الموضوع: للمرة الثانية ! حسبى الله ونعم الوكيل

المشاركة الأصلية كتبت بواسطة عمرو عمارة

دي الصورة إلي واصلة لحضرتك عن هذه الجماعة من الإعلام القذر والأفلام والمسلسلات إلي خوخت جوه عقول المسلمين وغير المسلمين

هذا اللباس موجود من زمان في المجتمع والناس كانت بتتعامل معاه طبيعي جداً ( راجل سني أو الجماعة السنية ) وبعد أحداث التسعينات من جماعة التكفير والهجرة أمريكية الصنع.....ساهم الإعلام الموجه والحكومة عن طريق المسلسلات والأفلام من تعميم هذه الصورة على جميع الملتزمين حتى ينفر منهم الناس مثلما يفعلون الأن

مش مسالة اعلام قذر او غير قذر ... ماشي الاعلام ساهم في دور .. بس في حاجة تانية غايبة على حضرتك ...

سيبك من موضوع ان اللحية و الجلباب سنة او الاديان خالص ..

لنفترض للحظة ان حضرتك ... شخص ابيض اللون و عايش في مجتمع ابيض وسط ناس بيض من يوم ماوعيت على الدنيا و متعرفش غير دول ولم تخالط غيرهم ..

فجاة طلعلك واحد اسود ... لا هو صديق ولا عدو ... شخص معدي بس كدة ... اول رد فعل لاي شخص "سوي " انه "حيستغرب ؟" ... ايه ده هو في شكل تاني مننا مثلا ؟ او لون ؟

نيجي هنا بقى لدور الاعلام .. لو الاعلام نشرلك صورة سيئة حتى لو لفرد واحد من السود دول بيعملوا حاجة وحشة ... اي حاجة مش شرط ايه هية .. بس مش كويسة وخلاص ...

تاني مرة حتشوف الراجل الاسود ده حتحس بايه ؟؟ مش حتخاف طبعا .. بس حتستغرب اكتر و اكتر ...

تعالى بقى ... سافر و اجد نفسك مثلا في بلد افريقي مفيهوش غير سود ... حتحس انك خايف اكتر واكتر !

وحتى لو الشخص الي قدامك ده معلكش اي حاج !

ارجع لموضوعنا .. (مع احترامي طبعا للناس البيض و السود انا بضرب مثال لا اقصد اي اهانة عرقية او حاجة و المثال العكس صحيح برده ).

فرضا انا مصري ... ربيت في بيت مصري في القاهرة ... مسلم والحمد الله و كل عائلتي كذلك لكن لم ارى شخص ذو لحية او جلباب الا نادرا او مش نادرا .. احيانا ... وانت صغير طبعا مش فارق معاك مين بذقن و مين مش بذقن .. اهم حاجة مين بيسيبك تعمل الي انت عايزه و يديلك فلوس :)

تعالى نكبر شوية و نتابع الاخبار ... بن لادن نيل ... بن لادن سوا ... جماعة مش عارفين مين خطفوا مش عارفين مين و ذبحوه في شريط فيديو ... الناس دي لابسة ايه ؟ جلباب و مربية ذقنها ..

هل معنى كدة ان حضرتك انت او اي من الاخوة الي بيناقشوا بتعملوا كدة او حتى حتعملوا كدة ؟ على الاطلاق !! بس
حتى كخبر مش كاعلام تحريضي ... بدون وعي مني او من اي شخص ..

ربط عقلي الباطن شكل حضرتك بشكل الناس دي دون اني انا ادري حتى او اتكلم ...

ضيف عليها بقى الاعلام المسئ و ضيف عليها احداث اخرى و ضيف عليها ان مفيش حد بشوفه بيدافع الا نادرا ! تبقى النتيجة الفعلية ايه ؟

خوف ! اه طبعا خوف ... ناشيء عن جهل ناشي عن اي حاجة بس موجود !

العيب مش عليا انا على فكرة .. انا مواطن مصري زي زيك ... العيب علىكم انتم انكم ملكمش اعلام ...
في الاونة الاخيرة الموضوع اتحسن شوية بالقنوات الفضائية و الدعاة و خلافه ..

عمرو خالد مثلا ... شخص اختلف عليه الكثير لكن قدر يوصل برده صورة بسيطة ان مش معنى انك سني او حاجة انك ارهابي ... و هكذا !

في درجات بقى من الخوف ده ... في ناس مثلي مثلا عمري والله ماحسيت ان الشخص الملتحي المصري ده مثلا ارهابي ولا حاجة بالبعكس اانا ممكن ائمن لنفسي اكتر مثلا و انا ماشي و في شارع معرفش فيه حد و شوفت فيه ناس ملتحية ..

في ناس تانية لأ العكس تماما ! واحد مثلا شاف عربية نص نقل فيها 4-5 اشخاص سنيين لابسين جلباب و مربيين ذفنهم ! اول حاجة حتيجوا في ذهنه فيلم شافه او حاجة كدة انهم ارهابيين !

طبعا ده دور الاعلام صح .. بس برده دوركم انتم انكم تردم عليه .. مش المواطن البسيط هو الي المطلوب منه انه يفرق ! لأ !

و بتيجي بقى بافعال بصراحة منافية للمنطق زي الاخ صاحب الموضوع الي كان معجب بشخص معروف عنه انه ارهابي اتعمل من امريكا لخدمتها في حرب معينة و قلب عليهم بعدها !! و يصفه انه شيخ و بطل و يحتسبه شهيد كمان بينما "يتعذر" عليها او بصعوبة شديدة يقول انه الي ماتوا في ثورة 25 يناير شهداء !!!!

حتقولي احنا بشر و برده و بنغلط ماشي .. انا مقلتش حاجة بس متلومش الناس على شعورها برده هما بشر !

كل ده و انا بتكلم على مصريين مسلمين ... يعني اقل حاجة حبقى متعاطف معاك علشان انت مصري مسلم زي .. مابالك بقى الصورة الي مرسومة لشخص مصري غير مسلم او اجنبي عايش في مصر او برة ؟؟

عقبال متصولوا الصورة حتتحول انت ( مش بكلم حضرتك كشخص ) الى وحش مفترس يفجر اي شيء امامه بالنسبة له !

وزي ماقلتلك الموضوع نسبي من شخص الى شخص حسب التربية و التعليم و الدين طبعا .

تقبل تحيتي .. وارجوا ان حضرتك تفهم كلمة "انت" مش لشخصك , شكرا .