الموضوع: قصة الغلبان وتوكيل نيسان .. وقدرة الرحمن

المشاركة الأصلية كتبت بواسطة no comment

كنت ماشى فى حالى ومعدى ... لقيت موضوعك قمت واقف ومهدى .
لما لاقيت الناس ملمومة على موضوعك وعمالة تبص ... وسايبن بقية المواضيع لحد ما المشاركات فيها انخفض للنص .
قلت يا ترى ايه ده المهم اللى لاممهم ... وعن حال باقى القسم واخدهم و شاغلهم .
اتارى زميل جديد أنضم لينـــا ... وسحب باسلوبة الشيق قلبنا بعد عينينا .
فحبيت أحييه على اسلوبه وارحب بيه ... قبل ما التيدا تشغله وتطلع عنيه .

ما شاء الله ما شاء الله حلوة جداااااااااااااااا

دا الموضوع من جماله استفز مواهب الاعضاء و انقلب لمنافسة قوية في القافية الشعرية

المشاركة الأصلية كتبت بواسطة samsong

مساء الفل -لسه شايف الرد-خلاص لك حق عرب عندي بس اهم حاجه شاي بنعناع -ماشي

لالالالالالا .... يا كومندان
انا ليك عندك حق عرب ... Arabian right .... اقعد كل ده جعان؟؟ ...بصرف النظر اني متغدي مرتين النهارده :))))
لا ولم ولن أقبل اقل من واحد شاورمة كومبو وبطاطس ولتر بيبسي (فراخ او لحمة) الامر متروك لك :)))

قبل ما اكمل في توضيح .. علشان أبقى معاكوا صريح .. قصتنا دي مش للتبجيح .. ولا الشتيمة ولا التجريح .. ولا الفضيحة أوالتسييح

مش عشان واحد شاف مع التوكيل أيام أليمة .. يبقى خلاص يديلهم بالجزمة القديمة

وارد إننا كلنا نغلط .. مش كل شيء عندنا متظبط .. مش عارف ليه بس بنتنطط

الغلط الأكبر في الإصرار .. أو المقاوحة باستكبار .. أو المعاملة باستهتار

المهم

بعدما ظبطت العربية .. وسافرت بيها لاسكندرية .. ورجعت بيها من تاني يوم .. وأول لما صحيت مالنوم .. قلت أقيس الزيت واطمن .. قبل مايحصل حاجة واتجنن

تتوقعوا لقيت إيه ؟!!!

هو المرة اللي فاتت لما الفني رجعلي نص لتر في شنطة العربية قالي ابقى قيس الزيت .. لو لقيته قل زود من الجركن

لكن لما قيست لقيته زايد بردو حوالي سنتي ونص عن علامة الحد الأقصى

قلت وبعدين بقى ؟؟؟؟؟

حسيت إن كل شيء بالاتفاق .. إلا التوكيل .. بالخناق

وبما إني روحت أول مره وكنت هاتدبس في أكتر من ألفين جنيه عالفاضي .. ومع ذلك كنت محترم وماتخانقتش

ولما روحت تاني عشان الزيت زيادة وماقتنعوش .. بردو كنت محترم وماتخانقتش

لكن المرة دي بقى خلاص زهقت .. وقررت بقى إن المره دي لما أروح هناك هبقى .. بردو محترم وماتخانقش

مانتوا عارفيني .. غلباااااان

بس لأ بجد لما حد بيزعلني قوي أو ينرفزني أكتر من مره

في الحالة دي
بردو ببقى غلبان

أعمل إيه .. بحب صفة الحلم لأبعد الحدود

مش معنى كده إني أتسك على قفايا مثلا

لا والله .. لكن بحب الهدوء في معالجة الأمور

وبافتكر حديث الحبيب صلى الله عليه وسلم:" إن الرفق لا يكون في شيء إلا زانه . ولا ينزع من شيء إلا شانه"

وحديث: " رحم الله عبدا سمحا إذا باع ، سمحا إذا اشترى ، سمحا إذا قضى ، سمحا إذا اقتضى"

نرجع مرجوعنا .. ونكمل وموضوعنا

روحت التوكيل وقلت للمهندس الزيت لسه زيادة .. مع إنك بتقول المفروض أربعة لتر وشيلنا نص لتر المره اللي فاتت .. ولسه بردو زيادة

قالي ازاي؟

قلتله يا باشمهندس اصحابي اللي معاهم تيدا وبغيروا الزيت في توكيل السبع ومودرن بيحطولهم هناك 3 لتر بس

طبعا اصحابي دول هما انتم .. ودا بعد إذنكم طبعا

ومرضيتش أجيب سيرة النت عشان باحس إنه بيعمل حساسية

المهم رد عليا رد .. حسيت إنه جاب جردل ميه ساقعة ودلقه عليا

قالي يا باشا حضرتك ممكن تروح تغير زيت في السبع

والله زعلت جدا من الرد

بس هو لم نفسه بسرعة وغير الموضوع ونادى للفني وقاله شوف حكاية العربية دي ايه؟

وانا عارف إن مفيش حكاية ولا حاجة

قلت للمهندس طيب تفتكر ايه الحكاية؟

قالي يمكن عندك مشكلة .. أو إن المكنة بتنطر زيت مثلا .. وبعدين مشي وراح مشوار
وعلى فكرة .. هما معترفين هناك إن زيت الصني بالفلتر 3 لتر المهندس نفسه قالي كده .. لكن مش معترفين إطلاقا بالموضوع ده في التيدا

المهم .. العربية دخلت وأعادوا قصة النص ساعة لحد ما الزيت يصفي عشان يتأكدوا

بس المره دي لما عدت النص ساعة وجا الفني يقيس الزيت .. حصلت حاجة غريبة جدا ..

