اقتباس المشاركة الأصلية كتبت بواسطة تامر.محمد مشاهدة المشاركة


يا حضرات
بصراحة
الأولى ما حققتش اهدافها
و التانية دخلت بينا في سكة استبداد
و التالت ان ربنا ما ارادش انها تحقق اهدافها و هو احتمال وارد

هايبقى بسبب اللي بيفكروا زي حضراتكم كده
قاعدين في بيوتهم , يتفرجوا و يمصمصوا شفايفهم و يعيبوا على كل اللي بيحاول يصلح و هي دي شغلتهم في الحياة
اللي بيفكروا زيكم يا حضرات و عايزين بلد حلوة ديلفري , مش عاجباهم البلد و مش عاجبهم برده اللي بيحاول يصلحها , او شايفين انه بيصلحها غلط و مش بيحاولوا يعملوا الصح اللي في دماغهم ده

كان ماله يعني الاحتلال الانجليزي ؟؟؟؟

كان ماله ال
اقتباس المشاركة الأصلية كتبت بواسطة wael17 مشاهدة المشاركة
ليه يا استاذ تامر اسلوب الهجوم ده ووصفي و غيري من الاعضاء بأننا " قاعدين في بيوتهم , يتفرجوا و يمصمصوا شفايفهم و يعيبوا على كل اللي بيحاول يصلح و هي دي شغلتهم في الحياة " ....هو احنا عمرنا ما هانتعلم اسلوب افضل للحوار بدون اهانة الاخر و الاستهزاء به

و هل تعتقد ان كل الناس اما قاعدين في بيوتهم يمصمصوا شفايفهم زي ما وصفتني او ثورجية علي طول الخط و ثورة ثورة و الي الامام الي الامام
من قال لحضرتك ان انا ما شاركتش في الثورة؟
من قال لحضرتك اني ما حولتش اغير سلبيات كتير في المكان الي باشتغل فيه و المكان اللي ساكن فيه بعد الثورة
هل الثورة معناها نزول ميدان التحرير كل يوم جمعة ؟ يعني اعمل ايه عشان ما اتوصفش باني قاعد في البيت امصمص شفايفي...يعني مثلا كل ما تيجي سيرة الثورة اقول تحيا الثورة....بجد عايز اعرف الناس بتتصنف انها مؤيدة للثورة او ضدها علي اساس؟ و من يمثل الثورة؟و من له الحق في تصنيف الناس انهم ثوار او قاعدين يمصمصوا شفايفهم في البيت
ليه حكمت علي اني قاعد في البيت امصمص شفايفي و اتفرج علي اللي بيحاول " يصلح" ...كل ده عشان قلت ان الثورة ممكن ما تحققش اهدافها و ان السنين هي اللي هاتبين نتائجها بعيد عن الكلام الكتير و الرغي و الجدال الي مش هانخلص منه

------
ايه رأيكم يا جماعة
هل ينفع مثلا احط صورة في التوقيع بتاعي و انا واقف وسط دخان قنبلة مسيلة للدموع عشان ربنا يرحمني من الاتهامات ...اني قاعد امصمص شفايفي في البيت

استاذ وائل .. أنا شفت رد الاخ تامر وماكنتش ناوي ارد عليه بصراحة

بس بما انك رديت اسمحلي اضيف حاجة

اولا : تعليقي على الموضوع ان الموضوع ده كان منتشر قبل كدة خلال الثورة وبصراحة انا مش عارف مصدره ... ومستغربه لأن ثورة 19 والحصل فيها من الشعب المصري كان من انبل واجمل ايام في تاريخ مصر وفي ثورة شعب ضد الاحتلال ... ولكن للأسف بعدما هدأت الثورة بدا الابطال يتقاسموا الغنائم وبدأوا كل واحد عايز يفوز بالنصيب الاكبر وراحت الثورة على كدة ... نقدر نقول ان دم الشهداء الماتوا برصاص الانجليز المحتلين راح هدر بجد.

ثانيا : ثورة 52 انا باعتبرها اسوأ حدث في تاريخ مصر الحديث وهي سبب الماساه المصر فيها دلوقتي

ثالثا: حضرتك يا استاذ وائل رديت على نقطة الدخول في افكارنا ونفسياتنا ومعرفة ما بصدورنا حتى حركات شفايفنا مع اني والله قافل الكاميرا باستيكر

بس احب اضيف اني مش لازم اكون ثورجي وسخنان على طول الخط وضد ضد وخلاص واشتم في الماضي كله وارفع من شان الثورة بالكامل وخلاص ( مات الملك عاش الملك )

الثورة عمل انساني بشري غير منزه عن الخطأ وإحتمالات حدوث اخطاء فيها وارد جدا .... والمطلوب الاستفادة من اخطاء الماضي ... مش نقول ديه اعظم ثورة في تاريخ مصر بل في العالم ... طيب بأماره إيه

- استفتاء شارك فيه نسبة مشاركة لم تحدث في تاريخ مصر وبعد النتيجة البيسموهم نخبة مش عاجبهم الاستفتاء

- ناس عايزة دستور قبل الانتخبات عشان اغراضهم الشخصية

- ناس عايزة انتخابات باسرع وقت عشان تاخد الاغلبية

- ناس عايزة تاخر النتخبات لاجل غير مسنمى عشان يحصل حاجة من اثنين
- تعمل قاعدة عريضة في الشارع واعتقد ده محتاج سنين
- المجلس العسكري يعجبه النظام ويحكم هو البلد (وصدقني البسطاء في مصر هايشجعوا ده)

- ناس عايزة مجلس رئاسي مدني عشان يوزعوا التركة

- والناس الفي الشارع ولا في دماغها كل الكلام ده .... الناس بتدور ازاي تأكل عيالها

هلاقي واحد يقولي ثمن الحرية غالي ... بس صدقني ثمن الامن اغلى بكتيييييير

محدش من المتكالبين على السلطة عارف انه هايستلم بلد خالية من الامن ومديونة لطوب الارض وفيها مرض وجهل وتعصب

ومحدش يقولي بسبب النظام البائد والكلام الحلو ده .... ده واقع وده الموجود

ولو عايز تحارب فساد .... حارب الفساد الفي نفسك .... لان الفساد وصل من رئيس الجمهورية لعامل القمامة البيكنس الشارع

وده محتاج اجيال عشان يتصلح

اتمنى اكون ما طولتش بس الوضع بصراحة اصبح مستفز

يا اخوانا البلد لو ماوصلتش لإستقرار بأسرع وقت ممكن هاتلاقي ثورة مضادة بس مش فلول .......... هايكون شعب زهقان وجعان وعطلان
وده اخطر من الفلول
وشكرا