الموضوع: فكرة خطرت ببالي... هو ليه الناس خايفة من تطبيق الشرع

السلام عليكم جميعا,
أولا أنا عايز أوضح أني أنسان مسلم عادي جدا ومعتقدش أني أعتبر حتى من الناس الملتزمة ولا أنتمي لأي حزب سياسي.
أنا ببساطة بسمع وبقرأ أراء ناس مختلفة من "النخبه" زي ما بيقولى ويمكن معظمهم ضد تطبيق الشريعة الأسلامية ومع الدولة المدنية و سيادة القانون.

هو ليه ناس المفروض أنهم من النخبة يعني المفروض بيفهموا يكونوا ضد شرع الأسلام, ولا هما خايفين من اللي حيطبق الشرع مش من الشرع نفسه, هل خايفين من التشدد ولا خايفين أن اللي حيطبق الشرع يطبقه على مزاجه و تبعا لهواه الشخصي.

أنا مع الدولة المدنية يعني ايه.. يعني السيادة للقانون , بس لازم بما أننا دولة أسلامية تبقى القوانين مستمدة من الشرع وأعتقد أن ده كفيل أنه يعطي كل واحد حقوقه سواء بقه مسلم مسيحي يهودي أو حتى واحد ملهوش ملة.

أنا في اعتقادي أن تطبيق الشرع حيكون ليه جوانب كويسة كتير جدا:
- أخلاص الناس في شغلها أو تعليمها , - تطبيق الثواب والعقاب, - مش حيكون في حد مش لاقي ياكل, -القضاء على البلطجة, - القضاء على مظاهر العري والصياعة من الشارع, - التزام الناس في المرور, - القضاء على الأرهاب, - طهارة الأموال وميكونش منبتها حرام, - رفعة شأن البلد علميا واقتصاديا, - العدل....... و حاجات كتير قوي .

نفسي في راجل مسلم بجد يخاف ربنا هو اللي يمسك البلد و يطبق شرع الله خوفا من الله مش تحقيق لأهداف شخصية او حزب أو جماعة.

اللهم ولي أمورنا خيارنا ولا توليها شرارنا و ولي من يصلح وأصلح من تولى يا رب العالمين و أحفظ مصرنا من كيد أعداءك أعداء الدين في الخارج و الداخل يا الله.

انا عايز اقول حاجة

معظمنا موافق على تطبيق الشرع
واعتقد كلنا متشابهين

وبما اني مش منتمي لأي تيار ديني

فهضع نفسي في الجانب الآخر ضد التيارات الدينية

وهقول انا عايز الشرع بس مين اللي هيطبقوا ؟


اجي اختلف مع الناس اللي خايفين من التيارات الدينية في الجزء دا

واقول : انا شايف اني دي مش مشكلة

احنا عندنا أزهر .. وعندنا لجنة فتوى اعتقد هي الأكبر في العالم -اعتقد بعد اللجنة العالمية-

احنا نجبها تصيغ لنا الشرع -الأحكام المتفق عليها - في صورة قانون .. وممكن يدخل في هذه اللجنة ممثلين لكل التيارات

وللعلم الأحكام المتفق عليها في الشرع كلنا عايزينها والله اعلم .. يعني معتقدش ان عليهامشكلة او تثير خلاف

أما الأحكام الفرعية .. فيترك لكل شخص الأختيار من الأراء او ان اللجنة ترجح رأي او مذهب
او ممكن نعمل عليها استفتاء


لكن فكرة ان طائفة هي من ستحكم .. اعتقد غير متصورة ..
وفكرة حكم رجال الدين .. لا اتصورها مطلقا ..
يعني متخيلش ان رئيس شيخ يصحى من النوم .. يطلع فتوى ويطبقها بلطجة على الناس

لازم يكون في تخصص
والمرجعية تكون الأزهر في المسائل الدينية -ولو اجزنا تمثيل التيارات-



انا شايف ان مفيش مشكلة والله اعلم

لكن لو فضلنا في الركن دا مش هنطلع منه
هنفضل محدش واثق في التاني ولا هنطبق الشرع ابدا بزعم نفس الحجة