الملف اللذي طلبته قد يكون مشنوقا او محروقا (يوم في المرور )

**SHNORY** · 15-06-2011 12:55 AM

هو عنوان الموضوع مبهم شويه
بس ده اللي جه في دماغي اول ما شوفت الختم ده

اه والله ده ختم بجد وبحق وحقيقي
وختم حكومي كمان
روحت اجدد رخصه العربيه
واثبت الموتور الجديد علي الرخصه راحو رازعينهولي علي الورق
ولما شوفته موتت علي روحي من الضحك
ححكيلكم دلوقتي بقي اليوم من اوله
-----------------------------------------
كلمت صديق ليا بيخلص اوراق للعربيات في المرور وواخد توكيلات من شركات وناس للتخليص
فقالي قابلني في مرور ابيس 9 الصبح
قولتله بس انا محرم بيك
قالي لا لازم نروح ابيس علشان شهاده المخالفات لان محرم بيك اتحرق
فروحنا
دخلنا علي شباك المخالفات
جيبنا شهاده فاضيه وراحوا كاتبينها بان مفيش مخالفات (من مميزات الثوره ) واتختمت من تنفيذ الاحكام
معرفش ايه لزمتها الخطوه دي بس ما علينا
ورجعنا علي مرور محرم بيك
طبعا نظريه الجنيه غلب الكارنيه كانت في اوج زهوتها اليوم ده
واحد هبش ورقه ب100
خلصلي الفحص والطفايه وكتبلي كمان ان المثلث وشنطه الاسعاف موجودين
وان العربيه فيها مرايات ومفيهاش ولا فانوس اشاره مكسور ولا مغيره تلت امامي ولا حاجه خالص
وان شكمانها بيطلع اوكسيجين نقي
لدرجه خلتني اتخيل
ان لو حد جاله ضيق تنفس حيحطوله وشه في شكمان عربيتي ويخلوني ادوس بنزين علشان يفوق
----------------------------------------------------------
خلصنا دايره الفحص دي كلها وبدانا في الاجرائات بقي
تامين بدل 75 جنيه بقي 92
ضريبه 175 جنيه
لحد ما جينا لاثبات الموتور
دخلنا مكتب فاضي عليه موظفه
بصت للورقه بعمق
وبصت للدفاتر الي جنبها
وراحت رازعاني الختم سالف الذكر
بصيتله وضحكت اوي
قولتلها طيب انا اعمل بيه ايه ده
قالتلي تروح الاداره العامه للمرور في رابعه العدويه تجيب اصل الافراج
قولتلها يا ستي وانا مالي هو انا اللي حرقتلكم مروركم
قالتلي هو كده
وروح اشر عليها من الظابط
روحنا اشرنا عليها
راح الظابط قالنا تختموها بقي بختم النسر
منين يا باشا ؟؟
من مرور ابيس
يا دهيتي السوده
هو المرور مفيهوش ختم نسر
قالنا لا
حاضر يا سيدنا تحت امر معاليك
اخدت العربيه ورجعنا علي مرور
اجمل حاجه بقي
مدخل المرور ده من الطريق السريع
وانا داخل لقيت راجل بيعدل الشارع كانه ماشي في طرقه بيتهم
روحت تيييييييييييييييييييييييي ييييييييييييييييييييييييي يييييييييييت بالكلاكس
فوقف وبصلي
قالي انت بتزمر وانت بعيد عني بسنه
قولتله معلش يا حاج صحيتك من النوم
ودخلت ختمت الورقه بختم النسر
وفاضلي مشوار رابعه العدويه ده
بس الاجرائات خلصت بسرعه
يمكن علشان مش انا اللي كنت بتمرمط والراجل الي معايا الله يباركله بيخلصلي اوراقي بسرعه
واصلا مفيش حاجه في مكانها في المرور
===================================
نداء للمخربين
الثوره الجايه تبقوا تحرقوا المرور بكل فروعه
مش تحرقوا واحد وتسيبوا التاني
علشان ميقرفوناش احنا

**Eng.Geo** · 15-06-2011 01:05 AM

ههههههههههههههههههههههههه ههههههههههههههههههههههههه هههه

**zago** · 15-06-2011 01:08 AM

طيب ياباشا
مرور رابعه العدويه ده عسل
علي انت صوتك بس حتلاقي لوا جاي يخلصلك ورقك
بس ياريت ....
ولا بلاش

**ahmed_mido1889** · 15-06-2011 01:16 AM

حلو الختم ده

**alynubira** · 15-06-2011 01:17 AM

هههههههههههههههه على فكره الثوره ضااااااعت

**ahmedfoud** · 15-06-2011 01:17 AM

المشاركة الأصلية كتبت بواسطة zago

طيب ياباشا
مرور رابعه العدويه ده عسل
علي انت صوتك بس حتلاقي لوا جاي يخلصلك ورقك
بس ياريت ....
ولا بلاش

و الله انت الي عسل
و هوا ممكن لما يعلي صوته يكتشفوه و يعملولو شريط كاسيت و بدل ما اللواء ييجي يخلصله الورق يجيله منتج و يكتشفه
طبعا لو انت لواء مش هتخاف من واحد بيعلي صوتوا
و تعليه الصوت من غير سبب ايه مشيها قله سبب

**nicegypt** · 15-06-2011 01:19 AM

هههههههههههههههههه
موت من الضحك بسبب طريقة سردك الرائعة كعادتك دااااااائماَ
الختم دة مصيبة لوحدة .. كنت تحاول تدفع اي حاجة وتطلع من القصة دى ويعملو لك ملف جديد
كفارة يا شنروي .. هانت .. كلها كام يوم زفت زي دول كدة وتخلص هههههه
انا بهدلونى 4 ايام زي الفل .. شربت فيهم احلي شمس .. ربنا يوفقك وتخلص بس اهم حاجة فضفض وتابعنا وقولنا ع الجديد اول بأول
ونصحية غالية يا جماعة بصراحة من الاخ شنر .....فعلا عندة حق الراجل اللى يحرق مرور يولع فية كلة مش يسيب لنا كام فرع يطلعو بية عنينا هههههههه ..
مشفتش نصيحة اجمل من كدة ف حياتى .. تسلم نصايحك ياشنر