الموضوع: قصة الغلبان وتوكيل نيسان .. وقدرة الرحمن

المشاركة الأصلية كتبت بواسطة ehabvet

سيبكو بقى من موضوع الشحن والاستلاف .. ونتكلم بقى في نقطة الخلاف

ونرجع بقى يا رجالة النيسان .. للمشكلة اللي كانت هتجيبلي الجنان

وكرههتني في اللي جابوا التوكيل .. وحسبنا الله ونعم الوكيل

الفني بعد ما جاب الكمبيوتر ووصله بالعربية وقعد يدور عالعطل لقيته نزل من كرسي السواق ونط عالكنبة اللي ورا وفكها من مكانها

قلتله خير؟

قالي طرمبة البنزين

قلتله مالها؟

قالي بايظة

قلتله ازاي؟

قالي نصيبها

طبعا استغربت واتنرفزت وجاء المهندس وكذا فني معاه وحاولوا يقنعوني

قلتلهم يعني أنا جاي بالعربية زي الفل ومفهاش حاجة والفني التاني لسه مجربها ونازل منها وكله تمام إيه اللي حصل بقى؟

قالي المهندس حظها كده هي ممكن تفصل في أي لحظة

قلتله يعني مش جايه تفصل إلا عندكم؟

قالي دا انت تحمد ربنا إنها مفصلتش إلا عندنا وإلا كنت هتدوخ بيها

قلتله يعني كل حاجة كانت سليمة لحد ما اشتغلتوا في العربية وبعدين تقولي الطرمبة باظت واحنا مش السبب؟

قالي هو في حد قرب ناحيتها .. دا كل شغلنا كان قدام وهي ورا تحت الكنبة الخلفية ومفيش حد لمسها

وبعد شوية كلام .. قلتله هي بكام

قالي 1970 غير الضريبة

قلت طب مينفعش تتفك وتتصلح .. قالولي لا طبعا دا هي عبارة عن موتور صغير واصل له كهربا وطالما الكهربا واصله تمام زي ماجربنا يبقى العيب في الموتور ودا مش ممكن يتصلح بيتغير على طول

طبعا سكت ومش عارف أعمل إيه؟

وكلهم واقفين وبيبصولي مستنين الرد

سألني المهندس ها هتعمل ايه؟

طبعا زي ما قلتلكم إن أنا غلبان ومليش في سياسة الصوت العالي والخناقات والمشاكل والحوارات .. وكمان مليش خبرة في الميكانيكا والكلام ده

فسلمت أمري لله وقلتلهم هعمل ايه يعني هارمي العربية عشان طرمبة البنزين .. وربنا كان ساترها ساعتها ومعايا فلوس لمصلحة تانية

وبعدين بصيت للمهندس وقلتله بكل هدوء: بص يا باشمهندش .. أنا راجل دكتور بيطري لا أنا مهندس ولا ميكانيكي ومفهمش في الشغل بتاعكم ده .. بس لو انتوا ظالميني فيبقى اللي بيني وبينكم ربنا .. هو اللي هيجيبلي حقي منكم

سكت المهندس لحظة وقال يا باشا احنا مانرضاش الظلم لحد ولو أنا السبب هصلحهالك على حسابي .. وبعدين قال للفني طب فكها كده الأول وحاول فيها كده قبل ماتركب الطرمبة الجديدة

مش عارف قاله كده ليه .. بيريحني يعني ولا بيخلص ضميره ولا الكلمتين أثروا فيه ولا إيه بالظبط

المهم فكها الفني وهو مش مقتنع وقعد يوصلها مباشر ببطارية الصني اياها

وأنا قاعد أقول الحمد لله .. قدر الله وما شاء فعل .. اللهم أجرني في مصيبتي واخلفني خيرا منها

بعدين لسه ببص عالفني لقيته بيركب الطرمبة القديمة تاني في العربية وبيجرب يشغل

وسبحان الله ....... بقدرة ربنا العربية اشتغلت في ثانية واحدة .. يطفي ويشغل .. تشتغل .. وكأن شيئا لم يكن

شوفتوا بقى قدرة الرحمن .. وقد إيه ربنا رحيم بالانسان .. مش بقولكم إن أنا غلبان .. مع إننا من أصحاب الذنوب والتقصير والعصيان .. ومع ذلك الكريم سبحانه بيعاملنا بالفضل والإحسان

المهم روحت العصر وأنا مبسوط وفرحان

وتوتة توتة .. لسه مخلصتش الحدوتة

لسه فاضل موضوع كمية الزيت .. هبقى أقولكم عليه لما أخلص مشاويري وارجع البيت

تصدق بالله العظيم

إنى حبيتك فى الله من غير ما أشوفك ولا اعرفك

ربنا يكرمك دايما يارب، وربنا يكفيك شر الطريق يارب