كيف تتجنب تكون الشبورة على زجاج سيارتك؟

**جندى مجند** · 26-04-2007 04:00 AM

المشكلة دى بتقابلنا كتير جداً فى فصل الشتاء و حتى فى الصيف عند ركن السيارة فى مكان مفتوح ليلاً و نسبة الرطوبة فيه عالية زى مثلاً الأماكن المفتوحة داخل اسكندرية و فى قرى الساحل الشمالى و غيرها .... بنلاقى الزجاج الأمامى و الخلفى تكونت عليه شبورة تحجب الرؤية و تسبب خطراً شديداً عند محاولة قيادة السيارة على هذه الحالة ... و الحل بسيط جداً و يتلخص فى الخطوات الخمس التالية (انظر الشكل المرفق):

1- شغل مروحة هواية الصالون على أقصى سرعة لها
2- غير اتجاه دخول الهواء الى الزجاج الأمامى
3- تأكد من أن الهواء الداخل متجدد و ليس معاد تدويره
4- تشغيل التكييف البارد
5- تشغيل سخان الزجاج الخلفى

فى حالة عدم وجود تكييف بالسيارة يفضل فتح نافذة أو نافذتين فى السيارة و فى حالة وجود أمطار يمكن الاكتفاء بفتحة صغيرة للنوافذ --- الخطوات أعلاه لا يشترط الترتيب فيها و لكن يجب اجراؤها كلها للحصول على أسرع نتيجة ممكنة (ستلاحظ اختفاء الشبورة فى خلال ثوان معدودة فور تنفيذ الخطوات أعلاه و لكن يفضل عدم اطفاء المروحة و التكييف الا بعد مرور دقيقة أو اثنان)

**Abdallah** · 26-04-2007 05:15 PM

وبكدة نقدر نتخلص من الشبورة اللعينة ويجيلنا برد :D
طبعا مش محتاج انى اقول انى بهزر بس عموما انا حسب التجربة لقيت ان التكييف لما بيشتغل على الساخن بيشيل الشبورة الداخلية اسرع من البارد ولكن يا ترى مفيش اى مواد او حاجة ندهن بيها الزجاج تمنع تكون الشبورة او الضباب او مثلا نوع من انواع الزجاج بيمنع تكونها من الاساس؟؟

**Nader** · 26-04-2007 05:33 PM

اعتقد صعب اوي تشغيل التكيف البارد على اخرة في الشتاء. انا اعد في البيت احسن :D

27-04-2007 03:24 AM

كلها حلول نضيف لها انك ممكن تمسح الشبورة بفوطة او ورق مناديل --ولكن هناك طرقة اخرى تجنبك هذة المشكلة وانت سائق سيارتك --وهى وحسب قانون المرور -- بيقول انة ممنوع منعا باتا ان تقوم بقيادة السيارة وهى مشبرة --ولهذا لابد ان تقوم بأى من الخطوات التى ذكرتوها قبل القيادة --اما لو حدثت --اثناء القيادة فيجب عليك كقائد للسيارة ان تأخذ الاحتياطات المفروضة لتتجنب الوقوع فى مشكلة --طبعا مفروض ان الهواء البارد بيجيب نتيجة اسرع ولكن الهواء السخن بيجيب نتيجة افضل وتستفيد منها وقت اطول --الفوطة او المنديل تجير الزجاج وتحجب الصورة بشكل كبير --فتح جزء بسيط من الشباك من افضل الحلول -ولك ان تراعى ان لا تصاب بالبرد ----الوقاية خير من العلاج --

**sherio** · 27-05-2007 08:09 AM

lالموضوع مفيد اوى
merciii

**a_c_loma** · 27-05-2007 08:34 AM

طب واللى معاه شاهين يعمل ايه مفيش تكييف ولا سخان زجاج ولو المروحة ربنا كرمها واشتغلت مش هطلع هوا سخن او ساقع دى هطلع تراب وطين واحتمال تطلع دبان وحشرات فتاكة انا عن نفسى اما الاقى الشبورة جات على الزجاج بتاع العربية بحته قماشة بمسح دايرتين فى الزجاج علشان اعرف اشوف وبوكل امرى لله
ويجعله عامر