الموضوع: العربية كانت هتتسرق في عز الظهر

كالعادة ركنت العربية قدام الشغل الساعة 9:30 صباحاً و نزلت عشان أرجع الساعة 1:30 لاحظت حاجة غريبة. الكبوت كان مفتوح!!
سرحت كده و قلت يمكن أنا مشيت بيه كده الصبح و أنا ناسي؟ رحت قافله بإيدي و لاحظت تاني حاجة، الريموت مش بيفتح العربية ثالث حاجة لقيت الشلتة اللي بين الكرسيين متحركة عن مكانها
رابع ملاحظة لقيت الجريدة النيكل بتاعة البابين الأماميين مرفوعة عن مكانها و الدهان متجرح + آثار حرارة و نار على دهان القائم الأيمن
رحت فاتح العربية بالمفتاح و لقيت اللي هتشوفوه في الصور و أصدرت شوية ألفاظ و أصوات تتماشي مع الموقف

دي الصور

مش مصدق. العربية دارت فعلاً بتوصيل السلوك و الموتور كان ساخن. الحرامي فتح العربية عنوة و بسرعة فتح الكبوت و قطع سلك سارينة الإنذار و دخل عاش حياته جوه. كان فيه كيس لب على الكنبة خلص، و كان في جنيهات فضة اتاخدت. البيه ابن ال#$^%# خد مفك و بنسة و راح جايب ضفيرة الكونتاكت و على قد ما أنا باحمد ربنا أنه ماطلعش بالعربية، على قد ما أنا مستغرب ايه اللي منعه يكمل؟ هل ما عرفش يفك الدركسيون و هو مسوجر؟ أرجع أقول دي بيجو 504 يعني أي ميكانيكي حافظها و أي حرامي عارف هيعمل فيها ايه.
الواضح بقى أن الحرامي ده قبيح، شغال في عز الظهر، لم يلتفت لكاسيت أو كارت ميموري أو نظارة شمس كانت قدامه، البيه كان عايز العربية على بعضها يا إما بلاش

جبت زمايلي في الشغل و قعدت أقول أبلغ ولا أطنش، طنشت. رحت مطلع العدة و فصلت البطارية و قعدت أعري السلوك و وصلتها تاني و قفلتها بشكرتون و رحت ماشي. ابن ال*&^$%^ قاطع السلوك قصيرة قوي من عند الكونتاكت الغريب برضه أن طول ما أنا شغال في العربية عشرات الناس عدت جنبي و ماحدش سألني انت بتعمل ايه
حمدت ربنا و افتكرت صاحبي اللي اتريق عليا مرة لما كنت باستخدم قفل الدركسيون. انا من ساعتها ما سبتش العربية إلا لما أسوجر الدركسيون + قفل الدركسيون + فصل الكهرباء + الإنذار