ايه اكتر موقف شيبك وانت سايق العربيه (يعنى) حد كسر عليك او كنت هتخبط فى عربيه او شخص

انا حصل معايا مواقف كتير وانا سايق بس هحكي اكتر موقف شيبني فعلا وده كنت راكب في اتوبيس

راكب في اتوبيس وراجع من طريق اكتوبر وكعادة اي حد راكب في اتوبيس بيبقى بيبص على الشباك

كنت راكب في كرسي على اليمين

ابص من الشباك الاقي ترلا محملة عمالة تحدف على الاوتوبيس اللى انا راكب فيها

وعمالة تقرب من نحية الكرسي اللى انا قاعد فيه

تقرب اكتر واكتر واكتر وانا نزل عليا الصمت واحساس بشلل غير عادي ! ! اكن مستني لحد مالتريلا بالحجات اللى محملاها تطير الازجاج وتلبس فيا

سبحان الله الواحد في المواقف دي بيحس انه فعلا اتشل !

وخلاص عمال ابص من الازجاج وابص للترلا وهي بتقرب اكتر واكتر وخلاص بقى كلها كم سنتي والترلا تلبس واروح فيها

وفجاءة الاتوبيس مرة واحدة يحدف ويبعد عنها

بصيت بعدها على الراجل اللى كان قاعد جمبي لقيته حاضن الكرسي اللى قدامي واكنه جاله شلل او صرع !

قلتله حصلك حاجة راح بصلي كدة وساكت مش بيتكلم ! !

والحمد لله عدت على خير !

تقريبا كل الحاجات الحلوه اللي بتحصلي علي الزراعي لأني عليه شبه يوميا

مره باللانوس الساعه 2 بالليل ماشي 140 في الشمال والطريق فاضي خالص ، قدام شويه في عربيه 3/4 نقل قلبتله نور عادي احسن يكون ناوي يقفل ولا بينام ويحدف عليا .. بعد ما قربت منه خلاص داخل عليه لاقيت الباشا ده موطي علي الدركسيون مبحلق في المرايه باصص في وشي وبيرمي عليا بغباء طبعا كنت مستحيل افاديه حرقت زياده ورميت شمال وهو بيرمي عليا علي ما طلعت منه كان خلاص هيلبسني في الخرسانه اللي في النص بقي نص العربيه علي التراب وهو علي وشك يخبطني من اليمين .. من ستر ربنا ان مكانش في حجاره أو اي حاجه علي التراب

مره تانيه بالبي إم بالليل متأخر برضو وكنت مطبق يومين ومش مجمع خالص ، تقريبا 140 برضو والزراعي ضلمه عربيتين ماشيين في الشمال والنص فاضي والحاره اليمين مقفوله بلوكات خرسانه علشان الحته دي معديه علي كوبري معرفش ترعه ولا ايه دي .. المهم خدت الحاره اللي في النص بسرعتي وعديت من أول عربيه فجأه لاقيت واحد تيت معندوش ولا لمبه منوره والطريق ضلمه أصلا طبعا اتفاجأت بيه والمسافه صغيره دوست فرامل علي الأخر العربيه بتزحف ناحية الخرسانه اليمين وانا مرعوب اني هلبس فيها العربيه هتدمر وسمعت خبطه كده و وقفت يمين بعد الخرسانه علي طول بطلت العربيه متخيل ان الربع الأمامي يمين ده طار مش هلاقيه بس الحمد لله مكانش في أي حاجه العجله طلعت علي حجره صغيره والجنط اتطبق والكاوتش اتقطع ، العربيه من 140 وقفت في مسافه وهميه .. بس كنت غلطان طبعا مش نايم مفيش تركيز وبجري وبعدي من اليمين ومش فاتح النور العالي في الضلمه

ركبت العربيه وقاعد شويه علي ما اعصابي تهدي منور نور الصالون ببص في الدواسه اليمين لاقيتها منوره قلت الدواسه اتخرمت هههه اكتشفت ان كان في مرايه تحت الكرسي اليمين مع الفرامل جريت في الدواسه وعاكسه نور الصالون


بالاستارليت علي الزراعي برضو مره بالليل لبست ظلطه من عربيه نقل كان ماشي يهبل وفجأه الازاز كله سرطن مبقتش شايف حاجه خضه وحشه جدا