مفاجأة

تخيلوا ..

لقى الزيت زيادة سنتي ونص بردو
ههههههههه

قلتله أنا معايا الجركن بتاع المره اللى فاتت حطلي الزيادة فيه

قالي مش مستاهلة دي كمية بسيطة قوي

قلتله لأ مش بسيطة دي كمية حلوة

قالي طيب ممكن حضرتك تستريح في الاستراحة وتشرب كباية شاي وكله هيبقى تمام بإذن الله

انتوا طبعا عارفين إنه ممنوع الوقوف في الورشة

بس أنا ساعتها عرق الغلاسة كان بينقح عليا وتوّهت ومرضيتش أطلع

ثم انا مابشربش شاي أصلا

بصيت لقيته جايب منديل ورق وبيمسح المقاس ويحطه تاني

قلت يمكن بيتأكد

عملها مره كان .. ومره كمان .. ومره كمان .. حوالي عشرين مرة

قلت يمكن مفكر إنها كميه بسيطة بردو وهتخلص في المنديل .. لحد ما المنديل اشتكى .. وبكى

فلما لقى الموضوع مش جايب نتيجة .. عمل اختراع وجاب خرطوم رفيع ودخله مكان المقاس ودخل فيه سرنجة 10 سنتي وقعد يسحب ويفضي في الجركن .. يسحب ويفضي في الجركن .. يسحب ويفضي في الجركن .. قلتله دا انا هبقى أجيبلك سرنجة 50 سنتي من اللي باستخدمهم مع الزباين بتاعتي في العيادة .. قالي هو انت اللي عيادتك في المكان الفلاني؟ .. قلتله أيوه .. وطلعنا بلديات وكان في واحد موصيه عليا من فترة .. أصلي من بلد جنب طنطا على طول

قالي أنا بافضي الزيت بالطريقة دي عشان المقاس يبقى مظبوط لأني لو فضيته كله في جركن وحطيته تاني بعد نص ساعة لما الزيت يصفي هتلاقيه زاد تاني

قلتله تسلم ياريس .. أستاذ
وطبعا لازم يكون أستاذ

أصل بلدنا بلد الاساتذة

وبعد كام يوم قلت أقيس الزيت تاني

تتوقعوا لقيت إيه؟

.

.

.

.

لأ بقى ارحموني .. كفاية كده

قيست الزيت .. لقيته مظبوط .. وصاحب التيدا بقى مبسوط

والقصة دي مش ضحك وهلس .. لازم نطلع منها بدرس

دي قصة بجد .. مش اشتغالة .. نفسي أوصّل منها رسالة

لكل مهندس وكل خبير .. لو فاكر إنك ملكش نظير .. وفاهم قوي وعارف كتير



"التيدا يا حبيبي .. ملهاش كبير"



آدي حكايتي مع التوكيل .. فيلم حقيقي مش تمثيل .. حكيتها معاكم بالتفصيل .. وآسف جدا عالتطويل



وتوته توته

.

.

.

.

.

.

.

إيه ؟!!!

.

.

.

.

.

.

مستنيين إيه ؟!!!

.

.

.

.

.

.

يلا قوموا ناموا .......

هنقضيها حواديت ولا إيه ؟!!!

قصة جميلة جدا بالاخص فى سردها .. والحمد لله على انتهاء مشكلتك على خير

فعلا التيدا 3 لتر .. وكويس انك اصريت على موقفك ...

وبعدين انا بحييك جدا على تعاملك لموقفك بهدوء وعقلانية كبيرة .. وياريت الناس كلها فى هدوئك وحكمتك

بخصوص الضمان .. مفروض انك بتقول اخر زيارة وضمان كان 35 الف كيلو وانت رايح تعمل صيانة الخمسين .. دلوقتى صاحب العربية عامل صيانة ال30 الف واذا مكنش عمل صيانة الاربعين ومعاها صيانة الخمسين وال60 الف يبقا كدا بره الضمان .. معنى الكلام ان لسه فى الضمان .. لان بتقول كمان عربيتك موديل 2009 ولسه قدامك سنة كمان على الانتهاء .. باين عليهم فى الاتحاد الوطنى ناس بيشتغلوا بعدم معرفة

ياريت لما تعمل الصيانة الجاية اعملها فى السبع اللى فى المنصورة لان ده اقرب حاجة ليك من طنطا .. وخد معاك الفاتورة اللى عملت بيها الصيانة فى الاتحاد عشان تثبت بس انك عملت صيانة

واى وقت حتروح تعمل صيانة فى السبع قولى قبلها على الخاص .. عشان اقولك تروح لمين هناك

وبالتوفيق والحمد لله ان الامور وصلت لغاية كدا

وفعلا انت راجل بركة

واعمل حسابك فى مقابلة نيسان الجاية .. عاوزين نشوفك ونتعرف عليك باذن الله

تحياتى ليك