محتاج ارأكم و اقتراحتكم ضرورى

**mohamedfakes** · 31-05-2011 04:45 PM

بسم الله الرحمن الرحيم

يا جماعة بصراحة انا محتاج مساعدتكم كتير :
انا عايز اشترى عربية و معايا فى حدود ( 30 : 35 حد اقصى كاش ) و عايز اشترى عربية ( طبعا هاتشباك ) .
و انا كل مشاويرى يوميا بروح الشغل من حدايق القبة ل زهراء المعادى و ليا سفر اسماعلية من ( 2 : 3 ) مرة فى الشهر و قليل جدا لما بنزل الجامعة ( الامتحانات بس تقريبا ) .
غير فى الصيف بسافر الساحل مرة او 2
هى دى كل مشاويرى المستمرة تقريبا
و عايز اقتراحتكم ليا اجيب عربية مستعملة و اريح نفسى من القسط كل شهر
ولا اجيب جديد تقسيط بس المشكلة انى مش هاقدر ادفع اكتر من 500 بالكتير فى الشهر .
و يا ريت ياجماعة بلاش الماروتى علشان انا طويل و هتكون متعبة قوى ليا دا غير ان مافهاش اى اوبشن
اه نسيت انا يا دوب بعرف اسوق يعنى لو وقفت منى هسيبها مكانها وش

يا ريت تقولولى اجيب ايه و هتكون بكام و يا ريت يكون فيها [gdwl]تكيف و زجاج و باور ؟؟؟؟[/gdwl]

**mohamedfakes** · 31-05-2011 09:06 PM

ايه يا جماعة مفيش حتى حد يقولى
اركب اتوبيس احسن

**mahgary** · 31-05-2011 09:09 PM

شوف كيا برايد وسعه من الداخل وصيانته كويسه

**Scuderia.M** · 31-05-2011 09:23 PM

بس إنت اللي عندك في الحدود ده الاتي:
Opel Corsa
Seat Ibiza
Ford Fiesta
Kia Pride

دول اللي أنا فكرهم دلوقي, أول تلاتة options عالية (تكييف وpower وكده) بس قطع غيار وصيانة صعبة شوية, الkia عربيه تحفة, كانت معايا قبل الcorsa... قطع غيار رخيصة وصيانة سهلة ومفيهاش تعقيد أو تكنولوجي عالي, بس مفيش options.

شوف إنت إيه اللي يناسبك من دول, عايز راحه وتكنولوجي عاليه نسبيان بس مصاريف أكتر إلى حد ما, ولا عربيه عاديه بس اقتصاديه؟

آه وفي كمان fiat punto
وطبعا الgolf mk2
بس بصراحة معنديش معلومات عنهم

**mohamedfakes** · 31-05-2011 09:23 PM

دى جديد و لا مستعمل وهى تستحمل المشاوير دى و فيها الاوبشن دى ولا لا ؟
معلش بقى هتعبك معايا

**mohamedfakes** · 31-05-2011 09:25 PM

شكرا جدا على الرد (Scuderia.M)
يعنى انت شايف انى اجيب مستعمل احسن من جديد قسط

**Scuderia.M** · 31-05-2011 09:36 PM

هو أكيد الجديد هيبقى أحسن عشان هتريح دماغك من التصليح وقطع الغيار فترة كويسة, بس أنا طبعا مش عارف ظروفك إيه...
بس لو إنت لسة بتسوق جديد يبقى أحسن تجيب حاجة مستعملة تتعلم عليها لحد ماتبقى تمام إن شاء الله وبعدين هات حاجة زيرو عشان حرام تبهدل عربيه زيرو في الاول

**graffittiii** · 01-06-2011 10:02 AM

هيونداي أكسنت 99 ... أيوه هي مش هتشباك بس دي اللي هتسافر معاك الساحل أو الإسماعيلية وفيها الأوبشنز اللي أنت عاوزة لو كان صاحبها مدلعها ...ويسلام لو كانت 1500 سي سي ..
لو هتشباك بقي ف السعر ده في :
- سيات إبيزا ( ممتازة شرط الحالة ) .
- بولو (قطع غيارها غالية وأنت لسه بتتعلم ).
- كورسا (قطع غيارها غالية وأنت لسه بتتعلم ).
- فورد فييستا ( قطع غيارها غالية جدا جدا وأنت لسه ...... )
- فيات بونتو ( مش هينفع أقول فيها كلمة وحشة لإنها معايا إسال حد محايد )
- كيا برايد هتشباك ( عملية جدا لكن شكلها مش عاطفي ) .
- فيات أونو ( عملية وقطع غيارها كويسة ومتوفرة ).

ولازلت عند رأيي ان حسب كلامك ف أنسب حاجة ليك هي هيونداي أكسنت ...... وربنا يوفقك ف الإختيار ..

**mohamedfakes** · 01-06-2011 10:49 AM

مرسى جدا على المعلومات دى
بس مش عارف ليه حاسس انك فرحان انى لسه بتعلم
d:

**modo88** · 01-06-2011 12:07 PM

هوا مش فرحان بس بيديك النصيحة الصح ياباشا
لانك فعلا لسه بتتعلم ومعرضه انه تتخبط لا قدر الله فالقصد انك تخليك في حاجه قطع غيراها رخصيه
وفعلا الاكسنت حلوه وهاتسد جامد معاك وقطع غيراها رخصيه مع انها مش هاتش باك