وأسوأ موقف حصلي ماشي في الحاره الوسطي علي 110 تقريبا وموتسيكل ماشي بطئ جدا في اقصي الشمال وخلاص علي وشك أعدي منه فجأه راح واخد الطريق بالعرض ملحقتش حتي اديله كلاكس دوست فرامل علي الأخر راحت العربيه معرضه بجنبها وانا اتهبدت في القايم وانا علي 110 والعربيه بجنبها تماما وشايفها رايحه علي الرصيف بوشها و بجنبها داخل في الموتسيكل والواد سمع صوت صريخ الكاوتش وبيبصلي تقريبا جري عدي بسرعه .. لحظه كده وفوقت سيبت الفرامل ولميت الدركسيون العكس اتعدلت وحدفت علي جنبها التاني يمين في شمال حوالي خمس أو ست مرات لحد ما نزلت السرعه ل40 والعربيه اتعدلت كنت خلاص دمي هرب لأنها اول مره تحصلي

في مواقف تانيه بس دي أكتر حاجات بفتكرها

اقتباس:

---

المشاركة الأصلية كتبت بواسطة الصيداح

ههههههههههه علشان تبقى تعمل الصح مش كدة ولا إيه يا زعييييييم
موقف مضحك جدا
حمد لله على السلامة

---

إحنا جينا نعمل الصح إتعمل معانا الغلط :grin54:
شكراً يا معلم

اقتباس:

---

المشاركة الأصلية كتبت بواسطة medo_atef

انا بقي اكتر موقف شيبني وانا سايق كان من شهرين
قبل ما احكي انا عندي الضغط ولما بتعب جامد مش بشوف كويس
كنت راجع من اسكندرية بعربيه النترا 2010 خليجي وكنت انا وصحابي وعمالين نضحك وكده وانا سرحت في واحده كنت خاطبها وراجع بقي طول السكة ماشي علي 160 وسرحان
المهم باخد دوران علي شان اخش البلد ووخده علي الواسع اوي وبجري علي اخر بعد ما اخته بس العربيه لسه مخدتش طريقه في العدل وفجأه بدي للعربيه الغيار الرابع وانا بجري كانت سرعتي ساعتها 90 وسرحان جامد بقي وبرجع الذكريات وفجأة لاقيت واحد بينه وبين العربيه 2 سم ملحقتش طبعاً ادوس فرامل ولو دوست الراجل كانت في نص العربيه ومش هعرف افاديه المهم دوستة ومات الراجل ده الله يرحمه وانا بدوسة لاقيت نفسي طلعت فوق رصيد عالي اكلت وش العربيه بالشاسيه بتاع العربيه ....اتاري يا جماعه ده كان بلطجي وحطين حجر من بتاع الرصيف في نص الشارع علي بيثبتوا الناس وبيمضو الي معاه عربيه علي تنازل بالعربيه ويبصموه كمان وانا اتسجنت فيها 40 يوم كانوا من اسوأ ايام حياتي ومن يوميها بكره الهينداي بصفه عامة .
علي فكرة نا لسه خارج من التحقيقات وكده من 14 يوم

---

قضاء أخف من قضاء يا باشا الحمدلله على كل شيء

مرة كنت راجع من الحرفيين و كنت لسة ظابط العربية ظبطة حلوة و داخل صلاح سالم واخده جري السنين .. المهم سخن معايا واحد معاه هيونداي جيتز و بنجري إحنا الإتنين على 160 - 170 تقريباً .. أنا كنت ماسك اليمين و هوة الشمال و كل ملاقي عربية أدامي أقوم واخد غرزة في اليمين عشان كان فاضي .. المهم قبل طلعة الكوبري اللي بعد سور الكلية الحربية و أنا واخد اليمين و طاير ألاقي مرة واحدة قدامي هيكل عجيب الشكل مفهمتش ساعتها ده عربية ولا إيه بالظبط بس خدت فيه غرزة بالعافية الحمدلله و فاديته .. بس طبعاً قلبي كان في رجليا .. بس صاحبي اللي كان قاعد جنبي قاللي إن الهيكل ده كان عبارة عن فيراري بتفتح سقفها .. الكابورليه .. كان زماني في الشنطة عنده بدل السقف :grin54: ربنا سترها الحمدلله

اقتباس:

