الموضوع: الحقيقية وراء تجديد الرخصة في مرور حلوان (مايو حاليا)

السلام عليكم ورحمة الله

[justify]

للعلم عرفت ان مقر مرور حلوان القديم اياه اللي كلكم عارفينوا اتحرق و بيقوللك (متسألنيش مين اللي بيقول) انه اتحرق في احداث الثورة وهتلاقي بتوع المرور بيقولولك عشان بتقولوا ثورة آدي يا عم

المهم المرور بقى في 15 مايو لو كنت داخل من عند الملاهي و داخل يمين وعلى شمالك شريط الترماي كمل على طول لحد السنترال و ادخل شمال من اليو تيرن اللي بعده وعلى طول لحد لما تلاقي يافطة على اليمين مكتوب عليها مجاورة 34

ادخل أول يمين هتلاقي جامع كبير وبعديه المطافي و المرور و الاسعاف وده بالنسبة للمكان.

كل لما تروح بدري يكون أحسن أنا كنت هناك قبل 8 وده ليه لأن فيه فحص اجباري للكل حتى لو هتجدد وميعاد الفحص لسه بدري عليه و ده ببساطة علشان مفيش ملفات !

اول حاجة تدخل تركن جوه ستعدادا للفحص تكون جايب ورق الفحص من الخزينة وبالمرة هات ملف التجديد اللي في كشك التصوير راجل طيب يقوللك على كل حاجة كده و بالراحة.

الفني هيرفع رقم الموتور و الشاسيه و الهندس هيبص على الكبوت و العربية من بره و نظرة خاطفة من جوه ياخد الرخصة منك ويمضي الورق بعد ما يملا الاستمارة و هيديك الرخصة ويقوللك روح اختم الطفاية تقوم سيادتك تطلع بالعربية و تركن بره وتاخد الطفاية على الكشك بتاع الطفايات و يمضيلك على ورقتها لو من عندهم وبتاعت العربية والا هتلبس طفاية جديدة 120 جنيه تقريبا

نصيحتي لو فاضي املا بيانات الملف من الرخصة و البطاقة عشان توفر وقت وحرقة دم وهقوللك ليه...

بعد الفحص و الطفاية هتبتدي رحلة الشبابيك هتلاقى 4 شبابيك تجديد واحتمال تلاقي 4 موظفين وكل واحد و غزالته

اديت الملف للوظف لاقيته كل شوية يقوللي أملالك البيانات ياباشا؟! افهمها انت بقى.

هتاخد ورقة الضريبة المتينة وتدفع في الخزنة و ترجع تكمل مع الموظف تاني و بما اني مركب نمر جديدة السنة اللي فاتت انتهت القصة بانتظاري الرخصة الجديدة اللي طلعت في الآخر لمدة 6 شهور على ما تفرج لأن مافيش حاجة عن المخالفات لو لاحظت

لو النمر قديمة و هتركب الجديدة بدعيلك من كل قلبي و ربنا معاك

و أنا خارج كنت على موعد مع فقرة خمسة لقلبك و امتحانات السواقة للمستجدين (كوميديا ما بعد الملحمة)

تم اختصار بعض التفاصيل اللي مش هيخلوا مشوارك منها

و بالمناسبة أنا لا جبت مثلث و لا شنطة و لا حد سألني عليهم

يفترض ان المثلث باحطة على مسافة من العربية كتحذير و تأمين ليا مش عشان مقطورة تعديلي عليه مش كده ولا اييييييييه

و إلى لقاء.

[/justify]

تشكر يا باشا ع المعلومات
بس في طريق تاني احسن من عند الكمين اسهل واحسن