الحقوني يا جماعة ( بقعة زيت تحت عربيتى )

**Usama Nagi** · 09-06-2011 04:08 PM

المشاركة الأصلية كتبت بواسطة ahmedesmat1987

على فكرة ايا كان السبب اسكاترا ولا علبه باور متدفعش ولا مليم دا عيب صناعه يا عيب تقفيل والدليل انها مكملتش 10000 كيلو .................. وعايزك لما تروح هناك متكونش متساهل معاهم واقلبلهم وشك واقعد اشتكى وبين مدى استيائك من اللى حصل واد ايه انت اتضريت ........ وربنا معاك

انا متفق مع الرأي ده غير انت بتقول لسه راجع من الصيانة يعني المفروض المهندس هناك يلاحظ المشكلة دي قبل ما تكبر كده

ما تسيبش حقك انت في الضمان بس روحلهم بصور الفواتير وخلي معاك الأصل علي جنب للأطلاع فقط

**arakysolom** · 12-06-2011 02:18 PM

السلام عليكم
احب اطلع حضراتكم علي تطورات الموقف
في نفس اليوم اللي اكتشفت التسريب كلمت منصور العامرية و بلغت المهندس علي التسريب و لون الزيت و قالي دي سهله دي اسكاترا و ممكن تروح فرع سموحة قريب ليك و فعلا انا كنت ناوي بعد مواعيد العمل اني اروح بالعربية سموحة و لكن لفت نظري احد زملائي بالعمل لخطورة نقل السيارة و خليهم هما اللي ينقلوها علي مسئوليتهم و معملتش بنصيحته الا لما رحت اخد العربية عشان اروح التوكيل قلت ابص علي مستوي الزيت و لقيت ان علبة زيت الباور مفيهاش غير التلت بس وهنا اتصلت بيهم و قلتلهم انا مقدرش اتحرك بالعربية بالشكل ده ياريت تتصرفوا و طلبت انهم ينقلوها بكساحة للمركز و بعد ما اتفقت معاهم انهم ينقلوها علي حسابهم لقيت واحد بتاع كساحة بيتصل بي بيقولي حضرتك معاك عربية رينو عايز تنقلها المبلغ 150ج قلتلوا العربية شيفروليه و حضرتك حتحاسب التوكيل .... المهم كلمت المركز و قالي حاسبوا و هات فاتورة و احنا ندفعلك بس برده الكلام الجميل بتاع منصور مدهون بزبده و التجربة خير برهان
المهم كلمت المهندس و قلتله علي مشكلة ان الزيت فضي فقالي حخلي المهندس يجيلك يشوف العربية و حيتصرف المهم بعد ساعة كلمني مهندس سموحة و قالي ياريت تيجي تاخدني لأني معرفش اوصلك مكدبتش خبر و رحت لسيادته بتاكسي عشان اخده ملقتهوش و قالولي راح يجرب عربية بعد ما وصل قالي ايه المشكله و شرحتلوا و الفني قالوه دي اكيد سكاتره فقالي خلاص انا حاجي معاك و ناخد العربية و حتبات و بكرة الصبح نشتغل فيها طبعا كانت الساعة 5.30 مساء و هما بيقفلوا 6 قولتلوا خلاص و بعدين قال طيب استني بدل ما ننقل العربية علي الفاضي نشوف المخزن فيه قطعة الغيار و لا لأ ؟؟؟
المخزن رد عليه بأن مفيش غير قطعتين و محجوزين لعملاء و ان القطعة حتيجي يوم الاثنين طبعا قولتلوا الاتنين بعيد و مش حينفع قالي خلاص انا حتصرف و اوفرلك واحده بس خلينا يوم الجمعة عشان بكرة الخميس معنديش صنيعية قولتلوا خلاص يا باشمهندس مفيش مشكلة رد عليا انشاء الله حبعتلك واحد يوم الجمعة الصبح بالزيت و حياخد العربية و انشاء الله تصلي بالعربية ...
يتبع ...