---

المشاركة الأصلية كتبت بواسطة midooz

إحنا جينا نعمل الصح إتعمل معانا الغلط :grin54:
شكراً يا معلم

---

هههههههه
لا ما هو الصح إنك متجريش وإلا المرة الجاية الراجل هيفضي الرصاص فيكم
ربنا يسترها علينا وعليكم

كنت ماشي ع دائري المعادي و سرعتي 70 فجأه لقيت تريلا طاير من جنبي ع الشمال و لقيته بياخد غرز ف بعدت عنه
شويه راح واخد غرزه قدام عربيه و خبطها و العربيه الي وراها لبست فيها و كذا واحده لبسو ف بعض
و انا كنت ماشي ف النص و لقيت عربيه بعد ما اتخبطت بقت قدامي و الطريق زحمه ف فرملت جامد لحد ما العربيه وقفت
طبعا حمدت ربنا اني ماكنتش بجري ساعتها كان زماني وسطيهم

علي فكره الحادثه دي معروفه و تقريبا كانو 12 عربيه خبطو ف بعض و سواق التريلا هرب

انا فى موقف حصلى
على كوبرى الواسطى باسيوط رايح اسهر فى كافيتيريا على اول الطريق الزراعى انا والشلة وكنت اعرف اسوق بالعافية وواخد عربية واحد صاحبى وهوا قاعد جنبى واحنا فى نص الكوبرى ظهرت باقى الشلة كل كام واحد فى عربية واحد منهم جه جنبى وضحك وقالى تشد ؟؟ صحابى اللى جنبيى اللى هو صاحب العربية قله نشد وبصلى وقلى خيطة العربية بتاعت الواد اللى بيشد معايا زيرو مكملتش 5 شهور طار وانا جنبه بحاول اجاريه هوب خلص الكوبرى وظهرت الصنية اللى فى الآخر السرعة حوالى 130 الطريق بيقفل صاحبى خاف على عربيتو راح مهدى وسابنى ادخل الاول وانا باحط رجلى على الفرامل حسيت انى حطيتها على قالب طوب ومفيش اى تأثير روحت داخل يمين مع الطريق ومكمل على الزراعى علشان منفعش ادخل الصينية بالسرعة دى لقيت فى كمين على اول الطريق والظابط بيشاورلى اقف هاهاها آل ينفع طبعا كان هايموت ببص فى المراية لقيته مرمى على جنب الطريق وواحد صاحبنا وقف معاه كان ظابط برضو وباقى عربيات الشلة ورايا صواريخ ربنا ستر والفرامل استجابت بعد ما طفيت العربية ورميتلها ودارت تانى ده طبعا طبق لنصيحة صاحب العربية اللى قاعد جنبى وفطسان على روحوه من الضحك موش عارف ليه مع اننا بنموت ولما وقفت العربيه نزلت قعدت فى الارض وروحت بعد كده مع واحد تانى ورجعت للظابط وانا مروع اعتزرتله وفهمته الموقف وحرمت اسوق اى عربية لمدة 6 شهور وحاليا لو راكب عربية وجبت التسعين ركبى بتخبط فى بعض
الحمد لله

حصان

أنا فاكر موقفين...أول واحد كان باللانوس في 2009. البطارية نامت في المهندسين, رحت بنزينة الراجل زودلي مية والعربية دارت ومشيت.

خدت المحور ورحت 6 أكتوبر, ووانا راجع تاني على زايد وماشي 110...ألاقي الكابوت قام ضارب في الإزاز في وقت لا يتعدى النص ثانية! طبعا أنا اتسرعت والإزاز اتشارخ جامد وكنت ماشي عالشمال قمت واقف على شمال الطريق عشان مكنتش شايف حاجة أدامي. نزلت لقت الكابوت راشق في الإزاز ومنزل السقف لتحت. مش عايز أقول لكم أنا قعدت فترة طويلة بعد الموقف ده عندي هاجس إن الكابوت هيضرب في وشي وانا ماشي.

طبعا الدرس المستفاد من الموضوع ده إني بقت بشيك على أي حاجة حد بيعملهالي في العربية.

