سؤال هام لأصحاب الخبره في "نقل الجير" و "حرق الوقود"

**waeljimmy** · 25-05-2011 11:24 AM

السلام عليكم

إزيكم يا شباب ؟ يارب تكونوا جميعا بخير

أول حاجه:

- دلوقتي أنا قريت الكاتالوج كلو عشان ألاقي أي حاجه عن التليين ملقتش خالص
- مكتوب في الكاتالوج إن من أجل الإقتصاد في الوقود النقل بيكون : الأول = 25
الثاني = 50
الثالث = 75
الرابع = 103
وهكذا ......
إيه رأيكوا في الكلام ده؟؟؟
أنا بنقل لما أحس إن صوت الموتور علي هل ده أفضل للجير وللعربيه؟؟
قلت لنفسي بلاش صوت العربيه يعلى عشان أغير خليني لما عداد اللفات يوصل 3000 لفه في كل النقلات 1 أو 2 أو 3 مثلا يعني. لقيت إن أنا كده بنقل : الأول = 20
الثاني = 40
الثالث = 60
الرابع = 80
صح الكلام ده ولا غلط؟ يعني كده أحسن للجير والعربيه ولا لأ؟

- طيب لما تكون الدنيا زحمه ممشيش عالأول خالص؟ هل ده صح للجير؟ لما بمشي عالتاني بترجرج فبظبطها بالدبرياج
*على فكره أنا بعرف أسوق الحمد لله وكل حاجه بس عربيتي القديمه كانت "لادا" فمكنتش بخاف عليها من الحاجات دي

تاني حاجه:

- أول ما جبت العربيه كان معدل الحرق 8.6 لتر كل 100 كيلو
دلوقتي معدل الحرق وصل 9.5 لتر كل 100 كيلو!!! إيه ده؟؟؟؟ إيه العربيه الغريبه دي؟؟؟؟
وكان مكتوب في البروشور إن العربيه دي بتستهلك 6.8 لتر كل 100 كيلو. فالكلام ده كده مش مظبوط
أو معنى كده إن معدل الحرق بيتغير لوحده إزاااااااااااااي مش عارف

آسف جدا على الإطاله بس أنا محتار بجد في الحاجات دي

**mrwho1982** · 25-05-2011 12:20 PM

انقل اول ما الاربي ام يجي علي 3

وحاول ماتزودش عن 90 في اول اسبوعين

**Raul_7** · 25-05-2011 02:39 PM

هو انت لو لسه بتلين بيقي انقل علي 3 ربم كويس اوي, و يفضل أقصي سرعة ليك تبقي 120.

بعد التليين براحتك خالص, فيديو الجين ٢ بيقول يفضل انك تنقل ما بين 4.5 - 5.5 ربم و طبعا هو استهلاك البنزين هيزيد بس الموتور هيبقي فايق معاك علي طول.

الاستهلاك هيتحسن بعد ال ٥٠٠٠ و بعد ١٠٠٠٠ تقدر فعلا تقارن بالأرقام المكتوبة.

**midosalah** · 25-05-2011 06:19 PM

عايز اعلق على نقطتين
اولا فى الزحمة وانت ماشى بالراحة امشى على الأولانى عادى مافيش اى مشكله
ولكن بالعكس لما تمشى على التانى العربية بترجرج وده بيقولوا عليه الموتور بيكركر او بيسقف وده غلط على الموتور
وحضرتك بتقول انك بتعالج الموضوع ده بالدوس على الدبرياج برضه التحميل كتير على الدبرياج وانت ماشى بيأثر على الديسك والاسطوانه
دى نقطة
النقطة التانية
بالنسبة لمعدل استهلاك البنزين عموما بيتحسن بأستمرار
ولكن المعدل اللى بيظهر على شاشة كمبيوتر السيارة ده معدل استهلاك اخر 100 كيلو انتا مشيتهم وده بيتحدد بطريقة سواقتك لو بتحرق الرقم ده هيعلى معاك ولو بتمشى براحتك الرقم ده هيقل على الأخر
والمفروض لو عايز تحسب استهلاك البنزين تفول العربية على الأخر وتسجل عدد الكيلوات فى العداد او تشغل عداد التربtrip وبعد كده تمشى ولما تيجى تفول تانى فول على الاخر واحسب العربية مشيت كام كيلو وخدت كام لتر بنزين بكده تقدر تعرف معدل الاستهلاك

**RedBull_30** · 25-05-2011 07:02 PM

خد بالك ان استهلاك البنزين ل 100كيلو طريق سفر والعربية مرتاحة بيبقى اقل عن استهلاك بنزين 100 كيلو داخل زحمة .. الزحمة بتعتبر خدمة شاقة للسيارة لانك كل ما بتقف وتطلع بالعربية تاني بتستخدم طاقة اكبر للموتور عن وهي ماشية براحتها.. عاوز تحسب معدل الاستهلاك احسبه وانت مسافر مثلا على اي طريق صحراوي زي السخنة او السويس او اسكندرية

**waeljimmy** · 28-05-2011 12:13 PM

متشكر جدا والله على النصايح المفيده دي يا شباب أنا فعلا كنت محتاج أعرفها

**mememsaid** · 30-05-2011 11:58 AM

محدش عنده علم ازاي الواحد يفتح متور لعربيه اوتوماتيك

**eslam_wega** · 30-05-2011 01:04 PM

المشاركة الأصلية كتبت بواسطة mememsaid

محدش عنده علم ازاي الواحد يفتح متور لعربيه اوتوماتيك

عندك فى الفتيس 1 و 2 و3
1 ده الغيار الاول و2 الغيار التانى وهكذا وال d ده الرابع وباقى الغيارات
هتطلع على 1 الغيار الاول وتحرق للاخر الغيار
وبعدين تنقل على 2 الغيار التانى وتحرق لاخر الغيار
ونفس الكلام على 3 الغيار الثالث
وبعد ما تجيب اخر الغيار الثالت تنقل على d عشان تجيب الرابع وتحرق بقا لغايت ما تجيب السرعة القصوى طبعا الكلام ده فى طريق سفر زى السخنة مثلا
معرفتش تعمل الكلام ده احرق على الاول والتانى هيعملوا معك شغل حلو بردوا لكن السرعات العالية مع الحرق هتفتح معك المكنة بشكل افضل