العلاقة بين العمرة وتقل السحب

**moudy2002** · 24-04-2008 05:17 PM

اخوانى وحبايبى فى المنتدى الجميل
انا عربيتى اكسنت 1500 انجيكشن .. المهم انا عملت عمرة كاملة للموتور و الميكانيكى قلى الين 1000 ك
المهم انا خلاصت الالف بس حاساس ان العربية غريبة علية!!
السحب مش زى الاول خالص بجيب 100 ك بالعافية وفعلا انا مضايق جدا من الموضوع دة ومش عارف سببة اية
طقم الدبرياج بصيت علية وانا بعمر وكان سليم غيرت البلية بس وغيرت ايضا سير الكاتينة والبلية وخايف فعلا ان العيب يكون من تقسيمة سير الكاتينة وهى فعلا الى عاملة ضعف السحب دة ...
طبعا غيرت البوجيهات والسلك

انا محتار .... هل ضعف السحب دة بسبب ان الموتور لسة تقيل حتى بعد ما خلصت الالف كيلو ! وهل لو طلع دة العيب المفروض الموتور يرجع سحبة تمام بعد اد اية ؟؟
هل ضعف السحب بسبب خطأ فى سير الكاتينة والتقسيمه ؟؟
ملاحظة صغيرة زيت الموتور زايد عن علامة ال max حوالى 2 مم هتفرق فى حاجة ولا اروح انزل الزيت الزيادة احسن ؟؟

معلش طولت عليكوا بس فعلا انا مضايق جدا لانى صرفت كتير ولسة مش حاساس بالفرق الى مفروض القية ؟؟
وشكرا

**فادى** · 24-04-2008 05:32 PM

فعلا المحرك بيبقى تقيل فى أول العمرة و بيستمر كده لفترة كبيرة عشان يبدأ يفوق تانى, عموما بعد ألف ل5 ألاف كيلو كمان هيبتدى يرجع لطبيعته, سواء العربية عاملة عمرة أو لسه جديدة بتحس انها "قافشة" فى بعض ده شىء طبيعى, لكن العزم بيبقى أفضل فقط.

**moudy2002** · 24-04-2008 05:53 PM

شكرا اخى فاددى على الاهتمام انا فعلا بحس انها قفشة ولكن حاساس قعلا ان الموتور عفى والعزم احسن.. طب السؤال التانى بما انا العربية بتاخد وقت فى التجميع .. هل اقدر اسافر بيها اسكندرية بكرة وابقى ماشى على 120 او 130 ولا كدة انا ههلك الموتور بما انه لسة تقيل مع العلم انى هكون مضطر ازود رجلى على البنزين علشان اقدر اوصل للسرعة دية مع اعتبار ان مقرص على العربية و الrpm مش هيعدى 4 ..
وشكرا

**فادى** · 24-04-2008 06:09 PM

المشاركة الأصلية كتبت بواسطة moudy2002

شكرا اخى فاددى على الاهتمام انا فعلا بحس انها قفشة ولكن حاساس قعلا ان الموتور عفى والعزم احسن.. طب السؤال التانى بما انا العربية بتاخد وقت فى التجميع .. هل اقدر اسافر بيها اسكندرية بكرة وابقى ماشى على 120 او 130 ولا كدة انا ههلك الموتور بما انه لسة تقيل مع العلم انى هكون مضطر ازود رجلى على البنزين علشان اقدر اوصل للسرعة دية مع اعتبار ان مقرص على العربية و الrpm مش هيعدى 4 ..
وشكرا

مادام خلصت فترة التليين مفيش مشكلة لكن حاول برضو متخليش المحرك على سرعة عالية لفترات كبيرة يعنى حاول يكون الأربى ام على 3-3.5 فى أغلب الأحيان و ده مش بس عشان لسه عامل عمرة لكن فى معظم الأحوال ابقاء المحرك على سرعات عالية لفترة كبيرة بيقلل عمره الافتراضى و الأفضل انك تحاول دائما المحافظة على سرعات قليلة للمحرك لكن بتوازن بحيث تتجنب الصفع, عشان تحافظ عليه لأفضل فترة ممكنة.