تاني موقف بالجين 2 من حوالي شهر كده...كنت راجع من أكتوبر برده وقدام mall of arabia أنا ماسك تاني حارة من اليمين وميكروباص واقف عاليمين خالص, وعربية في الحارة التالتة وواحدة في الرابعة. طبعا كلهم على مسافات متفاوتة, المهم أنا ماشي بسحب عادي وجبت بتاع 95 كم كده وبعدي من تاني حارة يمين, ويميني ميكروباص واقف وشمالي قدام حاجة بسيطة عربية تانية.
واذ فجأةً الاقي 2 ستات بيعدوا الشارع ببطء فظيع وكانوا على بعد بتاع 10-15 متر.

طبعا أنا كان أدامي حل من تلاتة, يا إما أخُش في الميكروباص, يا إما في العربية اللي على شمالي, يا إما اخبط الناس.
طبعا بعد ماركبت الفرامل اللي هي عمرها مكانة هتوقفني في الوقت لمناسب نظرا لإن الناس قريبة قوي. ال abs اشتغل و قمت كاسر كسرة بسيطة شمالي فـالعربية اللي على شمالي هدت شوية وقمت كاسر تاني جامد وطالع من الستتين وانا سامع صويتهم وشكلهم وهم يادوب بيعدوا من قدام الكبوت بتاعي.

طبعا الواحد اعصابه سابت بس الحمد لله تمالكت نفسي وكملت مشواري على طول.

الدرس المستفاد إنك تاخد بالك إن دايما فيه ............* بتعدي الطريق من غير ماياخدو بالهم إنه طريق سريع.

اقتباس:

---

المشاركة الأصلية كتبت بواسطة raul_7

أنا فاكر موقفين...أول واحد كان باللانوس في 2009. البطارية نامت في المهندسين, رحت بنزينة الراجل زودلي مية والعربية دارت ومشيت.

خدت المحور ورحت 6 أكتوبر, ووانا راجع تاني على زايد وماشي 110...ألاقي الكابوت قام ضارب في الإزاز في وقت لا يتعدى النص ثانية! طبعا أنا اتسرعت والإزاز اتشارخ جامد وكنت ماشي عالشمال قمت واقف على شمال الطريق عشان مكنتش شايف حاجة أدامي. نزلت لقت الكابوت راشق في الإزاز ومنزل السقف لتحت. مش عايز أقول لكم أنا قعدت فترة طويلة بعد الموقف ده عندي هاجس إن الكابوت هيضرب في وشي وانا ماشي.

طبعا الدرس المستفاد من الموضوع ده إني بقت بشيك على أي حاجة حد بيعملهالي في العربية.

تاني موقف بالجين 2 من حوالي شهر كده...كنت راجع من أكتوبر برده وقدام mall of arabia أنا ماسك تاني حارة من اليمين وميكروباص واقف عاليمين خالص, وعربية في الحارة التالتة وواحدة في الرابعة. طبعا كلهم على مسافات متفاوتة, المهم أنا ماشي بسحب عادي وجبت بتاع 95 كم كده وبعدي من تاني حارة يمين, ويميني ميكروباص واقف وشمالي قدام حاجة بسيطة عربية تانية.
واذ فجأةً الاقي 2 ستات بيعدوا الشارع ببطء فظيع وكانوا على بعد بتاع 10-15 متر.

طبعا أنا كان أدامي حل من تلاتة, يا إما أخُش في الميكروباص, يا إما في العربية اللي على شمالي, يا إما اخبط الناس.
طبعا بعد ماركبت الفرامل اللي هي عمرها مكانة هتوقفني في الوقت لمناسب نظرا لإن الناس قريبة قوي. ال abs اشتغل و قمت كاسر كسرة بسيطة شمالي فـالعربية اللي على شمالي هدت شوية وقمت كاسر تاني جامد وطالع من الستتين وانا سامع صويتهم وشكلهم وهم يادوب بيعدوا من قدام الكبوت بتاعي.

طبعا الواحد اعصابه سابت بس الحمد لله تمالكت نفسي وكملت مشواري على طول.

الدرس المستفاد إنك تاخد بالك إن دايما فيه ............* بتعدي الطريق من غير ماياخدو بالهم إنه طريق سريع.

