الموضوع: السيريون شبه ال Gen 2

المشاركة الأصلية كتبت بواسطة tutankhamoun

أزيك يا أستاذ محمد أيهاب
مين قال إن السيريون أفضل إجمالا من النواحي الآتية
العمر .... لو علشان ياباني ,,,,, بص و شوف الويرا عاملة أيه دلوقتي
الجودة .... لو علشان عيوب التقفيل اللي أختفت أساسا منذ 2007 يبقى كدا نتلافي هذا العامل
التقفيل .... نعم تقفيل السيريون في الصالون أفضل
النعومة .... نعم السريون أنعم
الباور .... معرفش باور السيريون عامل أيه

و لكن يُقابل ذلك

محرك أقوى و ضمانه 100 ألف كيلومتر و خمس سنوات و من تصميم لوتس الإنجليزية

صاج أقوى ..... اتزان أعلى على الطريق .... تسارع أعلى ..... شنطة أكبر ..... شكل أفضل بكتير ...... كماليات أفضل ..... محرك أقوى و كما قلت ضمانه 100 ألف كيلو متر و عمره الأفتراضي 250 ألف كيلومتر بدون تغيير أي جزء فيه

كل ده و تقولي السيريون أفضل
هي علشان ياباني يعني ............. و عجبي على السوق المصري

و على فكرة سعر اعادة البيع للجين 2 أفضل و أنزل السوق و شوف
و برضه عدد الجين 2 في الشارع يديك مؤشر عن السيارة و مقارنته بالسيريون

و أختلاف الرأي لا يُفسد للود قضية

انا بقول ان السريون افضل في الاجمالي
وهقولك ليه

العمر الافتراضي انا هقولك بس شوف الدايهاتسو بتاعت الثمانينات واسأل أخونا Dr_Smart اللي معاه شارمنت اتوماتيك موديل تقريبا 82 لحد دلوقتي وشوف عامله معاه ايه
ودايهاتسو حاصلة على المركز الخامس بعد تويوتا في نتائج مؤسسة الــ JDPOWER لعام 2007

وشوف الشاريد اللي من التسعينات لحد دلوقتي وبتتباع ولها سعر في السوق في الثلاثينات كمان وهيا 1000 سي سي

يعني الدايهاتسو متجربه ومعروفه في السوق ومأكده

الجودة أظن ان الدايهاتسو بكل موديلاتها لا يختلف احد على جودة خاماتها وانا أؤكد ذلك وعن تجربه

التقفيل حضرتك اعترفت ان السيريون افضل

النعومة كذلك لصالح السيريون
الباور بقه ده انا اتحدى احد انه يقولي على عربيه انعم من كده
ده لدرجة اني كنت فارك انه زي الكورولا ولما ركبتها من قريب لما اشتريت واحده 2006 اكتشفت ان باور الكورولا تقيل بالنسبة لي فايه رايك

المحرك متهيألي ماتور 1500 سي سي بينتج عنه 103 حصان وموفر واقتصادي وتسارع من صفر لمائة في 10 ثواني وكسر يبقى تحفه ومش هحتاج اكتر من كده
وبرضه ضمان 100 الف كيلو او ثلاث سنوات

صاج اقوي فانا لا اقدر افتي فيها لأني لم اقس صاج الأتنين ولكن كل اللي انا اعرف ان صاج السريون اجمد من العربيات اللي في السوق لأن انا عربيتي دخل فيها واحد من الجمب كان ماشي براحه ودخل في الباب ومحصلشي حاجه الحمد لله يعني الصاجد مدعم جامد مش سهل انه يطبق يعني

اتزان على الطريق برضه انا شايف إن السريون متزنه جدا على الطريق بل بالعكس ده انا ممكن اقدر أأخذ ملفات على الضيق بسرعات عاليه عن باقي السيارات التانيه بسبب انها ماسكه في الطريق

تسارع اعلى انا معرفشي الجين تو بتجيب من صفر لمائة في كام ثانيه ولكن السيريون في 10 ثواي وكسر

شنطة اكبر فده برضه على حساب الصالون الخفي للعربيه

شكل افضل معاك ان شكل الجين تو جميل ورائع والجمال شئ نسبي ولذلك انا برضه شايف ان السيريون بالنسبة لي جميله جدا

كماليات افضل مش عارف زي ايه مثبت السرعه فقط مش كده

وبرضه ياريت الكماليات دي متعملش مشاكل

ويكفي ان السيروين مسمعناش ان في حد قابل مشكله في تقفيل او خامات او مشاكل ميكانيكيه او في اداء كمالياتها بالعكس الناس بتشكر وتوكيل محترم
مع الأخذ في الأعتبار ان قطع غيار اقل سعرا مقارنه بعمرها الأفتراضي وبلد نشاتها بجودة خاماتها


ده كله وتقولي دي ياباني
بلاش ياباني
قولي اعمل ايه في كل البنود دي