الموضوع: عاوز دكتور سنان محسش عنده بأى ألم ( انا عندى عقده من السنان )

السلام عليكم

انا اخدت تانى وتالت خطوه ( من فتره ) قليله .. كان فاضى 3 ضروس زى ما قلت لحضراتكم 2 فوق حشو والتالت ضرس العقل اللى هوه المصيبه

بدأت ب واحد من الضرسين اللى فوق واتعمله حشو مؤقت والجلسه اللى بعدها رحت عملتله حشو دائم ( بصراحه كان فى وجع بس مش أوى ) وتم على خير الحمد لله وده ب 80 جنيه فى مستشفى التوفيقيه فى عباس العقاد .. دكتور سامح

وبعدها قعدت بتاع اسبوعين واذ فجأه قررت انى اعمل ضرس العقل :| .. وفعلا رحت مكلم الدكتور بليل وقلتله يا دكتور انا هاجى اعمل العمليه بكره عندك .. وقالى تمام وحجزلى وقت وهوه ساعتين من 12 ظهرا ل 2 ..

ورحت بقى ( رحت شبه نايم على نفسى قلت يمكن أنسى الالم ) وطبعا من قبل ما اعمل العمليه وانا كنت حاسس انى هعيط واللى زاد الموضوع كميه الادوات الرهيبه اللى جابوها قدامى كل شويه يجيبوا حاجه وحسيت انهم جايبين كل الادوات اللى هناك ( بالمناسبه كانت كل الادوات جديده لانج فى اكياسها ) بس وراح عملى صورتين اشعه على الضرس وبعدها بدأت العمليه واخدت حقنتين وشويه الدكتور قالى اما تخس بمفعول البنج قولى وقلتله اما حسيت ومن خوفى بصراحه اما بدأ يشتغل قلتله لا لسه حاسس بألم وخليته يزود البنج كمان
بس بعدها بقى جابوا المشرط وانا كل شويه اغمض عينى وافتح تانى وكنت حاسس انى فى حلم والله لانى مكنتش نايم كويس ف كنت كل شويه اغمض عين واحاول اتناسى الألم فى الاول مكنتش حاسس ب حاجه بس بعد كده حسيت بوجع شويه ب شويه والالم بدأ يزيد وانا بعمل العمليه لان المده كانت طويله اوى حوالي ساعتين وشويه وبس فضل فيه ألم غايت ما الضرس اتخلع بحمد لله وجه وقت الخياطه
فعلا بقى وقت الخياطه ده اللى كنت شبه هعيط فيه والله العظيم انا من الالم كنت عمال أطلع فى صوت كده كان واحد ضربنى ب سيف ..انا بجد مشوفتش ألم زى ده .. مش عارف أوصف الالم ازاى فعلا !! وبس خلصت العمليه وكتبلى على ادويه كتير كده ومأكلش لمده يومين والتلج وكمادات على وشى ناحيه الضرس وبعد كده يبقى اكل خفيف غايت ما اخلص ال 4 ايام واكل شويه ب شويه
والحمد لله عانيت لمده اسبوع وبعد كده بدأت أكل عادى

ووبعدها رحت فكيت الخياطه برضه كانت مصيبه فكها من غير بنج وبرضه كانت مؤلمه جدا ..

وبس كل حاجه رجعت تمام الحمد لله وربنا ما يوريكوا وجع الاسنان

العمليه دى كانت ب 550 جنيه وقبلها رحت فطرت الصبح فى Mac كان جنب المستشفى وقلت للكاشير هناك عاوز اكبر ساندوتش كومبو عندكوا عشان كنت حاسس انى مش هاكل تانى

كده فاضلى ضرس واحد حشو فوق