---

مشكلة موضوع الكبوت ده الميزة الوحيدة في عربيتي إن الكبوت بيفتح عكس الإتجاه السائد بتاع كل العربيات
يعني بيفتح من ورا لقدام
القفل بتاعه بايظ يعني بيبقى مفتوح على طول ورغم كدة مفيش مشاكل أثناء السير

كنت ماشي علي الكورنيش في اسكندرية وعربية ماشية تبعد عني بكام عربية خبطت واحد بيعدي , طااار ونزل علي الطريق و حوالي 7 عربيات بعد كده داسو علية كنت انا واحد منهم , وقفنا طبعا وكان منظر ابشع ما يكون , مصارينة في حته وهدومة في حتة وراسة ورقبتة في حتة , واتعقدت من العربية وبعنها بعدبها .
ومره تانية علي طريق اسيوط الغربي ابام ما كان فرده واحده اتجاهين , عربيتين ميكروباص اخدو بعض بالحضن قبل ما اوصل ب 5 دقايق وشوفت حاجات يعجز عن وصفها الكلام , الحادثة دي جات في الجرنال بعديها ومات فيها 20 واحد

اقتباس:

---

المشاركة الأصلية كتبت بواسطة beckeryahia

كنت ماشي علي الكورنيش في اسكندرية وعربية ماشية تبعد عني بكام عربية خبطت واحد بيعدي , طااار ونزل علي الطريق و حوالي 7 عربيات بعد كده داسو علية كنت انا واحد منهم , وقفنا طبعا وكان منظر ابشع ما يكون , مصارينة في حته وهدومة في حتة وراسة ورقبتة في حتة , واتعقدت من العربية وبعنها بعدبها .
ومره تانية علي طريق اسيوط الغربي ابام ما كان فرده واحده اتجاهين , عربيتين ميكروباص اخدو بعض بالحضن قبل ما اوصل ب 5 دقايق وشوفت حاجات يعجز عن وصفها الكلام , الحادثة دي جات في الجرنال بعديها ومات فيها 20 واحد

---

ياساتر يارب ايه ياعم دانتا موعود

راجع من فطار المنتدي الاخير الساعة حوالي 2 بليل علي كورنيش شبرا الحتة دي فاضية اصلا و انا حافظها فشديت شوية حوالي 130 / 140
مرة واحدة لقيت قدامي بتاع 20/ 30 متر واحد و بيعدي الطريق من الناحية التانية خالص و واخدها جري اصلا مش بيبص علي اي حاجة و جه قدامي و تنح اجيلة يمين يجيلي يمين اروحلة شمال يروح شمال

عديتة باعجوبة و ركنت علي جنب و تزل جري اضرب فيه بتاع سيكيورتي خلصة من ايدي و طلع في الاخر مجنون عايش في الحتة
بس فعلا ركبي سابت و فضلت شوية مش عارف اسوق

و في موقف تاني برضة

كنا في اكتوبر بعربية واحد صاحبي دخلنا مونا و العربية زي الفل خرجنا من البنزينة و ماشيين في الطريق انا مكنتش لسة فوقت من النوم فمش مركز مع صاحبي و لا بتكلم معاة اصلاً :)
لقيت العربية مرة واحدة بتحدف يمين في شمال بسيط

افتكرت صاحبي كان بيفادي مطب و لا تكسير في الارض عادي متكلمتش و كان اصلا مفيش عربيات جنبنا فمخدتش في بالي

علي طول بعديها لقيتها حدفت تاني مرة واحدة علي تريلا و داخلين تحتها بقي ساعتها انا اتلبشت بس سواق التريلا كسر مرة واحدة علي اخر لحظة

اتاري شداد العربية اتكسر و بقت كل ما صاحبي يدي غيار العربية تعوم

بس احساس وحش قوي انك خلاص داخل تحت تريللا

انا مرة ماشي علي الدائري بعد وصلة صفط في اتجا اكتوبر و عايز اطلع وصلة المريوطية فجبت يمين خالص الاقييلك خير اللهم اجعله خير تريللة قررت فجأة تطلع معايا الوصلة و راحت حادفة من اقصي الشمال لاقصي اليمين عشان تطلع الوصلة و لا بصيت في عربيات جاية و لا لأ, المهم فضلت اجيب يمين (انا كنت علي 60 ساعتها) و هو بيحدف اكتر لحد م لقيت نفسي خلاص هنزل من علي الوصلة في بلكونة مواطن في العمارة اللي بتطل علي الوصلة.... الي الان معرفش فلت من التريلة ازاي الحمدلله..... بس البنطلون اتبل بعديها جامد !

