الموضوع: تجربتي مع مركز خدمة سيات بأرض اللواء وحسبي الله ونعم الوكيل فيهم

السلام عليكم ورحمة الله وبركاته

بعد شرائي لسيارتي الجديدة سيات كوردوبا 2002 لقيت عندي شوية ضبط للعربية وحاجات بسيطة محتاجه تتغير

أولا لقيت ترشيخ خفيف لزيت الفتيس من أولسيل عصاية الفتيس فقلت أروح أغيره وكان عندي رجة بسيطة مع تشغيل التكييف فذهب للتوكيل كشفو وغيرو الأولسيل و زودو زيت الفتيس وقالولي انهم نظفو البوابة وحاسبوني علي ثمن اسبراي تنظيف رغم اني فكيتها ونظفتها بنفسي قبل ما أروحلهم
1- ثمن الأولسيل 37 جنيه
2- ثمن لتر زيت فتيس 19 جنيه
3- ثمن اسبراي جاف 17 جنيه
4- تكلفة الكشف علي عصاية الفتيس 48 جنيه
5- تكلفة الكشف علي وحدة الحقن (البوابة يعني) وتنظيفها 60 جنيه

المهم في الأخر دفعت كله 197 جنيها بالضريبة ومشيت
قلت مش مشكلة وتكلفة مناسبة ومش عالية وشكرت فيهم كتير

جت أجازتي يومي الجمعه والسبت العربية مركونة يومين نزلت أبص عليها وأظبطها عشان نازل شغلي الأحد لقيت بقعة زيت تحت الفتيس تحسست مكان الأولسيل لقيته بيجيب زيت أكتر من الأول
جيت أتصل بيهم لقيتهم محدش بيرد لأن كنا بعد العصر يعني مشيو
اتعكننت وقمت راكب العربية ورايح شاري اولسيل تاني ومركبه بره تاني اتكلف 35 جنيه ثمنه وتركيبه (15+20) وقلت لحد ميشتغلو وأرحلهم عشان أعرف أمشي بالعربية جيت لقيته برضه بينزل زيت زي الأول

جيت رحتلهم النهارده عشان يكشفو عليه ويشوفو ايه المشكلة ويصلحوها
ركبو اولسيل تاني وزودو الزيت تاني ده علي حسب كلامهم لكن مكتبوش كده في الفاتورة
قلتلهم عندي رجه خفيفة جدا في العربية كشفوعليها وصلحوها ودفعوني اليوم 80 جنيه وكل اللي عملوه هو تأخير كهرباء العربية كتير جدا عن المسموح به (من الأسبراتير) جيت أخدت العربية ومشيت
السحب سييء جدا عن قبل ما اروحلهم والرجة الخفيفة مرحتش ومع التكييف زفت أكتر المهم قلت انا مش راجع تاني
رحت الشغل وطلعت العده وفكيت لقيتهم مأخرين الكهرباء كتيييييير أكتر من المسموح (وبوظلي راس المسمار الألنكيه رقم 5 اللي بيضبط منه الكهرباء)و رجعتها تاني زي مكنت انا ظبطها قبل ما أروح والحمد لله العربية رجعت اظبطت تاني

قالولي انهم كشفو علي كل الكهرباء وعلي كابلات البوجيهات وعلي البوجيهات واللي اكتشفته ولا اي حاجه من دي حصلت فكيت الكابلات لقيتها مملحه من الأطراف من كثرة غسيل العربية بالماء من المستخدم اللي قبلي نظفتها شوية علي قد معرفت والحمد لله الرجة شبه راحت والعربية اتظبطت أكتر

قالولي العربية محتاجه تغير :-
1- سير دينمو ( مش شايف كده برده ) ممكن نغيره كسيرفس مش مشكلة
2- قاعدة محرك أمامية ( العربية لما بتدور وهي باردة مافيش فيها رفه ولا اي وقت ودهدليل علي ان القاعدة سليمة ) والرجة اتحلت مع ضبط الكهرباء وتنظيف الكابلات
3- حشو عصاية فتيس (العصاية سليمة ومافيش فيها مشاكل ) ممكن نقول ان قاعدتها هي اللي محتاجه تتغير ولكنها مش عاملة اي مشكلة
4- الفيوزات فوق البطارية (فعلا فيها فيوز مكانه مش مضبوط وكلامهم صح في دي )
5- رشح زيت الفتيس (بيقولو محتاجين يفكو الفتيس ويعملو جلبه علي المخرطة ويعملو اولسيل تاني ويغيرو الزيت تاني والعربية هتقعد عندهم يومين وهتتكلف فيحدود 500 الي 600 )وطبعا القصة دي كلها ان شاء الله حلها عندي بس لما أفضي هرفعها وهشوف انا ايه المشكلة وان شاء الله هحلها من غير فك لأني عارف علاجها ايه وربنا المستعان
6- كشف علي لوك الزجاج (مش عارف ده ايه أصلا والزجاج كله عندي زي الفل )

دي كانت نتيجة الكشف المجاني اليوم وعلي فكرة كشف نصف كم وكنت واقف والعربية ولا اتحطت علي جهاز ولا اي حاجه كله بالعين كده والتجربة والجهازجنبهم زيه زي الكرسي اللي قعدين عليه

وحسبي الله ونعم الوكيل فيهم وربنا ينتقم من كل ظالم
يمكن عملوني كده عشان انا ملتحي وهما تقريبا كلهم أقباط ؟؟؟؟؟؟؟؟ مش عارف
وكمان لما طلبت باسسورد الانترنت اللاسلكي في القاعة قالولي عليه غلط ومعرفتش أستخدمه باللابتوب بتاعي ؟؟؟؟؟؟؟؟ يمكن لنفس السبب الله أعلم
الله المستعان وربنا يعوض علينا فيه ملحوظات أخري كتير ولكن كفاية كده