المشاركة الأصلية كتبت بواسطة mazagangee
اسمحولي أشارككم الموضوع
بصفتي أحد الأشخاص أصحاب العلاقة مع السيارات النقل و نصف النقل و ده بسبب عملي في قطاع المحاجر و التعدين ..
السيارات النصف نقل ( الجامبو ) و دي عربيات حمولتها القانونية 4 طن و تتم عمليات تقوية و تعديل في الشاسيه و العفشة عشان تشيل من 10 الى 13 طن و يتم استخدامها في نقل الحجر البلك و الرمل و أحيانا الزلط و دائما ما يكون السائق صغير السن و لا يتعدى ال20 سنة ...
السيارات النقل الكبيرة ( الجرار و المقطورة ) و دي حمولتها 20 طن للجرار و 15 طن للمقطورة باجمالي حمولة 35 طن و بالمثل تتم عمل تعديلات في العفشة و الشاسيه لرفع الحمولة الى 50 طن للجرار و 30 طن للمقطورة باجمالي 80 طن و دي بتكون نسبية لاختلاف طبيعة الحمولة يعني مثلا لو محمل فوسفات أو رخام أو زلط أو طفلة ممكن توصل ل 120 طن لكن لو محمل حجر جيري هتكون 55 الى 60 طن .....
السيارات النقل ( التريللا ) بيتم عمل تعديل للعفشة و تحويلها من قرب الى سوست و تعديل شاسيه المقطورة لرفع الحمولة من 35 الى 75 طن متوسط حمولة ...
طيب ليه أصحاب السيارات بيعملوا كده ؟ مش برضه عمر العربية هيقل للنصف ؟
أولا : سعر شراء السيارة غالي جدا و يصل الى 1.3 مليون جنيه .
ثانيا : متوسط عدد الرحلات الممكن عملها في الأسبوع قليل .
رابعا : سعر الجاز غالي .
خامسا : سعر الزيت غالي .
سادسا : سعر الصيانة و قطع الغيار غالي جدا و كمثال سعر الكاوتش للجرار و المقطورة يصل الى 40 الف جنيه و احيانا ضعف الرقم ده على حسب نوع العربية و مقاس الكاوتش المطلوب .
سابعا : زمان كان كل كمين بيدفع فيه شاي و قهوة و غدا و عشا للباشا الظابط و طقم العصابة الموجود في كل كمين .
ثامنا : مشاكل العمالة من سائق و تباع .
طبعا أنا مش بحاول أبرر المخالفات دي لكن بحاول أضع وجهة نظر أصحاب السيارات النقل و ردودهم على المشاكل دي .
لازم نوجد حل مناسب قبل ما نطلب موقف ضد السيارات النقل , لأن السيارات النقل دي من أهم العوامل المؤثرة على أسعار السلع و الخدمات في السوق ( مثال سعر طن الرمل 15 جنيه في المحجر و سعر نقله الى القاهرة 55 جنيه ) ....
أطالب بحل مشاكل السيارات النقل الأول و بعد كده مش سحب رخصة السائق اللي يخالف لأ يتم منعه من العمل كسائق لمدة ستة شهور مثلا و بعد كده منعه من العمل تماما , و لو السيارة نفسها اللي مخالفة مصادرتها .............
بس ده بعد ما نحل مشاكل القطاع الخطير جدا و المؤثر جدا على أسعار السلع و الخدمات .