أكتر حاجة عاجباني ف المشاركات دي أنها بتسحبنا من غير مانحس لاننا نفكر كتير قبل أي مجازفة أو غرزة أو غيره ....وده شئ جميل يشكر عليه صاحب الموضوع ...
أحيانا كتير بتحصل المشاكل بسبب تهور أو خطأ من الغير ... أنا بقي حصل معايا موقف بسبب الأدب
كنت ماشي علي طريق زراعي ((بكل ماتحمله كلمة زراعي من معني )) بالليل والطريق ضلمة مافيش ولاكشاف والطريق إتجاهين ...
كان جاي ف وشي عربية شاهين وضارب النور العالي (حقة طبعا مهو مش شايف حاجة) ..
المهم أنا كمان كنت ضارب النور العالي لكن قبل مأقرب منه بشوية قلبتله نور عشان يطفي ماعبرنيش قلت مش مشكلة برده أطفيه أنا وخليني أنا أحسن منه وكمان أنا مشيت ع الطري ده قبل كده ومافيهوش مفاجات ولامطبات ف الحته دي ...
المعلم ده عدي ويادوب برجع النور العالي ويارتني مارجعته :oops1:
قدامي بحوالي 10 متر راجل راكب علي حمار وساحب وراه عدد 3 جاموسه من النوع سامسونج :crying2: وماشي ف نص الحارة بكل برود الدم ...:untitled 1:
طبعا بعد شوية رقع علي الفرامل وأصوات زحف لحقت نفسي عند ديل أخر جاموسه (واضح ان دي القائد ) ..
لا والجزمة بقي مش تجري مثلا لا دي نطت لفوق وعاوزة ترفس العربية برجلها ههههههههههههههههههههههههه هههههههه .... وفضلت تنط شويه كده حتي بعد لما بعدت شوية مش عارف علقت ولا أيه ...كنت حاسس أنها عاوزة تلف وترجعلي :angry06:
والله منظرها وهي بتنط ترفس هو اللي خفف عني الرعب اللي حسيت بيه وخلاني أقعد أضحك بس طبعا بعد ما أتجمدت ف مكاني ... كان زمانها قاعدة ف الكرسي اللي جنبي :glasses12:
أدي أخرت الأدب والأحترام ومن يومها حرمت أطفي النور العالي لاي حد ...
بس في ناس بقت تشتم (( إطفي النور يا........... )) .... ماعرفش بيطفي منين تعالي أطفيه أنت ...:grin54:
مابقتش عارف أعمل ايه لاكده عاجب ولاكده عاجب ...

شكرا جزيلا لصاحب الموضوع ولكل الناس الى كتبت ... فى مواقف مهمة اوى نتعلم منها

---------

انا حصل معايا كزا موقف بس المرة الوحيدة الى عملت فيها حادثة كانت كالتالى :

كنت ماشى على كورنيش النيل وداخل على ميدان التحرير الساعة 1 بليل تقريبا

طبعا ماشى مش سريع حوالى 50

بعدين لقيت ناس بتعدى الطريق باعداد كبيرة على مسافة 100 متر تقريبا قمت على طول مدى انتظار وهديت واحدة واحدة لحد موقفت عشان الناس تعدى

بعد موقفت ب تلت ثوانى تقريبا لقيت واحد داخل فيا جامد من ورا وكان جمبى واحد صاحبى بس الحمد لله كنا لابسين الحزام اتنطرنا ادام شوية بس الحزام لمنا وسبحان الله كان رجلى على الفرامل العربية متحركتش اوى ولولا كدة كان زمانى دايس الناس الى كانت بتعدى لان كان بينهم اطفال كتير

طبعا نزلت اشوف حصل اية لقيت ان الاكصدام اتعوج شوية بس الحمد لله معنديش حاجة جامدة وبصيت على عربية الراجل الى ورايا لقيت وش عربيتوا ادمر كانت عربية بيتلز قديمة اوى زى بتاعت احمد حلمى فى مطب صناعى وحاطط عليها عصافير والوانات غريبة كدة واسكسسوارات طفولية اوى وطبعا كلها وقعت على الارض :d !! ساعتها قولت الفيرنا مشاء الله اكصدام تمام !!

الغريب بقى انى لقيت الولد الى كان سايق هو شاب صغير مش كبير نازل يزعق ويقولى انتا مبتعرفش تسوق !! انتا !! انتا .. !! انتا !!

