إقتراح جديد لصناعة الموضوعات.

**Horsepower** · 19-06-2011 02:37 AM

السلام عليكم جميعا,
عندي إقتراح أود مشاركتم فيه,,,
إحنا إتعودنا إن أي موضوع جديد بيعمله واحد لوحده ,,, هو إللي يبحث ويدور ويكون الموضوع وينسقه ويكتبه في المنتدى.
أنا فكرت أننا نعمل خطة موضوعات (بحثية) نشترك فيها كلنا (رجالة الهوندا) في البحث وجمع المعلومات ,,, كلنا مش واحد لوحده ,,, ويتم تجميع المعلومات الخاصة بموضوع معين في سياق التعليقات ,,, كل ما حد يجيب معلومة جديدة يكتبها في الموضوع ,,, ونستعين بأخونا المنسق العام للقسم سمسم باشا في تنسيق المعلومات دي في أول الموضوع (يعني ياخد المعلومات إللي في التعليقات ويحطها في أول الموضوع فوق ويكتب أسماء الإخوة الأعضاء إللي شاركوا في صناعة الموضوع ده بالمعلومات.
كدة الكل يشارك ويدور ويفيد ويستفيد وأنا متوقع إن كم المعلومات هايكون أكبر بكتير من الموضوعات ذات البحث الفردي ونتعلم نشتغل في مجموعات وهكذا.
ممكن مثلا يجي أي عضو يفتح موضوع عايز يجمع عنه معلومات ويقول مين يحب يشارك في البحث في هذا الموضوع والإخوة الأعضاء إللي يحبوا يشاركوا معاه في البحث يبلغوه (و من عدد المشاركين يقدر إللي فتح الموضوع يعرف الناس مهتمة بالموضوع ده ومتحمسة ليه واللا لأ ,,, وده مش وحش بالعكس.
ويتحط تاريخ لإتمام الموضوع (تكون فيه مثلا 90% من المعلومات تم الحصول عليها وتجميعا في الموضوع.
دي فكرة سريعة وفي إنتظار رأي الإخوة الأعضاء وخصوصا إللي حاسين بالملل ومش عارفين يعملوا إيه.
وشكرا,

**No Comment** · 19-06-2011 11:08 AM

طيب ده بيختلف عن اللى احنا بنعمله فى ايه ... مهو معظم المواضيع يا بشمهندس بينحط فيها اراء مختلفة حتى يتم الوصول للحل الامثل .
ومابيكونشى فى حكر لحد على حد ولا فرض رأى ... احنا بنكمل بعض وبنساعد بعض طبيعى جداً حتى حل المشكلة .

كنت عملت قبل كدة موضوع عن أهم مشاكل الهوندا واحسن الصنايعية ليها بغرض انه يكون دليل للمشاكل المشتركة للهوندا وللاسف مكنشى فيه تفاعل كبير فيه .

والأن انا مع أى حد وأى فكرة بأى طريقة تكون مفيدة للجميع .

**Hamdy Masria** · 19-06-2011 02:57 PM

فكرة جميلة احمد بية
وفعلا لو تم التفاعل زى ما حضرتك قولت هيبقى فى كم معلومات هايل
وزى ما بيقولوا ايد لوحدها متسقفش

**honda forever** · 19-06-2011 03:33 PM

فكرة جميلة يا ريت ينفع تتنفذ

**SAMEH_FOUAD** · 19-06-2011 05:36 PM

احمد باشا سامى واحشنى جدا

طبعا فكرة رائعة جدا وهتنشط فكر الاعضاء كتير اوى انهم مش هيعتمدوا على مصدر واحد من المعلومات انهم يلاقوها فى المنتدى لأ هما يبدأوا يفكروا ويدورا ويشاركوا بية

بس الموضوع دة ان شاء الله هيتم شرحة فى المقابلة القادمة ان شاء الله

**sanhory** · 19-06-2011 06:21 PM

على فكرة الموضوع دا انا طرحته في موضوع ما هو ال vtec
نظرا لتضارب المعلومات في الموضوع دا و قلت فعلا لازم يكون فى كونسولتو عشان نقدر نعمل توثيق لمعلومات صحيحة باجماع الخبراء .

فعلا فكرة ممتازة يا استاذ horsepower
نرجو تطبيق الفكرة لتعم الفائدة و كمان ارجو من كل الناس تقرا و تشارك و ماتستناش المعلومة تيجي جاهزة

على فكرة طريقة توصيل المعلومة عن طريق التصحيح بتكون اسهل بمعني اننا ممكن نعمل الموضوع كطرح سؤال و الكل يشارك اللي يعرف واللي ميعرفش و نشوف كل واحد ايه المعلومة اللي عنده عن الموضوع دا او ايه تصوره عنه و في الاخر يتحط التصحيح و بكده كله يشارك و يتفاعل