المشاركة الأصلية كتبت بواسطة eng\ahmed
ربنا يخليك ياباشا
لما الناس تسمع كلمة فورد يجيلها قشعريرة ورعشة وحالة من الهلع
اية ياعم دة كلة؟
اصل الفورد ملهاش قطع غيار وناااااااار ومش عارف ماركات اية برقبتها
تخطف رجلك على التوكيل تسأل على النار وتدخل وانت مقلق لا تتلسع تلاقى
كشاف ب 600 جنية .... وتلاقى الصنى ب 900 والياريس بلاش الكورولا ب 750
فانوس خلفى ب 300 جنية ... وتلاقى الصنى 600 والياريس 650
مساعدين امامى ب 1500 ... والصنى برة التوكيل ب 1400 والياريس فى التوكيل 1400 وفى نفس الوقت تلاقى الماتريكس المساعدين الخلفى واحد صاحبى جايبهم من التوكيل 1600
دول اللى فاكرهم دلوقتى بس لو قارنت باقى قطع الغيار هتلاقيها من ارخص قطع الغيار فى فئتها بالرغم من امكانياتها ... بس بردة اسعارها ناااااااار
الاوبل نفس الوضع قطع غيار غالية وعربيات كلها مشاكل وتعبانة , تلاقى الفكترا بتمن اللانوس والفوكاس والميجان بتمن كورولا موديل اول تسعينات !!!
طيب اية السبب ... نفكر ونحلل
للأمانة الكورى واليابانى عربيات عملية لواحد عايز عربية والسلام (الموديلات القديمة) ولكن بحسابات الورقة والقلم وهاخد اية واكسب اية لأ الوضع مختلف...
اليابانى القديم عربيات صيانتها سهلة وبسيطة غير معقدة وقطع غيارها رخيصة بس دة بالنسبة للقديم يعنى لانسر كريستالة وكورولا لواءات وهى دى فعلا العربيات اللى عملت سمعة لليابانى فى مصر عربيات التمانينات والتسعينات
انما الكورولا الجديدة واللانسر والسوبارو وكل اليابانى الجديد اللى اتملا حساسات وكلام من دة معتقدش ان الوضع هيفضل زى ماهو لأن الحساسية اللى بتيجى من الحساسات والكمبيوتر والحاجات دى بقت فى اليابانى والكورى كمان يعنى بردة العربية محتاجة توكيل او متخصص مش بلية الميكانيكى والفهلوة ...
وبالرغم من ان اليايانى الجديد بقى معقد وصيانتة مش سهلة وفقد ميزتة تلاقى فى ناس بتئاوح وتقولك بردة لأ اليابانى ارخص بالرغم من ان الواقع بيقول عكس كدة , لانسر مكوة اغلى من البومة ال 1.3 وكورولا اللواءات وبشهادة ركيبة تويوتا برقبة كل الكورولات اللى بعدها وغيرة كتير
تقولة اسعار العربيات مبالغ فيها يقولك بس سعرها فيها
تقولة قطع غيارها غالية يقولك بس معمرة !!! والتوكيل يرفع اكتر والناس بتشترى وعاجبها العربيات , ربنا يبارك لهم لكن لما تسمع ماركات تانية متتكلمش على السمع وجرب واسأل وبعدين احكم
مشكلتنا اننا لا نتقبل كل ماهو جديد دايما بنحن للماضى وايام زمان انما المستقبل خارج الحسابات