اظاهر زعلان على شوية العصافير الى اتكسرت ووقعت :d

طبعا هو الغلطان واظاهر كان بيلعب فى الموبايل او مش واخد بالوا من الطريق الله اعلم !!

بكل برود منى قلتلوا انا بردوا الى مبعرفش اسوق !! وشاورتلوا باديا بعلامة اسكت يعنى وقمت واخد بعضى وماشى وسايبوا عشان حسيت انو عاوز يمشى على مقولة خدوهم بالصوت !! ... طبعا اعد يقول انتا حتمشى وتسبنى انتا رايح فين !! ولا عبرتوا وركبت عربيتى ومشيت

تجبنا انى ادخل فى مشادة وكلام ملوش لازمة ولو كلمت الشرطة حخليها تيجى وحخلية يصلحلى عربيتى كمان على حسابوا وبصراحة كان عندى شغل الصبح ومكنتش فاضى للكلام دا

-------------

دا بردوا موقف يبين ازاى الناس بتتعامل مع المواقف حتة لو هى غلطانة ...

اقتباس:

---

المشاركة الأصلية كتبت بواسطة MBhead

الله يرحمه
طبعا يا باشا هيا في الاول و الاخر الاعمار بيد الله
بس بتفرق في العربيات بردو يعني مثلا عربيتي الW116 في الامان مش زي الجديده منها الW221 في 10 ايرباج علي الاقل و Pre-safe و نظام كل ازاز العربية بينطر لبره وقت التصادم و الموتور بيتفصل عنه كهربا و بنزين و سنسورات بتقدر تحدد المسافات بتساعد ف استباق الاصطدام و pre-safe و نظام فرامل BAS و blind spot assist و نظام تنبيه لو اللي الئق نام و نظام رؤيه ليلي و كاميرا باشعه فوق بنفسجيه تكشف لو شخص واقف في الظلمة و اللي سايق مش شايفه و حاجات تانيه كتير انا مش فاكرها ...عوامل امان عاليه جدا جدا جدا
لو مثلا جبنا عربيتي مثلا اللي كل عوامل الامان فيها Crumble zone و احزمة امان و الدركسيون بيتكسر ساعات التصادم و صلب حولين الكابينه و بودي صلب جدا جدا ..و دخلنها في حيطه و دخلنا W221 في حيطه لو اللي نزل من عربيتي سليم
اللي حينزل من الW221 حتلاقي بنطلونه بس اتكسر و عايز يتكوي
انا ركبت الW221 احسن وصف لها .......انها طايره

---

ايه علاقه دا بالموضوع اللى بنتكلم فيه زى ما يكون السؤال اشرح مميزات ال w116 ومقرنتها بال w221 .....

متزعلش بهرج معاك ياباشا بحاول اطلعك من حاله الحزن اللى انت فيه والله يكون فى عونك

اقتباس:

---

المشاركة الأصلية كتبت بواسطة ahmed ezz

راجع من فطار المنتدي الاخير الساعة حوالي 2 بليل علي كورنيش شبرا الحتة دي فاضية اصلا و انا حافظها فشديت شوية حوالي 130 / 140
مرة واحدة لقيت قدامي بتاع 20/ 30 متر واحد و بيعدي الطريق من الناحية التانية خالص و واخدها جري اصلا مش بيبص علي اي حاجة و جه قدامي و تنح اجيلة يمين يجيلي يمين اروحلة شمال يروح شمال

عديتة باعجوبة و ركنت علي جنب و تزل جري اضرب فيه بتاع سيكيورتي خلصة من ايدي و طلع في الاخر مجنون عايش في الحتة
بس فعلا ركبي سابت و فضلت شوية مش عارف اسوق

---

موقف مضحك جدا هلكنى على نفسى من الضحك لانى تخيلت المجنون واقفلك قدام العربيه زى حارس مرمى فى ضربه جزاء وعمال يروح شمال ويمين عشان يمسك عربيتك.........

اقتباس:

---

المشاركة الأصلية كتبت بواسطة ahmedesmat1987

موقف مضحك جدا هلكنى على نفسى من الضحك لانى تخيلت المجنون واقفلك قدام العربيه زى حارس مرمى فى ضربه جزاء وعمال يروح شمال ويمين عشان يمسك عربيتك.........

---

هههههههههههههه ايوة هو دة بالظبط