, اللى بنقدر من خلالها نخدم بيها الناس فى بعض المشاكل اللى بتواجهم ,, لان الدنيا مش بتتحرك فى مصر ولا اى حاجة بتمشى الا بالمعارف , عشان تتظبط صح
وانا مش بطلب كلمة شكر .... لان لما بشوف مشاركة حد من الاعضاء وكنت بقالي كتير ما شفتوش واشوف مشاركته بطمن عليه وبكون مبسوط جدا بالروح والجو الاسرى اللى بينا اللى ماليان ود ومحبة فى الله
فمينفعش ندخل ونشاهد وخلاص , لان القسم ده غير اى قسم اخر فى اى موقع تانى سواء كان للسيارات او حتى لبرامج الكمبيوتر , القسم ده بقا قسم خدمى , وبيقوم على مساعدة الاعضاء لبعضهم البعض وتقديم خدمات ليهم والمقابل التكاتف بين الاعضاء وعدم المشاهدة
... ومحدش يقولى اعذار لان اللي بيخليهم يفتحوا المنتدي وكل يوم وباستمرار يوم وتلاتة واسبوع وشهر وكل مرة يدخلوا ويخشوا ويقرأو اكيد قدامهم دقيقة يكتبوا فيها رد لاي حد تعب وعمل مجهود علشان يوصلهم خدمة او معلومة ..
وبمشاركتهم دي هاترفع من معنوياته وتخليه يقدم كل اللي عنده وهو حاسس انه بيخدم اخواته من غير مجاملات او اي حاجة .
يعنى مشاركات الناس مهمة لاسباب كتيرة زى ما وضحت ,وحتصب فى مصلحة العضو قبل ما تصب فى مصلحتنا
وفعلا الفترة الاخيرة الواحد كسب اعضاء جدد فى منتهى الروح والجدعنة والطيبة

زى اسامة من اسكندرية وزى محمد فوزى وزى محمد نجيب وزى عمرو
تحياتى للجميع واتمنى زوال الظاهرة السيئة دى من قسمنا , والناس القدامى تدخل وتطمنا عليهم
والجدد يعرفونا عليهم اكتر
تحياتى للجميع

جزاك الله خيرا

وربنا يصلح الحال ان شاء الله