**arakysolom** · 13-06-2011 01:58 PM

يوم الجمعة 10.30 ص جاء المهندس و معه فني الي مكان السيارة و تم الكشف عليها و قال الفني لما نزل تحت العربية ان علبة الدركسيون جايبة زيت و فيه زيت بينزل من طبة الموتور المهم حط زيت باور و قام المهندس بقيادة السيارة الي المركز و تم رفعها علي الكوريك وهنا كانت المفاجأة الكبري ان الكارتيرة مشروخة من عند صامولة طبة الزيت شرخ بطول عقلة الاصبع و مفيش اي اثار لخدش او حكة او خبطة و هنا انا ادركت ان الفني بتاع توكيل العامرية لما كان بيغير الزيت تسبب في شرخ الكرتيرة المهم شاف المهنس الشرخ قالي مين اللي اشتغل في العربية قلتله طبعا معرفش مين هو المفروض اني اعرف الفني اللي اشتغل في العربية و هو ممنوع ادخل جوة الورشة اثناء الصيانة ؟؟
المهم انتظرت حتي صلاة الجمعه و بعد الصلاة بدأ الراجل الفني (عبد الرحمن) راجل ممتاز في حل اللاسكاترا و تركيب الجديدة و خلص شغله و راح يضبط زوايا سألت المهندس عن تغيير الكارتيرة قالي حضرتك تروحلهم في العامرية يغيروهالك هنا جن جنوني يعني ايه حضرتك اجي التوكيل بمشكلة تسريب زيت تقولي روح العامرية انا مش مسئول عن اخطاء منصور انا جيت هنا في توكيل منصور و مش منقول بالعربية لحد مترجع سليمة زي الاول قالي ده المهندس بتاع العامرية هو اللي قال كده قلتله يا باشمهندس انا معرفش عامرية و لا سموحة انا اعرف ان ده توكيل منصور و هو المسئول عن عربيتي وحضرتك زي ما استلمت مني العربية ترجعهالي سليمة المهم قالي حتصل بيهم تاني و رجعلي قالي خلاص حضرتك حتسيبهالنا لغاية ما تيجي الكرتيرة من العامرية قلتله وهي مش موجوده هنا رد بالنفي طبعا انا كنت في قمة الغضب فطلبت منه انه يعطيني مستند رسمي بان القطعه مش موجودة و بالطبع رفض و هنا بدأ يهديني و يقولي و الله لو عندي مأخرهاش عنك و اول ما تجيلي هركبهالك و بعد ما هديت طلبت منه انه يستلم العربية رسميا و بالفعل استلمها و علي موعد تاني يوم اني استلم العربية
يوم السبت كلمته قالي الحاجة جت و حنركبها اول ما يفضي الكوريك و حجيبهالك لحد البيت و انتظرت حتي الساعة 5 و بعد ربع ساعة لقيته بيتصل بيقولي انا اسف يا فندم القطعه المبعوتة من العامرية جت بالخطأ ومعلش بكرة انشاء الله تستلمها !!!!
يوم الاحد الساعة 3.30 كلمته قالي تعالي استلم العربية و بالفعل استلمتها و روحت

**Usama Nagi** · 13-06-2011 02:32 PM

المشاركة الأصلية كتبت بواسطة arakysolom

يوم الاحد الساعة 3.30 كلمته قالي تعالي استلم العربية و بالفعل استلمتها و روحت

طب استلمت علي اي وضع وهل دفعوك حاجة ولا هما اعترفوا بالخطأ و اتحملوه

و يا ريت تقولنا ايه المصاريف الجانبية زي الونش و خلافه هل حاسبوك عليها زي ما اتفقوا معاك

و هل العربية الوقتي ظبطت و الزيوت "الموتور و الباور" مضبوطين و لا لسه فيهم مشاكل

**aymanmaly** · 13-06-2011 02:39 PM

اولا الف مليون مبروك
ثانيا طمنا بعد كل هذا العربية ضبطت و مافيش اثار زيت؟
كان فية اي تكلفة للزيوت ؟
و الحمد لله على كل شىء
كفارة

**Bassem Raafat** · 13-06-2011 03:29 PM

الحمد لله على حل المشكله ، وربنا يسترها مع الجميع .

**arakysolom** · 13-06-2011 04:12 PM

الف شكر للأساتذة أ/باسم و أ/ايمن و أ/Bluemaneg
اولا لم ادفع اي مليم في هذه القصة كلها و بالنسبة للونش انا مستخدمتهوش لأني لما كلمت المهندس في العامرية قالي انا حخلي المسئول في سموحة يتصرف و فعلا هو قابلني يوم الجمعة الصبح و كان جايب معاه علبة زيت و ملأ علبة الزيت و ساق العربية بنفسه و انا ركبت معاه
المهندس محمد عبد الفتاح راجل محترم و بصراحة انا سألته عن الزيوت و القصة دي قالي متشغلش بالك بأي حاجة
ثانيا ادفع ليه و الخطأ من عندهم 100%
ثالثا انا روحت البيت بالعربية و ملحقتش اجرب اي حاجة فيها بس الملحوظ في الفترة الصغيرة اللي مشيت بيها ان الدركسيون اصبح اتقل من الأول بس مقدرش احكم عليه في الفترة القصيرة دي 10 دقائق
ربنا يسترها مع الجميع و يحفظكم من كل مكروه
الواحد بيحمد ربنا علي ستره لأن القصة دي كانت ممكن تحصل معايا و انا راجع علي الصحراوي من العامرية و كنت بجري فكان ايه ممكن يجرالي في هذه الحاله ؟؟؟
بصراحة انا عندي نتيجة و صلتلها بعد هذه القصة بس منتظر اراءكم الأول

**arakysolom** · 13-06-2011 04:16 PM

انا يا جماعة مش عارف ازاي اعرف ان الزيت بتاع الموتور اللي اتحط في العربية نفس النوع اللي كنت حطيته في الصيانة 10000 و هل الكمية اللي اتحطت كمية كاملة و سليمة ؟؟ و شكرا
لأني مكنتش حاضر عملية تغيير الكارتيرة و الزيت

**abou-yahia** · 13-06-2011 04:51 PM

بلنسبه لي الكميه انت ممكن تقيس الزيت صباحا قبل التشغيل والمقياس حيحدد الكميه الموجود مناسبه ام لا

نوعيه الزيت هنا انا مش عارف انت شاكك انه فيه نصبايه في الحاله ديه معرفش ادلك ازاي تستخدم معيار اللزوجه في التعرف عل ينوع الزيت بس ممكن اقولك ان الزيت التخليقي بيكون لونه افتح من العادي علي ذهبي كده .
وممكن ترجع للفاتوره لو انت عايز تذكر نفسك فقط
وشكر