الموضوع: صيانة الألف لو كنت عملتها لوحدى كان أريح

مبدأياً آسف أنا مش هاكتب اسم توكيل الصيانة فى اسيوط عشان يمكن حد غيرى عمل الصيانة هناك وعجبته عشان كده أحب أأكد إن الكلام اللى هكتبه فى الموضوع ده رأيى الخاص ومحدش ياخده مقياس
....أحب أوجه رسالة لأى حد من الصعيد خاصة أسيوط لو اشترى عربية نيسان جديدة يعمل حسابه فى سفرية للقاهرة فى صيانة الألف والأسباب فى القصة الآتية :
صيانة النيسان فى الصعيد فى أسيوط والأقصر - معرفش مركز الأقصر ولا حد كلمنى عنه - ولأنى من أسيوط أخدت رقم مركز الصيانة اللى فى ضمان العربية طلع غير موجود بالخدمة بعد أسئلة وصلت للرقم الصحيح وكلمتهم قالولى بكل زوق اتفضل حضرتك فى أى يوم احنا شغالين من 9 لـ 5 يومياً ما عدا الجمعة والحجز بأسبقية الوصول مفيش حجز تليفون
رحت الساعة تقريباً 11 لقيت مركز الصيانة مكان كده زى مخزن كبير وانا داخل خدو الرخصة منى دخلت جوا لقيت - معرفش ليه - عربية شيفروليه وعربيتين هيونداى وعربيتين صنى والدنيا كده هايصة سألت مين المسؤول واحد من الفنيين شاورلى على واحد سلمت عليه وقلتله عايز أعمل صيانة الألف قاللى اتفضل حضرتك قدام حضرت 3 عربيات وقدامك نص ساعة قلتله طب عربيتى هتاخد وقت ٌد إيه قال ربع ساعة بالكتير طبعاً كل واحد واقف جنب عربيته وبيحكى مع الفنى ومرة يقولولى معلش اركن العربية جوا لأ قدام شوية وهكذا لقيت واحد جاى يعمل صيانة الألف لصنى اتعرفت عليه ووقفت جنبه وحكينا وكده وانا عمال اتفرج عالصيانة وفرأيى الشخصى متواضعة جدا وتقريباً عشان تعمل حاجة معينة فالعربية لازم تكون خبير عشان تفهمهم يعملوا ايه فضلت واقف لغاية الساعة 1 فالحر بتفرج لغاية مازهقت فقلت للى كلمته وبعدين راح مشاور لفنى وقالله شوف يا عم فلان العربيتين دول - عربيتى والصنى - قالنا أى واحدة الأول - مع إن المفروض يكونوا هما اللى عارفين - قلتله أنا وصاحب الصنى الصنى الأول فضل فيها تقريبا ساعة إلا ربع عشان كان فيها مشكلة فى مياه التبريد كان بيقول العربية ساحبة هوا واكتشفت حاجة غريبة جدا جدا جدا إن صيانة الألف عندهم مفيش تغيير زيت قلتله ليه قاللى الزيت اللى فيها يمشيك لغاية 5000 بس انت غيره على 4 أو أقل لو عايز لقيت اللى قبلى ماعترضش قلت يمكن الصيانة كده فى أى مركز المهم بعد ماخلص الصنى قلتله حضرتك أنا ظروفى إيه قاللى بس لما بيارة تفضى كانت الشيفرليه اللى كانت موجودة لما جيت ومشيت كانت رجعت تانى المهم بعد ماحنوا عليا والمفروض إن عربيتى ابتدوا فيها قلتلهم أنا فى حاجة عندى فى زجاج السائق إنه المفروض يكون تلقائى لتحت وتلقائى لفوق تكتين فوق وتكتين تحت عندى بينزل تلقائى تحت بس لفوق لأ قاللى الكهربائى مجاش النهاردة ابقى اتصل بكرة المهم وفتح كبوت عربيتى جاب مفاتيح وقعد يربط كام صمولة كده فالعربية تقريبا 10 وبص على الزيوت بعينه كده وقاللى اتفضل نخلص أمر التوريد ودفعت 27.5 جنيه وكتب فى الفاتورة تقريط عالعفشة وكشف سوائل وكده الصيانة خلصت واديت الفنى 10 جنيه حسيت إنه مستنيها ومشيت الساعة 2 وشوية.
تيجى ملاحظاتى اللى ممكن تكون غلط :
1 - سمعت وشوفت هنا كام موضوع إن فى كشف بالكمبيوتر فى الصيانة هناك الحاجة المتقدمة اللى شوفتها هية جهاز الترصيص فيه شاشة رقمية.
2 - بالنسبة للنضافة الصراحة عشان ماظلمهمش والفنى بيشوف العربية جه واحد شكله عامل نضافة مسح العربية بفوطة زفرة - طبعا العربية ولا كأنها اتمسحت حتى بمنديل ورق - .
3 - اتصلت بعدها بيوم بالمختص فى مودرن موتورز اللى باعلى العربية سألته هو فى تغيير زيت فى صيانة الألف قاللى طبعاً حكيتله قاللى ازاى ده أنا برة دلوقتى أول ماروح المكتب هاكلم نيسان يكلموا الصيانة هناك وتروح تغير زيت عندهم وانا أصلا سافرت تانى يوم سوهاج شغلى ومرجعتش تانى .الغريب انه كان مستغرب جداً ازاى مغيروش زيت وهناك شبه حاجة أكيدة ان مفيش تغيير زيت ازاى ده يكون مركز صيانة معتمد
معلش دول الملاحظات اللى فاكرها آسف إذا كنت طولت عليكم

المشاركة الأصلية كتبت بواسطة samsong

اخي الكريم ماهو اسم مركز الخدمه . يكفي انك قلت ان ده تجربتك ولكن يمكن ياكد عضو اخر تجربته وبالتالي نعرف كما ان الاخوان هنا لهم اتصالات ليرتقي مستوي خدمه الصيانه

المشاركة الأصلية كتبت بواسطة ahmed.tv

اعتقد ,, الكرنك

مفروض تغير زيت وفلتر , والمصنعية مجانا فى صيانة الالف

بصراحة الصعيد ناقصه مركز خدمة محترم يتفتح فيها

ومفروض يكون عندهم جهاز كمبيوتر , عشان يكشفوا على العربيات ,, وكان فى عضو قبل كدا زمان راحلهم قبل كدا وقالوله معندناش جهاز كمبيوتر

فمش عارف شركة نيسان مستنية ايه

ياريت حضرتك تتصل 16244 وتقولهم على الموضوع ده , لانه ضرورى جدا , مركز معتمد ومفهوش اجهزة كمبيوتر صعب جدا

الكرنك ده أظن مركز الأقصر لكن مش هو
هوة مركز ناشيونال موتورز
الغريب مش ان مفيش كمبيوتر يمكن مشكلة إمكانيات مع إن المفروض نيسان قبل ما تدى اعتماد لمركز صيانة تحط شروط معينة ومنها جهاز الكشف الإليكترونى لكن الغريب موضوع الزيت ده لأن الكشف بالكمبيوتر بيكشف الأخطاء واحتمال مايكونش فى أخطاء لكن تغيير الزيت بيأثر عالعربية ازاى يكون كده
العربية عاملة دلوقت 2000 كيلو تقريبا ولسه مغيرتش زيت