**muslem** · 24-04-2008 06:57 PM

اظن برضوة لازم الزيت يكون مش اكتر من max

**Ahmad Allawy** · 25-04-2008 03:30 AM

مودي بك..
عامل ايه يا باشا..؟؟
يا رب العربية تكون بخير و زي الفل..
فيما يخص موضوع السحب و الكلام ده..
انت دلوقتي عملت عمرة كاملة.. يعني ركبت بساتم و شنابر جديدة محكمة جدا علي مقاس الشمايز..
اللي هي الاسطوانات اللي البساتم بتتحلاك جواها..
ونتيجة لكده البساتم لسة مش بتتحرك براحتها زي الاول..
يعني لما كانت العربية موتورها خفيف.. البساتم كانت بتجري وكانت بتسحب اكتر..
عموما متقلقش.. دلوقتي اكيد العربية احسن.. متستعجلش علي السحب..
انا مش فاكر بصراحة بعد ما عمرت العربية رجعت لطبيعتها بعد قد ايه بالظيط..
بس غالبا كان بعد حوالي من 3 الي 3.5 الف كم..
وهتبقي عادي جدا.. ترجع زي الاول..
الشد بيها شوية و القرص عليها اسمه تفتيح الموتور.. بيوسع الاماكن اللي الشنابر بتتحرك فيها شوية عشان العربية تسحب و تجري معاك.. ودي حاجة متستعجلش عليها ابدا..
عشان دي بتقلل من كفاءة الموتور.. خليك علي راحتك..و علي مهلك.. لحد ما تمشي شوية حلوين بالعربية..
موضوع الزيت عادي مش مشكلة.. لأن لو الزيت وصل للدرجة الخطيرة الزيادة يعني هيطلع من فتحة الفائض متقلقش منه.. وبعدين ده مش كتير يعني.. عادي
ربنا يوفقك و ييسر امر العربية معاك ان شاء الله..

**mohamed ibiza** · 25-04-2008 03:41 AM

متقلقش تماما العربية زي وا قالوا زملائي في الردود السابقة يعتبر لسه قافش الموتور لما بيكون خفيف بيسحب و بيجري جامد زي ما يكون مفيش حاجة ماسكاه انما العمرة يعني خرطت الشمايز و غيرت البساتم و الشنابر بقت محكمة علي البساتم و البساتم مبقتش تلوء في حركتها علي الشمايز و بلاش تقرص علي العربية عموما سواء معمر او لا لانك كده كده بتقصر في عمره زي ما قال فادي و خد طريقك واحدة واحدة و بلاش Rpm عالي خليك في سرعة 100كم\ساعة 110 بس تجيبها من غير قرص يعني سيب العربية تاخد وقتها في التجميع متقرصش عشان تجيب بسرعة اديها وقتها و هترجع زي الفل ان شاء الله بعد الفين 3 كده يكون الموتور خد و ادي و هيرجع احسن من الاول....

Ibiiiiiiiiiiiiiiiiiiiiiiiiiiiiiiizzzzzzzzzzzzzzzzz zzzzzaaaaaaaaaaaaa For Ever

**moudy2002** · 25-04-2008 04:49 PM

كل الشكر ليكم جميعا أ/ فادى . طبعا احمد بية الى حضر وشاف العمرة عند الميكانيكى وكان جنبى وقت بوقت .. ونصايحة ليه طول فترة العمرة والتلين كمان .
واكيد شكر خاص ل king السيت محمد بك

انا كدة اطمنت على الموتور والفضل لله ثم ليكم جميعا
وافر الشكر والتحية والاحترام
اخوكم
محمد